وظيفه اعلامي لا تناسب جميع الاشخاص
كلنا في المنتدي ممكن جدا و احنا بنرد علي موضوع معين, مع اننا بنرد كتابه يعني في وقت للتفكير في ما نقول, الا ان الوضع ساعات بيتطور لدرجه الشجار لتأييد رأي او مخالفته
الاعلامي وظيفته عرض الموضوع بحياديه مع مناقشته من جميع الجوانب
و في ناس في برامج مشابهه بره مصر قدرو يوصلو لدرجه عاليه من الاحترافيه في برامج التوك شو او البرامج الحواريه
انما في مصر كعاده المصريين
التوك شو تحول من اهدافه و اسلوبه
بقي حاجه ماسخه
شخص بيفرض وجهه نظره في جهاز اعلامي ليه للاسف اقصي درجات التأثير خصوصا في بلد الاميه و الجهل نسبها عاليه جدا جدا
فانتيجه ايه لما يكون مقدم البرنامج دون المستوي؟!!
احنا شوفنا مثال صارخ من الناس دي قبل كده وصل البرنامج بتاعه انه يكون مدفع و بندقيه شخصيه لتصفيه خصومه, و علي عكس ما كان المفروض انه كان بيحمي بقي بيهاجم (و مش هوضح اكتر من كده و ياريت اللي فاهم قصدي مين بلاش اسماء او تلميحات اكتر من كده احنا مش ناقصين مشاكل)
و الطبيعه دي موجوده بحكم الجهل
مدام مش قادر افهم و اتعلم يبقي بالفكاكه و مش لازم الخطوات السليمه تتبع
انا هاتعب دماغي ليه في التخطيط و التفكير و الاعداد
ماهو الموضوع مش مستاهل
حد فيكو بيحب ما يسمي بالست كوم sitcom اللي انتشرت في مصر في السنين الاخيره؟!!
اللي بيطيق بس يتفرج عليها يبقي يدخل يدور علي النت مفهوم الست كوم و يشوف اسلوب بناء الشخصيات و الاحداث و حتي المفروض تتصور بكام كاميرا و بيكون هدفه اييه!!
علشان بس يقتنع ان ما يفرض عليه في الفضائيات تحت مسمي ست كوم ما هو الا عك و هبل و استخفاف بالعقول
انا الحمد لله مقاطع التلفزيون (اللهم الا فضائيات معينه و مش بس كده انا بتفرج علي برامج محدده) و ده مش لأني متدين للدرجه دي ولا حاجه
انما انا بحترم عقلي
باجيب اللي انا عايز اتفرج عليه علي الكمبيوتر و خلاص
انما اتعرض زي عامه الناس للكم الهائل ده من التفاهات يبقي بجني علي عقلي
ولا ايه ارائكم (و بدون الدخول في سب و قذف لناس ممكن تودينا في داهيه الله يكرمكم)
المفضلات