فى زمايل كتير هنا فى المنتدى طلبه فى كليات الطب و طب الاسنان
خلونى افتكر مواقف طريفه حصلت فى ايام الدراسه و على مدى سنوات الشغل

فجت لى فكره كتابه مواقفنا الطريفه اللى مرت بينا أثناء الدراسه او الشغل او الحياه الزوجيه
و يكون الموضوع طريف و مضحك و نابع من تجاربنا الشخصيه

أتمنى الفكره تعجبكم
و انا حبدأ بمواقفى الطريفه :d

و أحنا فى أعدادى اسنان ربنا كتب علينا نشرح حاجات كتير
ضفدعه و صرصار و الاسكارس
انا شخصيه بخاف اصلا من النمله فما بالكم بالضفدعه او الصرصار

المهم
قبل امتحان العملى بيكون فى هجوم على الفراش اللى بينزل البلاليع و يجمع لنا الضفادع و الصراصير
و كأكننا واقفين فى طابور الجمعيه بنشترى اجدعها فرخه
و ده غير غلو الاسعار عن الايام العاديه
و الا يقولك خلصوا معندناش

المهم ضبطت الفراش و نقالى ضفدعه محترمه و الله كبيررررررررررره
و متخدره طبعا علشان بنشرحهها و هى متخدره مش ميته
و اخدت الهانم البيت و لبست الجلفز و دبستها فى طبق التشريح و كانت عملاقه معديه الطبق
ايديها و رجليها بره الطبق
و كنت لوحدى فى البيت
الضفدعه اتدبست و منتظره المارد اللى حيشرحها
و مليت الطبق بالمايه
و مسكت المقص و قصيت جلد البطن و الايدين و لسه بكمل
الآقى الهانم بتشد ايديها و رجليها
انا الرعب نزل فى قلبى و بقيت ارجع لورا
اقول لا اكيد حتموت ده انا فتحاها و مدبساها
و فجاه الاقيها نطت منى فى السقف و انا صراخ و عووووووويل
الجيران افتكروا فى ميت و لا حرامى دخل عندنا
و دى بطنها مفتوحه و احشائها بره و بتنط
المهم دقايق و سكتت عن الحركه و الحمد لله
قبل ما كنت حرمى نفسى من الدور السابع
لانى جبانه موووووووت