السلام عليكم و رحمة الله
واحد صاحبي عنده ارض فاضية مساحتها 165 متر في منطقة سكنية و موقعها مش تجاري
نفسه يعمل فيها مشروع بس مش عارف يعمل ايه ...
لو حد من اعضاء المنتدي الكرام عنده فكره تنفع يا ريت يتفضل بيها علينا و جزاكم الله خيرا.
عرض للطباعة
السلام عليكم و رحمة الله
واحد صاحبي عنده ارض فاضية مساحتها 165 متر في منطقة سكنية و موقعها مش تجاري
نفسه يعمل فيها مشروع بس مش عارف يعمل ايه ...
لو حد من اعضاء المنتدي الكرام عنده فكره تنفع يا ريت يتفضل بيها علينا و جزاكم الله خيرا.
parking احسن و ارخص حل طالما منطقه سكنيه
طيب يا ريت تقولنا هي مكانها فين, و طبيعة شغله الحالي, و الميزانيه الماديه...
هيا مكانها في حدائق المعادي
هو الراجل شغال Software Engineer زي حالاتي
بس نفسه يعمل مشروع من الصفر حتي و لو مش في المهنة بتاعته
كل يوم يكلمني علي الموضوع ده لما صدعت
الميزانية مش عارف لما اسأله
اي افكار اخري ؟
باركنج ....... مفيش تكلفة مبدئية غير بس تمهيد الارض لو مكسرة أوي ..... و مفيش تكلفة شهرية غير اجور السياس و دي كده كده هتيجي من الايراد
انا لو مكانه هقسم الأرض لجزئين جزء هعمله بارك دائم بإيجار شهرى وليكن 100 متر و86 متر الباقين هعملها مغسله واجيب 2 او 3 صنايعيه للغسيل واعمل ركن صغير اكسسوارات ( معطرات على ملمعات على طارات دركسيون على دواسات الحاجات المطلوبه بإستمرار ) بس شرط اساسى لو هتعمل المشروع ده لازم تتباعه بنفسك او تجيب حد قريبك او حد ثقه عشان المشروع ده الى مش فاهمه او مش بيديره بنفسه بيخسر مابيكسبش عشان فى لعب جامد من الصنايعيه
طيب خلينا نناقش فكرة الباركنج طالما اكتر من عضو مصر عليها
الارض مساحتها 165 متر
يعني نفرض مثلا انها تاخد 12 عربية
12 عربية في 80 جنيه ايجار مثلا في الشهر يعني 960 جنيه
اجرة السايس كام 500 مثلا
يعني صافي الايجار 360 جنيه
اعتقد مش مناسب خالص المشروع ده
ده غير وجع الدماغ اللي ممكن ييجي من وراه
ايه رأيكم ؟
طيب ماينفعش تبنيها عمارة كل دور شقة صغيرة.....الارتفاعات والارتدادات ايه نظامها في المنطقة!
انا اقترحت عليه فعلا انه يبنيها
بس هو كده هيبقي مقاول
هو مصمم و عايز يعمل مشروع
ممكن جداا كار كير, و ممكن تتقسم و تبقى محلات (ملابس, اكسسوارات, جالري......) حسب المكان
ممكن كافيه, مطعم............
ممكن يأجر جزء, و يستغل الجزء التاني لحسابه, و ممكن يأجر الأرض كلها و يريح دماغه...
ماهو الفكرة لو الارض في مكان فيه حركة تجارية لو 50 متر هاتبقي تحفة.......انما في الحالة دي احسن حاجة لو مسموح مثلا ب 7 ادوار في 7شقق *120000 علي سبيل المثال....ممكن برده يبنيها لو معاه حتي 10% من تكاليف البناء......زمايل -اصحاب-قرايب هاتتلم بسهولة.
شكرا باشمهندس غازي علي اقتراحك
شكرا استاذ otefa
انا عرضت عليه انه يفتح فيها سوبر ماركت صغير
بس هل تعتقدو انه مربح علي المدي البعيد ؟
عايزين افكار جريئة يا جماعة
احنا شباب و ممكن نعمل اي حاجة :)
أنا لو مكانك هعملها جاليري بصراحه بس لو المكان يسمح, غير كده يبقى محلات مجالاتها متنوعه...
أو تقسمها مجموعه من المحلات, و تأجرها كلها, و هتجيبلك دخل محترم جدا جداا
و ممكن كار كير زي ما قلتلك, و دي فكره ممتازه, و هتقدر تسوق ليها بالاتفاق مع ادارة المنتدى
و الموضوع هينتشر بسرعه جداا, بس بردو لو المكان يسمح لكده, و لو تقدر تصرف في الأول
كل دي أفكار, و منها الجرئ زي ما انت عايز, بس الميزانيه,و المكان هما اللي يحكموك....
على فكره الجراج اللى انا بركن فيه نفس المساحه تقريبا
وبيركن فيه حوالى 12عربيه
وبدفع 100جنيه فى الشهر
وفى طبعا سايس فى الجراج
بس اكيد طبعا المشروع مربح والا كان صاحب الارض
قفلها من زمان وريح دماغه
الغريب كمان انى بلاقى موتوسيكلات راكنه هناك
وحضرتك بتقول انه عاوز يبدأ من الصفر
يعنى مافيش امكانيات لاى مصاريف
يبقى هو ده الحل
باشمهندس غازي تقصد ايه ب جاليري ؟
في فكرة ظريفة بردو, انا بالمناسبة بشتغل في الرياض
عاملين هنا حاجة زي شارع عبد العزيز بس للموبايلات
محلات كتيييير كده جنب بعض و مليانة تجار بيبيعو و يشترو و يصلحو
ايه رأيكم تتقسم الارض محلات صغيرة و تبقي زي سوق للموبايلات مثلا ....
او تتقسم لمحلات صغيرة لكذا نشاط بس يبقي في علاقة بين الانشطة دي, بحيث اللي ييجي المكان يلاقي كل اللي محتاجه ...
الجاليري مش لازم يكون مكان بيتباع فيه تابلوهات او لوح فنيه و الكلام ده... لأ
ممكن جداا يكون للباركيه, و الأسقف, و ورق الحائط, و الستائر الرأسيه, و خلافه....
بس الفكره في التخصصيه, يعني تبقى عارف انت بتبيع ايه و ازاي تسوق...
و فكرة التقسيم لمحلات بنشاطات متنوعه أنا قلتلك عليها, بس انت ما خدتش بالك :colsmil:
ممكن يشغلهم لحسابه, بس هيتكلف مبلغ محترم علشان يقفل و يشطب المحلات دي
و ممكن يقفلهم, و يجهزهم, و يأجرهم اسهل.... هو و امكانياته......
لكن في كل الأحوال, الموضوع هيكون مربح من وجهة نظري...
تقبل تحياتي يا باشا....
حدائق المعادى انا شايف ان سعرها اكيد ممتاز يعنى لو بعها ممكن يجيب بتمنها 3 اضعاف مساحتها فى فيصل مثلا ويفتحها جراج او يبنيها برج بالنص
حديقه للاطفال بها بعض الالعاب البسيطه
وبها أماكن جلوس وكافتيريا صغيره أو كشك حلويات
ويكون دخول الحديقه برسوم او باشتراك شهرى
لو الفكره لاقت استحسان صديقك
انا مستعد اساعده بدون مقابل واشارك معاه بآراء وافكار كتيره
جزاكم الله خيرا يا باشمهندس غازي
كلامك مظبوط ما اخدتش بالي
بس انا قصدي مجموعة محلات صغيرة تبقي زي سوق صغير... اكيد فاهمني
بس انا مش عارف صاحبي ده هيعمل ايه ؟؟؟
لو قرر فعلا انه ينفذ فكرة من اللي ذكرت هنا, كده هيغير مهنته
هيغير مسار حياته بالكامل
هل تغيير المسار ده سهل , لسه هيتعلم تاني و يفهم المشروع اللي هيشتغل فيه ؟
هل لو نجح يبقي كده فعلا اثبت انه ممكن يبقي بيزنس مان و يكمل في مشاريع تانية ؟؟؟؟
تساؤلات كتيير, يا ريت اللي عنده تجربة يشاركنا بيها ....
جزاكم الله خيرا يا دكتور مصطفي
ان شاء الله هقوله و نشوف ...
بس فعلا هل مساحة الارض صغيرة علي مشروع زي ده زي ما دكتور محمد بيقول ؟
مش لازم يكون مشروع ضخم بالشكل ده
ممكن استغلال المساحه بذكاء وحرفيه عاليه يخللى المكان يستوعب 30% اكتر
وعموما فى افكار صغيره زى البلاى ستيشن مثلا
او شاشه كبيره لعرض الرياضه وافلام الكارتون
حاجات كتيره ما تاخدش مساحه وفى نفس الوقت ممتعه للطفل وكمان مربحه لصاحب المشروع
وعموما منتظرين نشوف الموضوع هيوصل لفين
وربنا يوفق الجميع لما يحبه ويرضاه
و الله انا سعيد جدا اني بتعرف بناس افاضل زيكم :)
تشرفنا يا باشمهندس :)
ممكن مركز تجاري متعدد الطوابق ويعرضها للأيجار طويل المدة ويقعد زي الباشا في البيت.
......هو ممكن برده 10 محلات صغيرة *12 متر المحل في كل دور......بس حسب المسوح بيه من استعمالات في المنطقة وعدد الادوار...وها يحتاج سيولة محترمة.
انا نسيت ان المنطقة مش تجارية ...ممكن تبقي عمارة سكنية علي دور واحد الدور هيتكلف حوالي 60-70 الف ج لما يفتري ويبيع المتر ب1000 هيطلع بمكسب محترم.
وممكن الأرض تتقفل بنظام الهناجر وتتأجر كمخزن او يتعمل زي المعارض الصيني كده....هفكر تاني وابقي اقولك.
لو فكرت في موضوع انك تبيعها او تأجرها مخزن قوللي, لأني محتاج مخزن او حتة أرض اعملها مخزن
بس أنا عايز اشتري, و لو ايجار ده هيكون بشكل مؤقت مش أكتر...
و لو تعرف أي حد عنده ارض و عايز يبيع في أي حته, على الدائري, مؤسسة الذكاه, جسر السويس.....
الحتت المحدوفه و البعيده دي, علشان سعر المتر يكون قليل, و في نفس الوقت محتاج مساحه معقوله
فيا ريت تقوللي, لأني محتاجها ضروري جداا, بس المهم السعر زي ما قلت, لأنها مخازن مش أكتر
تقبل تحياتي...
عجبتني اوي فكرة انها تتقفل و تتعمل زي المعارض الصيني, شكرا يا استاذ محمد
باشهمهندس غازي هو للاسف مش عايز يبيعها ...
بردو فكرة انها تبقي مركز تجاري دي جامدة اعتقد تقصد زي التوحيد و النور ؟
مش عارف الحي يسمح بكام دور بناء خليني أسأل صاحبي
بس كده هيتكلف جامد بناء
اعتقد الاساسات و الدور الارضي يعدي 120000
و كل دور مثلا 60000
يعني بتتكلم في حسبة نص مليون جنيه مثلا ل 6 ادوار
بس بصراحة بعد كده هيستريح لو نفع المشروع ده ...
طيب مايشوف مقاول ويشترك معاة بالارض والمقاول بالمبانى والتشطيب ويبينها عمارة سكنية والشقق بالنص
ويأجر نصيبة ويبقى عندة دخل ثابت يقدر يزودة فى اى وقت
لو قلنا ان الدور شقتين
ومتوسط 5 ادوار
يعنى كل واحد نصيبة 5 شقق
بالنسبة لفكرة انها تكون عمارة سكنية وياجرها ديه فكرة كويسة جدا بس فى نقطة مهمة لازم ياخد باله منها
ان لو الارض ديهفى منطقة الحي بيعتبرها عشوائيات يبقى كده صعب اوى الايام ديه انه يبنيها لان الحى مش هيسيبك تبنيها بسهولة الا لو دفعت مبلغ وقدرة
وبرده لو قدرت تبنيها مش هتعرف خالص تدخل كهرباء دلوقتى ابدا لان ده صعب جداااا فى المناطق العشوائية
اخر حاجة وانت بتفكر تعمل اى مشروع على الارض ديه لازم تحط فى دماغك ان المشروع ده كتوقع انه يكسبك احسن من انك تبيع الارض فاضية والا توفرالتعب من الاول وتبيع