إقتراح لتنمية المجتمع..(حملة نايل موتورز لردم الحفر)

نظراً لإنشغال الإدارة العامة للطرق و الكبارى فى المشروع القومى لرصف الصحراء الغربية و بحر الرمال...
ومن باب مساهمة المنتدى فى تنمية المجتمع
و بعد الفشل الذريع اللى أنا وصلته فى إيجاد 3 طرق رئيسية داخل القاهرة ليس بها حفر أو نقر أو بلاعات مفتوحة أو مقلوبة الغطاء...

عندى إقتراح.....

حملة نايل موتورز لردم الحفر...

1- نجيب تصريح من محافظة القاهرة بالإضافة لتوفير مهندس مصاحب من المحافظة..
طبعاً الموضوع ده مستفيد منه برده الأعضاء اللى فى المحافظات الأخر علشان محدش يقول اشمعنا القاهرة كل الناس اللى جاية القاهرة بتعدى على كوبرى أكتوبر و صلاح سالم و الأوتوستراد...

2- نوفر عربية رمل نص نقل بالجهود الذاتية (متفهمنيش غلط يا أستاذ كريم...مش هانلم فلوس...)
أكيد فى حد من الأعضاء له قريب مقاول أو يقدر يوفرلنا العربية ديه بسهولة.

3- عمل يافطة كبيرة مكتوب عليها (حملة نايل موتورز لتنمية المجتمع و ردم الحفر) و دية على حسابى أنا و الله

4- كل عضو يدخل يقول كل الحفر اللى بيعدى عليها كل يوم و نعمل حصر بيها.

5- لو فشلنا أو المحافظة أصرت على زخرفة الطرق بالحفر و البلاعات يبقى أحنا عملنا اللى علينا

و ده من باب إماطة الأذى عن الطريق...


عَنْ أَبِي هُرَيْرَةَ أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ :
( بَيْنَمَا رَجُلٌ يَمْشِي بِطَرِيقٍ وَجَدَ غُصْنَ شَوْكٍ عَلَى الطَّرِيقِ فَأَخَّرَهُ فَشَكَرَ اللَّهُ لَهُ فَغَفَرَ لَه)

عن أَبي بَرْزَةَ الأسلمي قَالَ : قُلْتُ يَا نَبِيَّ اللَّهِ عَلِّمْنِي شَيْئًا أَنْتَفِعُ بِهِ قَالَ : ( اعْزِلْ الْأَذَى عَنْ طَرِيقِ الْمُسْلِمِينَ ) .
رواه مسلم ( 1915 ) .