أسئلة عن ال Optra & Elantra ?!!

السلام عليكم و رحمة الله
دي أول مشاركة لي في المنتدي الرائع بجد , فشوية سعة صدر منكم لو سمحتوا
الموضوع مش مكرر أنا بس عندي بعض الاسئلة عن الاوبترا و الانترا لاني بقارن بينهم و ربنا يسهل كده و أجيب واحدة فيهم.
كل معلوماتي عنهم من المنتدي بس لما لقيت تعارض حبيت أتاكد بشك قاطع بالرد علي الاسئلة دي
و يا ريت مستر حسام أوبتراوي يكون موجود معانا لاني بجد معجب بي جدا مش بس لدقة معلوماتة ولكن كمان لاسلوبة السلس المقنع, و يريت يكون في حسام ألنتراوي كمان عشان يشارك معانا ",)

1)الانترا:
أ)هي فعلا بتهبط أوي و بتحك في كل مطبات البلد لو أربعة ولا خمسة ركبين "بدون أحمال أضافية في الشنطة"؟!!
ب)هل قطع الغيار متوفرة خارج التوكيل " كان في موضوع مكتوب فية أن الكبالن مش موجودة غير في التوكيل وب 5000 جنيه"؟
ج)ما مدى أتزان السيارة مع السرعات -لغاية 150 مثلا لان متهيالي أكثر من كدة أنتحار-مقارنة مع الاوبترا.

2) الاوبترا:
A) هل فعلا أستهلاك الوقود للاوبترا " و شفرولية عموما" أكثر من الهيونداي ألنترا؟
b) هل فعلا قطع غيار الاوبترا "دائمة الاستهلاك زي تيل الفرامل وفلاتر البنزين والهواء " في شفرولية عموما" أغلي من الهيونداي ألنترا؟
c) هل فعلا عفشة الاوبترا أفضل من الالنترا؟

شكرا لكم مرة تانية علي سعة صدركم و مسني ردودكم بالجواب اليقين أن شاء اللة ...

انا امتلكت السيارتين كان معايا اوبترا 2009 وبعتها فى يناير 2010 وجبت النترا 2010 واقدر اجاوبك لانى جربت الاتنين
بداية ماحدش ينكر ان الاوبترا عربية كويسة جدا وصدقنى كاداء انا شايف انها ماتقلش عن البوما اللى ماليه الدنيا .
انما بعد قيادة الالنترا لمدة 4 شهور الالنترا افضل كتير من الاوبترا

وعليكم السلام ورحمة الله وبركاته

اقتباس:

---

1)الانترا:
أ)هي فعلا بتهبط أوي و بتحك في كل مطبات البلد لو أربعة ولا خمسة ركبين "بدون أحمال أضافية في الشنطة"؟!!

---

ايوه فعلا ودى حاجه كل ملاك الالنترا أجمعوا عليها

اقتباس:

---

ب)هل قطع الغيار متوفرة خارج التوكيل " كان في موضوع مكتوب فية أن الكبالن مش موجودة غير في التوكيل وب 5000 جنيه"؟

---

والله معنديش معلومه أكيده , بس المفروض انها عربيه منتشره وبتتباع من سنة 2006 وكل قطع غيارها منتشره برا التوكيل فى كل حته

اقتباس:

---

ج)ما مدى أتزان السيارة مع السرعات -لغاية 150 مثلا لان متهيالي أكثر من كدة أنتحار-مقارنة مع الاوبترا.

---

دى يجاوبك عليها ملاك الالنترا , وبالنسبه للاوبترا ثباتها معقول على السرعه دى

والثبات فى الاول والاخر مسأله نسبيه ترجع لتقديرك ويتدخل فيها عوامل كتير زى الطريق واتجاه الهوا والعربيه نفسها طبعا

اقتباس:

---

2) الاوبترا:
A) هل فعلا أستهلاك الوقود للاوبترا " و شفرولية عموما" أكثر من الهيونداي ألنترا؟

---

معرفش اكتر من الالنترا ولا لأ

بس الاوبترا استهلاكها عادى زى اى عربيه 1600

انا عربيتى اوتوماتيك بتعمل متوسط 100 كم لكل 10 لتر

وعلى الطرق المفتوحه مع سرعه مش عاليه ممكن توصل لاكتر من 130 كم لكل 10 لتر

اقتباس:

---

b) هل فعلا قطع غيار الاوبترا "دائمة الاستهلاك زي تيل الفرامل وفلاتر البنزين والهواء " في شفرولية عموما" أغلي من الهيونداي ألنترا؟

---

اعتقد ان الاوبترا هى اللى قطعها أرخص

اغلى تيل فرامل للاوبترا موجود فى التوكيل ب 220 جنيه وممكن تجيبه من برا ب 160 تقريبا

تيل الالنترا فى التوكيل ب 315 معرفش برا بكام

الاوبترا فلتر بنزين ب 39 فلتر هوا ب 48

الالنترا فلتر بنزين ب 80 وفلتر هوا ب 45

اقتباس:

---

c) هل فعلا عفشة الاوبترا أفضل من الالنترا؟

---

دى حاجه مقدرش أحكم عليها

اللى اقدر اقوله ان العربيتين نفس نظام التعليق وهو نظام محترم

والاوبترا بصفه عامه عفشتها قويه والعربيه عموما اعلى من الالنترا ومش بتوطى زيها

________________

رأيى النهائى

الفرق بين العربيتين حاليا حوالى 5 او 6 الاف

لو مايفرقش معاك فرق المبلغ , ومايفرقش معاك ان الالنترا هاينزل منها شكل جديد

هات الالنترا

مش باقولك كدا عشان هى افضل من الاوبترا , لأ عشان هى عربيه احدث كتصميم واقوى كموتور وشكلها احلى اكيد من جوا وبرا

وبصراحه مقارنتها بالاوبترا ظلم للاوبترا لان الاوبترا مصممه من 2003 لكن الالنترا من 2006 يعنى فى فرق اجيال

المفروض الاوبترا تتقارن بالالنترا القديمه

بالتوفيق

النترا افخم واسرع واشيك بكتير....بس برضه بص على الكروز

اقتباس:

---

النترا افخم واسرع واشيك بكتير....بس برضه بص على الكروز

---

انا موافق حضرتك على نص الراى بس فى الانترا بس مش موافقك فى الكروز مع انى عارف انها عربيه محترمه و ثابته و شيك جدا بس موتورها ضعيف شويه بالنسبه لحجمها و السببين الاساسيين كترة الشكاوى منها فى انها بتبطل و هى ماشيه وانها تغور من وش منصور

الاوبترا تغور من وش منصور و الانترا تغور من وش غبور!!!

كيا سيراتو او رينو فلونس او ميتسوبيشي شارك او فيات لينيا بدائل كويسه للعربيتين دول و في فاو بيسترن عربيه بشاسيه و عفشة مازدا 6 ( مش 3 ) و موتور الجيتا ال 1600 و ب 99 الف مايوال و 109 الف ستيبترونيك!! ( عربيه في الجون و جووجل عنها و توكيلها في المعادي و مش حتندم و الله ) ممكن تدور FAW Besturn

ده رابط بيشرح الشركه المصنعه
China FAW Group Corporation - Wikipedia, the free encyclopedia

دي تفاصيل موجزه عن البيسترن
FAW Besturn (Chinese: 一汽奔腾; pinyin: Yīqì Bēnténg) is a sedan series of First Automobile Works.
The Besturn B70 made its debut in 2006. It shares the chassis, powertrain, suspension and a lot of components with Mazda 6 MKI. It had a facelift in 2009.
The Besturn B50 model made its debut in 2009. It is derived from the B70 model while retaining the chassis and suspension design, but the powertrain has been replaced by the Volkswagen products with a 1.6L L4 engine and MQ200 5 speed manual gearbox/6 speed automatic gearbox to lower the price.

اقتباس:

---

المشاركة الأصلية كتبت بواسطة zahaan

انا موافق حضرتك على نص الراى بس فى الانترا بس مش موافقك فى الكروز مع انى عارف انها عربيه محترمه و ثابته و شيك جدا بس موتورها ضعيف شويه بالنسبه لحجمها و السببين الاساسيين كترة الشكاوى منها فى انها بتبطل و هى ماشيه وانها تغور من وش منصور

---

الصراحه بحبها عن السيراتو....:F_eyeb1[1]:

لا هو الموضوع ان مش كل الكروز بتبطل ولا كلها بينطبق عليها العيب دة...دى حجات فرديه...السيراتو ياما اتقال عليها كلام مش تمام....وفى ناس بتشكر فيها كتير...والكروز سحبها حلو جدا وموتورها كويس مش ضعيف والثبات ممتاز

على فكرة ماتور الكروز مش صغير عليها و هو تقريبا 107 و دة الصافى
و انما السيراتو 124 و دة المجمل بتاع الماتور لو حسبوا الصافى هيطلع زى الكروز و يمكن اقل
لان اغلى العربيات الكورى بتحسب مجمل قوة الماتور مش الصافى زى اليابانى و الالمانى علشان تحلى عربيتها

شكرا يا جماعا ... انا الحمد لله حسمت الفرار بالانترا
و شكر خاص لمستر حسام...ناقص بش شوية تزبيطات مادية كدة أدعولي أن شاء الله ربنا يكرمني زي ما انا بدعلكوا ربنا يكرمكوا

فعلا المقارنة كانت صعبة و دة لان في نظري الاوبترا عربية محترمة جدا و أعتقد أنها أفضل في بعض الجوانب من الانترا و لكن الافر اول كان اصالح الانترا ...ممكن فعلا الاصح مقارنتها مع الانترا القديمة بس دة كان من 3 او 4 سنين طدة و اعتقد أنها كانت هتبقي مقارنة ضرب نار
",)

اقتباس:

---

لان اغلى العربيات الكورى بتحسب مجمل قوة الماتور مش الصافى زى اليابانى و الالمانى علشان تحلى عربيتها

---

ده على اساس ان الكروز المانى او يابانى مش كورى برضه

يا جماعة انا قعدت محتار سنة كاملة ؟ واستقريت ع الالنترا 2010 واشتريتها والحمد لله بقالها معايا شهر وما شاء الله 100 %

اقتباس:

---

المشاركة الأصلية كتبت بواسطة backman

شكرا يا جماعا ... انا الحمد لله حسمت الفرار بالانترا
و شكر خاص لمستر حسام...ناقص بش شوية تزبيطات مادية كدة أدعولي أن شاء الله ربنا يكرمني زي ما انا بدعلكوا ربنا يكرمكوا

---

ربنا يكرمك ويوفقك وتخلصها على خير

اولا مبروك عليك الشراء مقدما
بس انا ليا رأيي في المقارنه بين الاوبترا و الالنترا
الاوبترا ثباتها عالي جدا جدا و افضل من السراتو و الالنترا و ده لأن وزنها حوالي طن و ربع و موتورها متوافق مع وزنها و معروف الشركه المصنعه للموتور و هو موتور يعتبر بتكنولوحيا المانيه
و نفس الشركه Etech كانت عامله موتور الاوبل استرا و الفيكترا
قطع الغيار بالنسبه للاوترا ارخص و ده لأن نفس موتورها هو موتور النوبيرا اللي منتشره بشكل كبير في مصر و لكن الاكسسوارات اكيد اغلي شويه من النوبيرا لكن مش اغلي من الالنترا .
السعر للاوبترا اقل من الالنترا
عيوب الاوبترا بس ان مافيهاش وسائل امان زي الabs و الايرباج و ان كان في مواصفه بتنزل بس مش منتشره أوي

الالنترا من العيوب المعروفه جدا فيها هي الثبات السئ جدا علي السرعات العاليه
قطع الغيار اغلي شويه بس مش فرق كبير
الباور بتاعها سمعت انه كهربا و مش بيقفل مع السرعه و ده خطر - معلومه سمعيه -
اول فئه مافيهاش بردوا لا ايرباج و لا abs لكن الخليجي بينزل فيه
الميزه في الوكيل القوي و هو غبور و خدمته كويسه جدا لكن بردوا المنصور قوي لكن خدماته مش بنفس الكفاءه

و عشان انا سقت الاتنين برشح الاوبترا :E_braces[1]:

اقتباس:

---

المشاركة الأصلية كتبت بواسطة motoman

اولا مبروك عليك الشراء مقدما
بس انا ليا رأيي في المقارنه بين الاوبترا و الالنترا
الاوبترا ثباتها عالي جدا جدا و افضل من السراتو و الالنترا و ده لأن وزنها حوالي طن و ربع و موتورها متوافق مع وزنها و معروف الشركه المصنعه للموتور و هو موتور يعتبر بتكنولوحيا المانيه
و نفس الشركه etech كانت عامله موتور الاوبل استرا و الفيكترا
قطع الغيار بالنسبه للاوترا ارخص و ده لأن نفس موتورها هو موتور النوبيرا اللي منتشره بشكل كبير في مصر و لكن الاكسسوارات اكيد اغلي شويه من النوبيرا لكن مش اغلي من الالنترا .
السعر للاوبترا اقل من الالنترا
عيوب الاوبترا بس ان مافيهاش وسائل امان زي الabs و الايرباج و ان كان في مواصفه بتنزل بس مش منتشره أوي

الالنترا من العيوب المعروفه جدا فيها هي الثبات السئ جدا علي السرعات العاليه
قطع الغيار اغلي شويه بس مش فرق كبير
الباور بتاعها سمعت انه كهربا و مش بيقفل مع السرعه و ده خطر - معلومه سمعيه -
اول فئه مافيهاش بردوا لا ايرباج و لا abs لكن الخليجي بينزل فيه
الميزه في الوكيل القوي و هو غبور و خدمته كويسه جدا لكن بردوا المنصور قوي لكن خدماته مش بنفس الكفاءه

و عشان انا سقت الاتنين برشح الاوبترا :e_braces[1]:

---

انا باختلف مع حضرتك فى معظم النقاط اللى اتكلمت فيها ... حضرتك بتقول انك سقت الاتنين
انا امتلكت الاتنين ومش هاقول ان الاوبترا عربية سيئة .. بالعكس الاوبترا عربية كويسة جدا ماشفتش منها حاجات وحشة باستثناء جزئية ضعف الصاج فى منطقة السقف والكبوت والصوت اللى كان بيصدر من الطارة والعربية باردة بالاضافة انى لما كنت بمشى بسرعة فى وجود رياح كان الكبوت بيتهز واحس انه هايتخلع ويضرب فى الزجاج الامامى غير كدة العربية كويسة
نيجى للالنترا تقريبا العربية بتتفوق فى كل شىء عن الاوبترا .. الشكل .. قوة الموتور .. استهلاك البنزين .. النعومة .. الباور بتاعها هايل وافضل كتير من الاوبترا وفعلا الباور بتاعها بيتقل مع السرعات ..اما الثبات بتاع العربية فهو ممتاز لغاية 150 كم/ساعة واعتقد ان ده ممتاز فى الفئة السعرية دى وممكن يكون بيتفوق قليلا عن ثبات الاوبترا
انا طبعا مابقللش من الاوبترا بس انا رديت فقط احقاقا للحق ... اسف للاطالة

اقتباس:

---

المشاركة الأصلية كتبت بواسطة MoToMaN

اولا مبروك عليك الشراء مقدما
بس انا ليا رأيي في المقارنه بين الاوبترا و الالنترا
الاوبترا ثباتها عالي جدا جدا و افضل من السراتو و الالنترا و ده لأن وزنها حوالي طن و ربع و موتورها متوافق مع وزنها و معروف الشركه المصنعه للموتور و هو موتور يعتبر بتكنولوحيا المانيه
و نفس الشركه Etech كانت عامله موتور الاوبل استرا و الفيكترا
قطع الغيار بالنسبه للاوترا ارخص و ده لأن نفس موتورها هو موتور النوبيرا اللي منتشره بشكل كبير في مصر و لكن الاكسسوارات اكيد اغلي شويه من النوبيرا لكن مش اغلي من الالنترا .
السعر للاوبترا اقل من الالنترا
عيوب الاوبترا بس ان مافيهاش وسائل امان زي الabs و الايرباج و ان كان في مواصفه بتنزل بس مش منتشره أوي

الالنترا من العيوب المعروفه جدا فيها هي الثبات السئ جدا علي السرعات العاليه
قطع الغيار اغلي شويه بس مش فرق كبير
الباور بتاعها سمعت انه كهربا و مش بيقفل مع السرعه و ده خطر - معلومه سمعيه -
اول فئه مافيهاش بردوا لا ايرباج و لا abs لكن الخليجي بينزل فيه
الميزه في الوكيل القوي و هو غبور و خدمته كويسه جدا لكن بردوا المنصور قوي لكن خدماته مش بنفس الكفاءه

و عشان انا سقت الاتنين برشح الاوبترا :E_braces[1]:

---

انت بتتكلم بجد ولا بتهزر:fun_36_3_4[1]::8954[1]:

اقتباس:

---

المشاركة الأصلية كتبت بواسطة ahmed_nubira

انت بتتكلم بجد ولا بتهزر:fun_36_3_4[1]::8954[1]:

---

اعتقد ما فيش سبب يخليني اهزر مع حضرتك
انا بتكلم عن تجربه و اراء ناس كتير جدا و يا ريت تحددلي ايه الجزء اللي انت شايفني بهزر فيه
مشكور مرورك

اقتباس:

---

المشاركة الأصلية كتبت بواسطة just_magdy1

انا باختلف مع حضرتك فى معظم النقاط اللى اتكلمت فيها ... حضرتك بتقول انك سقت الاتنين
انا امتلكت الاتنين ومش هاقول ان الاوبترا عربية سيئة .. بالعكس الاوبترا عربية كويسة جدا ماشفتش منها حاجات وحشة باستثناء جزئية ضعف الصاج فى منطقة السقف والكبوت والصوت اللى كان بيصدر من الطارة والعربية باردة بالاضافة انى لما كنت بمشى بسرعة فى وجود رياح كان الكبوت بيتهز واحس انه هايتخلع ويضرب فى الزجاج الامامى غير كدة العربية كويسة
نيجى للالنترا تقريبا العربية بتتفوق فى كل شىء عن الاوبترا .. الشكل .. قوة الموتور .. استهلاك البنزين .. النعومة .. الباور بتاعها هايل وافضل كتير من الاوبترا وفعلا الباور بتاعها بيتقل مع السرعات ..اما الثبات بتاع العربية فهو ممتاز لغاية 150 كم/ساعة واعتقد ان ده ممتاز فى الفئة السعرية دى وممكن يكون بيتفوق قليلا عن ثبات الاوبترا
انا طبعا مابقللش من الاوبترا بس انا رديت فقط احقاقا للحق ... اسف للاطالة

---

اولا اشكرك علي اسلوبك الراقي في الرد
ثانيا انا معك انا الالنترا تتفوق في الشكل و قوة الموتور و استهلاك البنزين نسبيا و النعومه و لم اقل غير ذلك في مشاركتي ابدا و جزئية الثبات دي معروفه عن الالنترا و كل مقارنتي كانت مبنيه علي الثبات و قطع الغيار و الصيانه السهله و السعر و تكنولوحيا الموتور
و اعلم ان الالنترا موتورها اقوي 121 حصان و الاوبترا 109 حصان لكن انا قلت ان الموتور متوافق مع وزن العربيه
و علي فكره انا شفت فيديوهات للالنترا علي سرعه 200 كم مش 150 لكن ثبات العربيه بيتم الحكم عليه من خلال المناورات و التخطي و الملفات
و من ناحيه تانيه بردوا قوة الموتور لازم تكون متوافقه مع وزن السياره و لا يعني قوة الموتور ان السياره افضل لكن في الالنترا وزن اقل و قوة موتور اعلي من اسباب عدم اتزانها و دي مشكله عامه في كل الهيونداي مش في الالنترا بس
و بالنسبه للنعومه فعفشة الاوبترا هي انشف شويه لكن نشوفية العفشه بتكون ميزه للبعض

و اخيرا احنا كلنا بنشارك مش عشان تضليل حد و لكن كلنا بنشارك احقاقا للحق طبعا و اختلاف وجهات النظر أو الاراء لا يضر و المشاركات كلها لتعم الفائده لا اكثر
تحياتي

اقتباس:

---

المشاركة الأصلية كتبت بواسطة just_magdy1

نيجى للالنترا تقريبا العربية بتتفوق فى كل شىء عن الاوبترا .. الشكل .. قوة الموتور .. استهلاك البنزين .. النعومة .. الباور بتاعها هايل وافضل كتير من الاوبترا وفعلا الباور بتاعها بيتقل مع السرعات ..

---

دة الكلام المعقول والمعروف

اقتباس:

---

المشاركة الأصلية كتبت بواسطة motoman

اعتقد ما فيش سبب يخليني اهزر مع حضرتك
انا بتكلم عن تجربه و اراء ناس كتير جدا و يا ريت تحددلي ايه الجزء اللي انت شايفني بهزر فيه
مشكور مرورك

---

اعذرنى اصلك عكست كل حاجه....

الالنتر ثباتها مش سىء...وغبور مش توكيل قوى ولا منصور قوى

مشكور ليك

اقتباس:

---

المشاركة الأصلية كتبت بواسطة motoman

اولا اشكرك علي اسلوبك الراقي في الرد
ثانيا انا معك انا الالنترا تتفوق في الشكل و قوة الموتور و استهلاك البنزين نسبيا و النعومه و لم اقل غير ذلك في مشاركتي ابدا و جزئية الثبات دي معروفه عن الالنترا و كل مقارنتي كانت مبنيه علي الثبات و قطع الغيار و الصيانه السهله و السعر و تكنولوحيا الموتور
و اعلم ان الالنترا موتورها اقوي 121 حصان و الاوبترا 109 حصان لكن انا قلت ان الموتور متوافق مع وزن العربيه
و علي فكره انا شفت فيديوهات للالنترا علي سرعه 200 كم مش 150 لكن ثبات العربيه بيتم الحكم عليه من خلال المناورات و التخطي و الملفات
و من ناحيه تانيه بردوا قوة الموتور لازم تكون متوافقه مع وزن السياره و لا يعني قوة الموتور ان السياره افضل لكن في الالنترا وزن اقل و قوة موتور اعلي من اسباب عدم اتزانها و دي مشكله عامه في كل الهيونداي مش في الالنترا بس
و بالنسبه للنعومه فعفشة الاوبترا هي انشف شويه لكن نشوفية العفشه بتكون ميزه للبعض

و اخيرا احنا كلنا بنشارك مش عشان تضليل حد و لكن كلنا بنشارك احقاقا للحق طبعا و اختلاف وجهات النظر أو الاراء لا يضر و المشاركات كلها لتعم الفائده لا اكثر
تحياتي

---

انا اللى متشكر على اهتمامك وردك واحنا كلنا فى المنتدى بنتعلم من بعض وصدقنى مافيش عربية فى الفئة السعرية اللى احنا بنتكلم فيها خالية من العيوب وكل واحد فينا ممكن يضحى بشىء علشان ياخد قصاده شىء اخر يعنى واحد ممكن يضحى بجزئية الثبات علشان مثلا يهمة الشياكة او جودة التقفيل وهكذا وانا برضه بتفق مع حضرتك فى جزئية ان الالنترا كان افضل ان يكون وزنها اتقل من كده بس تقريبا هيونداى ضحت بالجزئية دى علشان موضوع استهلاك البنزين .

اقتباس:

---

المشاركة الأصلية كتبت بواسطة ahmed_nubira

دة الكلام المعقول والمعروف

---

هو انا كلامي كلام مجانين يعني
من الواضح ان حضرتك راجل مثقف لو فعلا مهندس و لازم تتعلم ازاي تتقبل النقاش و الرأي المخالف ليك

اقتباس:

---

المشاركة الأصلية كتبت بواسطة ahmed_nubira

اعذرنى اصلك عكست كل حاجه....

الالنتر ثباتها مش سىء...وغبور مش توكيل قوى ولا منصور قوى

مشكور ليك

---

وجهات نظر بالنسبه للثبات
لكن غبور معروف انه افضل وكيل بالنسبه للسيارات في مصر

تقبل مروري

اقتباس:

---

المشاركة الأصلية كتبت بواسطة just_magdy1

انا اللى متشكر على اهتمامك وردك واحنا كلنا فى المنتدى بنتعلم من بعض وصدقنى مافيش عربية فى الفئة السعرية اللى احنا بنتكلم فيها خالية من العيوب وكل واحد فينا ممكن يضحى بشىء علشان ياخد قصاده شىء اخر يعنى واحد ممكن يضحى بجزئية الثبات علشان مثلا يهمة الشياكة او جودة التقفيل وهكذا وانا برضه بتفق مع حضرتك فى جزئية ان الالنترا كان افضل ان يكون وزنها اتقل من كده بس تقريبا هيونداى ضحت بالجزئية دى علشان موضوع استهلاك البنزين .

---

انا بتفق معاك 100% في كل كلمه فعلا
كل سياره اكيد فيها ميزه و عيب طبعا و كل حوارنا مش بيجزم بافضليه مطلقه لأي سياره عن اخري
لكنها مقارنه فقط

سعيد بالحوار معاك تقبل احترامي و تقديري

اقتباس:

---

المشاركة الأصلية كتبت بواسطة MoToMaN

هو انا كلامي كلام مجانين يعني
من الواضح ان حضرتك راجل مثقف لو فعلا مهندس و لازم تتعلم ازاي تتقبل النقاش و الرأي المخالف ليك


وجهات نظر بالنسبه للثبات
لكن غبور معروف انه افضل وكيل بالنسبه للسيارات في مصر

تقبل مروري

---

ياباشا هو انا شتمتك ولا رفعت عليك قضيه
ياسيدى محدش قال ان كلامك كلام مجانيين..وانا بتناقش معاك مش اكتر...وانت مقتنع ان غبور افضل توكيل برحتك....وبرضه انا شايف انا كلام مجدى معقول ومعروف:satelite:

يا باشمهندس انت ماتناقشتش اصلا ده انت كل مشاركاتك معايا يدوب كلمتين و خلاص و ابتسامات
عموما انا كمان باتفق مع كلام مجدي جدا لأنه كلام معقول فعلا
سلام يا هندسه فرصه سعيده

الالنترا مريحه في السواقه والقعده اكتر من الاوبترا وعفشتها اطري من الاوبترا بس استهلاكها للبنزين اكتر شويه من الاوبترا وثباتها ضعيف بالنسبه للاوبترا

اقتباس:

---

المشاركة الأصلية كتبت بواسطة hardman20060

الالنترا مريحه في السواقه والقعده اكتر من الاوبترا وعفشتها اطري من الاوبترا بس استهلاكها للبنزين اكتر شويه من الاوبترا وثباتها ضعيف بالنسبه للاوبترا

---

الالنترا استهلاكها للبنزين اقل من الاوبترا وثباتها مايقلش عن الاوبترا بل يتفوق عليها

النترا و ده رأيى

انا من رايي ان حكايه الثبات دي مهمه جدااااااا بس مش في مصر كفايه الشوارع الي انتوا عارفينها المقارنه بقي تبقي علي استهلاك الوقود والبنزين وقطع الغيار المتوفره

السلام عليكم
انا انشاء الله ناوى اشترى عربية
و بصراحة انا عايز اجيب النترا علشان عائلية و الناس كلها بتشكر فيها
الافضل ايه الالنترا 2011 (الشكل القديم ) ولا الاوبترا
فياريت تفيدونى
شكراااااااااااااااااا

اقتباس:

---

المشاركة الأصلية كتبت بواسطة hawary2

السلام عليكم
انا ان شاء الله ناوى اشترى عربية
و بصراحة انا عايز اجيب النترا علشان عائلية و الناس كلها بتشكر فيها
الافضل ايه الالنترا 2011 (الشكل القديم ) ولا الاوبترا
فياريت تفيدونى
شكراااااااااااااااااا

---

لو شوفت نتيجة الاستطلاع هتلاقي الالنترا مكتسحة طبعا ، بس حط في حسابك إن فيه فرق محترم في السعر