الموضوع: أخر أخبار صحراوي إسكندرية

أنا كنت يوم 24 فى أسكندرية وأتحركت الساعة 6.30 صباحا والطريق كان وحش جدا بالذات القديم مليان مطبات ومدغدغ جامد وبالذات فى نصف الطريق تقريبا وكنت ملتزم وماشى على 100 فى طريق الذهاب وعند التحويلات كان من الطبيعى أنى أهدى علشان الملف والمطبات لكن كانت أحيانا أكتر من 60 بس الحمد لله ما كنش فى لجان أو رادار فى طريق الذهاب
نيجى بقى لطريق العودة كان فى حتة من الطريق القديم فى النصف المسافة بردة مدغدغة والطريق كان كلة ظلمة كحل ما فيش أى أنوار غير نور العربية وستر ربنا قبل كل شىء بس بصراحة العواكس على الحتت الجديدة كانت مظبطة الواحد شوية كأنها نور فى الآرض لكن طبعا الحتت القديمة ما فيش لا فواصل بين الخانات ولا نور على الطريق وكانت كل العربيات بتجرى بسرعة تتعدى 120 وأنا كنت ماشى شوية 100 وشوية 110 أو 120 بس مش أقل من 100 خالص وكانت أغلب العربيات ماشية فوق 120 والوصلات الجديدة كانت بصراحة حلوة ومشجعة قوى للزيادة يعنى لو كان فى نور على الطريق الجديد هتلاقى كلة فوق 120 واللى يمشى أقل هيطير من على الطريق
المشكلة بقى النقل كان على الطريق الجديد مخلية ضيق وأحيانا كان بيبقى قافل الطريق والملاكى مش عارف يمشى أو يعدى منة
الساعة كانت من 6 : 9 مساءا وما شفتش رادار ولا ونش يمكن كانوا موجودين وأنا ما شوفتهومش لآن الطريق كان ظلمة والواحد كان ماشى بالعافية وبقول ربنا يستر وما كنش فى لجان ومعرفش بقى أنا أتخدت مخالفة ولا لآ وهتروحلى على الملف ولا لآ بس بصراحة الحتت الجديدة صعب قوى الواحد يمشى عليها أقل من 100 المفروض أقل حاجة 120 لآنة ضيق وكمان علية نقل سريع الواحد كان بيحاول يهرب من النقل بسرعة وسهل جدا فى الظلمة دية يحصل حوادث بالهبل بالذات
كان فية نقل كتير ورجالة ونساء وكلة كان بيعدى من أماكن سريعة بطريقة غريبة كأنهم مش خايفين على نفسهم وكمان فى الظلمة يعنى كان الواحد ماشى بستر ربنا والحمد للة وربنا يسترها علينا جميعا
بس فى حتت كتيير قوى ما تعملتش وما أعتقدش هتخلص فى الصيف نهائى مش أقل من 6 شهور أقل حاجة أن ما كنش سنة كمان
والله المستعان