الموضوع: طلب مساعده عاجله من عصابه الأوبل

مفيش توكيلات فاتحة بعد الساعة 5
لو عايز التوكيل يبقى روح يوم تانى من الصبح بس روح النهاردة خد فكرة مبدئية عن العربية وحالتها لو عجبتك اتفق معاة على يوم تانى للتوكيل

معاينة النهاردة اسمها المعاينة المبدئية اللى من خلالها بتشوف نفسك مرتاح مع العربية و لا لآ
و بكرة ان شاء الله لازم التوكيل
لو كلام الراجل ما بيقولك انها كذا و كذا و كذا يبقى مش هيخاف من مشوار التوكيل
و لو كان مش صادق فى كلامة اول ما هيسمع سيرة التوكيل هيجيلة بلة مغولى فى الحال
اسمع الكلام و بلاش تتسرع و تشرب عربية
الحكاية مش مستحملة
و ربنا يوفقك

شكرا يا شباب على ردودكم الجميله
أنا رحت النهارده و اتفرجت على العربيه بس ما طلعتش زي ما بيقول صاحبها

مبدئيا هو تاجر و عامل نفسه أنه صاحب العربيه و لسه شاريها و هيبيعها عشان جاب عربيه تانيه
عشان كده العربيه عقدها مش باسمه
تاني حاجه العربيه التانيه اللي معاه اللي هو ساب الأوبل عشانها تخيلوا ايه؟؟؟
جولف 1 (اديني عقلك)
الظريف في الموضوع أنه سبحان الله وقع بلسانه و قال أنا ببيع 3 عربيات دلوقتي
و من ضمنهم الجولف اللي هو راكبها
و لما سألته حد يبيع 3 عربيات في وقت واحد هو أنت و الأسره مهاجرين و لا حاجه؟
حس أنه غلط في الكلام و وقع فقعد يتوه الموضوع

المهم طلعت العربيه رشه بره كلها بس الدواخل فابريكه و كان كلامه معايا أن العربيه فابريكه بره و جوه
و فضل مصمم أن العربيه فابريكه بره و ان مش عارف مين شاف العربيه و كان معاه شيوخ الصنايعيه و قالو أن العربيه فبريكه بره
و مش عارف دكتور مين تاني شافها و كان معاه بردو بتاع دوكو و قال أنها فابريكه بره و مين تالت و مين رابع
المهم انا كان معايا صنايعي بتاع دوكو و قعد يوريله أماكن الرش و بعد فتره من الجدال قال نعتبر العربيه رشه بره
بصراحه الولد بتاع الدوكو اللي معايا ولد ناصح قاله لأ ما نعتبرش هي فعلا رشه بره كلها بالكامل
و فعلا الراجل عمل عبيط و قال ممكن تكون رشه بره
شغل تجار و عامل نفسه مش فاهم حاجه

قلت طيب نتفق على سعر على اساس أن العربيه زي ما أنت بتقول مش محتاجه مليم مصاريف
لحد ما نروح و نكشف عليها بكره عفشه و ميكانيكا و كهربا و كمبيوتر

هو كان طالب 65 بس ده على اعتبار أنها فابريكه بالكامل و مش محتاجه مصاريف
المهم هو حس أن البيعه كده باظت و أنه مش هيعرف يضحك علينا
لأن غالبا أنا شبه متأكد أن لو رحت بيها التوكيل أكشف عليها هالاقي فيها كذا حاجه عايزه تتعمل
قعد يقول ده مش عارف فلان حطلي 63 باكو على شنطه العربيه و أنا ما رضيتش
و فلان تاني و فلان تالت و هكذا
أنا كنت في اللحظه دي خلاص زهقت من كدبه و ملاوعته في الكلام و خصوصا كميه الحلفنات اللي حلفها
(حلف بالله ما لا يقل عن 15 مره في حوالي تلت ساعه)
فقلتله بص يا يا باشا
البيع و الشرا ده نصيب و انا مليش نصيب في العربيه دي و السلام عليكم و فرصه سعيده و مشيت
و اديني بأدور تاني على فيكترا 2000 سي سي اوتوماتيك موديل 2001 أو 2002 أو 2003
و ربنا يكرمني و الاقيها

معلش صدعتكم معايا و ألف شكر تاني لعصابه الأوبل

عيب يا عم احمد
انا قلتلك اول ما هيسمع سيرة التوكيل هيجيلة اسهاااااااااااااااااااااا اااااال
كدة احسن
اللى واثق من العربية بتاعته هيروح معاك اى جتة
و اللى مش واثق منها هتلاقية خايف و عارف انة كداب كداب يا ولدى
ربنا يكرمك و تلاقى اللى بتدور علية