تعرف يا غزالي انت فكرتني بموقف بقالة سنييييييين لما كنت في أولي ثانوي ، انا دلوقتي 29 سنة يعني شوف من امتي بقي

المهم بعد الأمتحانات سافرت نويبع لابويا وفي يوم من الأيام صحينا الصبح علي صوت التليفون وهو رد وميعرفش اني سامع المكالمة ، ومن الكلام كدة شميت ريحة ان النتيجة طلعت و مش تمام

عملت نفسي نايم طبعا ولا كأني اعرف حاجة ههههه

و فضل ساكت لحد بالليل خالص خرجنا نتمشي في الشوارع الخالية حيث الطقس البديع وابتدي يسألني هي المواد كانت صعبة ولا عاملة اية السنة دي ،، انا طبعا قلت بس يبقي أكيد هي فعلا النتيجة

واتفتحت بقي يا معلم اة دى كانت صعبة جدا جدا يعني في اعدادي كنا بناخد رياضة لكن دلوقتي بقت مادتين جبر و هندسة و العلوم بقي 3 مواد كيميا وفيزيا و احياءو الأنجليزي بقي معرفش كام كتاب و كل نوع المهم يعني طلعت بتوع التربية والتعليم دول جبابرة واحنا الطلبة أخر غلب هههههههههه

وطبعا مرضيش يقولي علي النتيجة علشان ميعكننش عليا وانا رايح اتفسح وبتاع ومسافرلة نويبع لوحدي :)

ربنا يخليهولنا ويديلة الصحة

المهم يعني قرب من والدك علي قد ما تقدر وحاول يكون بينك وبينة أكبر قدر ممكن من التفاهم ولما تحس ان طريقة تفكيرة غريبة عليك او انك مش متقبلها تعالي علي نفسك ومتقولش كلمة تضايقة و حاول تفهمة بهدوء في وقت يكون هو متقبل فية الكلام ، وكل ما تكبر كل ما هتعرف هو بيفكر بالطريقة دي لية وهتلاقي نفسك انت كمان بتتحول وتبقي زية وهتعمل كدة مع ولادك من غير ما تحس