الموضوع: قنوات النصب العلني (الإمارة و سترايك و غيرهم)

إمبارح كنت بقلب في الدش من زهقي , لفت نظري القناتين دول الإمارة و سترايك , بصراحة أنا مش عارف إزاي المسئولين عن القمر الصناعي نايل سات سامحين إن القناتين دول و اللي زيهم يستمروا في النصب العلني اللي بيعملوه

أنا عارف إن القنوات دي مش جديده , بس الجديد بقى إبتداعهم طرق جديدة للنصب على السذج

القنوات دي للي ميعرفهاش هي قنوات مسابقات بتيجي واحده (لا داعي لوصفها عشان مقولش حاجه أتوقف عشانها) بتسأل سؤال عبيط جدا يجاوب عليه أي عيل صغير و بتطلب إن المشاهدين يكلموها و يجابو , و بعد كده تتوالى الإجابات المتخلفة اللي مش ممكن تصدر عن إنسان عنده حاجه في جمجمته ربنا خلقهاله

مثال كده إمبارح كان السؤال مين أخت خالتك و مش خالتك؟ والإجابت كانت كالتالي : خالتي الكبيرة , عمتي , بنت خالتي.

دول التلات إجابات اللي جم خلال ربع ساعه و طبعا محدش عرف يجاوب على السؤال العويص , على الرغم من أن المذيعة المبجلة كانت عماله تغني لست الحبايب طول الوقت .

وبالتأكيد المتصلين دول كانو شوية نصابين برضه من ضمن فريق البرنامج عشان يوهمو الناس إن فيه مكالمات بيترد عليها و إن الناس لسه مش عارفه الإجابه

ويفضل السؤال مستمر لمده طويله جدا قد تصل أيام و قال يعني محدش عارف يجاوب عليه

والجديد بقى في النصب اللي أنا بتكلم عليه إنهم بيطلبو من الناس إنهم يرنو بس من غير مايتصلو وهم هايكلموهم بنفسهم عشان مايكلفهمش تمن المكالمة , وبكده هايضمنو إن ناس كتير هاتصدقهم و يتصلو طالما الموضوع مش هايكلفهم أي حاجه , مجرد رنة بس , و مع كل مكالمة بيستقبلوها بيأكدو المعلومة دي مع المتصل إنه رن بس ماتصلش و طبعا المتصل ده ما هو إلا أحد النصابين

لأن بناءا على تجربة قديمة مع المسابقات دي أنا عارف إن مفيش رن و لاحاجه لأنك مجرد ماهاتتصل بالرقم هتلاقى رسالة صوتيه ردت عليك و بكده تبقى اتحسبت عليك الدقيقة اللي تكلفتها 3 أو 5 جنيه , فعلا منتهى النصب و الإستخفاف بعقول المشاهدين , وياريت الناس تاخد بالها