الموضوع: أكل سمك فين فى الأسكندرية؟

بص مهما رحت أو جيت مفيش زي سمك بورسعيد ، البرج وكاستن لا يعلى عليهم

أبورقية....لك وحشة يا زعيم وياعم مستنيين إضافاتك ده إنت راجل خبرة جامدة في موضوع السمك وأكيل من النوع المحترف
محمد سمير...واحشني فعلا...اخطف نفسك لاسكندرية كلها ساعتين وإن شاء الله ترجع منشكح سمكيا فوق ما تتخيل..شد حيلك انت بس وتنورنا...وبالمرة نشوف الحتة الماكنتوش بتاعتك عشان إنت عارف الكيف

المشاركة الأصلية كتبت بواسطة ahmadalaaeldin

حلوه اوي وصف إمبراطور ديه وخاصة إشباع الواو:)
‎شكلي هاجي المقابلة بتاعة إسكندرية ن شاء الله عشان اتعرف على الناس المحترمة الي زي حضرتكم.
‎بس انا ابيض في إسكندرية بإذن الله يكون بيننا إتصال قريب

ربنا يبارك فيك وياريت فعلا نشوفك في أقرب فرصة ولو تقدر تيجي كام يوم أعملك جولة خاصة حتعجبك مش سمك وكلام من ده...حاجة تانية تخليك تشبع بجد

المشاركة الأصلية كتبت بواسطة hany_mohamed

المشكله يا باشا اللى عرفنى عليه وعلى مكانه واحد باشا بصحيح ومن ساعتها وانا بتعامل بنفس التسعيرة .
‎ان شاء الله أقرب وقت أروح هناك تكون معايا يا باشا ونوريهم العين الحمرا

ما هي دي المشكلة فعلا وده اللي كان مغلي أسعار السمك عند الخليج (البحر الميت) لأن كانت في مستويات مادية جامدة جدا بتيجي فكانوا بيطمعوا بتوع المطاعم..وفي الحقيقة مصطلح مطاعم ده مصطلح مجازي لأنها عبارة عن شوية كراسي قش وترابيزات مخلعة...تنور في أي وقت وأنا تحت أمرك إن شاء الله

المشاركة الأصلية كتبت بواسطة kh_talaat

‎طيب قولنا بقى يا دكتوووووور على الأماكن الجامدة الللي نشتري منها السمك وبأسعار معقوله وتكون طازه ....

‎معلش هنخليك تطلع شويه من اسرار المهنه بس عشان حبايبك واخواتك في نايل موتورز

حبيب قلبي..لك وحشة بجد والله
شوف يا صديقي
الأماكن اللي ممكن تشتري منها سمك بحر طازجة هي: حلقة الأنفوشي- حلقة أبوقير
حلقة المكس (كده وكده)
لأن عيب في حلقة السمك إنهم يبيعوا سمك مزارع (لغاية دلوقتي وربنا يستر على الأيام الجاية)
الحلقات دي الشراء بيكون فيها الصبح بدري جدا يعني بالكتير بتكون مشطبة الساعة ٩ والناس اللي بتفضل بعد كده بتكون أسعارهم أغلى لأن لهم قصة كده مش حاطول عليك بيها
المهم بالنسبة للعزومات والكميات الكبيرة والأنواع المعتبرة يبقى الحلقة
للكميات الأقل ومشي الحال عندك سوق أبوقير والشغل اللي بيفضل في الأنفوشي بعد الحلقة
سوق أبوقير بيشتغل لغاية المغرب وفيه ناس بتجهز زي ما إنت عاوز وبرضه ده متاح في بحري
لما الوقت يتأخر وتطلب معاك سمك بالليل بتلاقي كام محل شغالين في الحلقة في أبوقير ودول بيبعوا سمك غالي نسبيا بس محترم لأن التعامل غالبا مع الباشوات والإقطاعيين وأثرياء الحرب
لما الوقت يتأخر ومش عارف توصل أبوقير أو مستبعد المشوار يبقى مفيش قدامك غير المطاعم الأخرى المذكورة في المشاركات السابقة
وفي حل وسط وهي بعض المحلات الموجودة في شارع خالد بن الوليد عند منتصفه تماما في المنطقة التي يطلق عليها (سينما المنتزة)..دي كانت سينما قديمة درجة تالتة واتقفلت...المهم في كام محل هناك وأحسن واحد فيهم اسمه (سعد)
كل المحلات المنتشرة في ميامي وسيدي بشر وبقية مناطق اسكندرية بتبيع سمك وجمبري مزارع وده بيبقى واكل عيش وبيض لما قايل بس فالأوفر بدل متروح تشتري كيلو سمك بأربعين جنيه تروح تجيب تلات أربع بيضات وتقليهم وتحبشهم ومش حتحس بفرق كبير

الميزة في سمك أبوقير والأنفوشي (بحري) إنك لما تسمع كلمات زي (قاروص- مياس-دنيس) فدي لا تعني إلا سمك بحر يعني سمك بجد...بالإضافة طبعا إلى عشرات الأنواع الأخرى يعني اختيارات وبدائل واسعة جدا وكل حاجة لها طعم غير التانية

عموما لو في حد جاي اسكندرية وعاوز سمك سواء كتير أو قليل يقولي وإن شاء الله نعملوا معاه الواجب...وفي واحد مهندس صاحبي ورفيق كفاح شغال بنفسه في موضوع السمك وعلى فكرة هو اللي عمل أكل المقابلة اللي فاتت ..فده ممكن يجهز أكلات وعزومات لأى عدد وبأحسن أنواع السمك بمقابل معقول جدا والترتيب بالتليفون فلو حد عاوزه يقول وأنا ابعتله رقم تليفونه يرتب معاه....(وياريت السطر الأخير ده ميعتبرش فقرة إعلانية)

ملحوظة أخيرة..من أول شهر مايو الصيد في البحر حيقف لمدة شهرين تقريبا والتوقيف ده دوري بقاله كام سنة..السبب المعلن عشان تكاثر الزريعة والبيئة والكلام ده...السبب الحقيقي إننا بنشوف في البحر مراكب كبيرة تبع دول أجنبية عبارة عن مصانع بتصطاد كميات مهولة من السمك وترجع بيه
النتيجة...السمك في الشهرين دول بيقل جدا وبيغلى جدا والكلمة العليا بتكون لسمك المزارع
ولما الشهرين بيخلصوا بيكون السمك اللي في البحر بح....ولا تعليق