الموضوع: أكل سمك فين فى الأسكندرية؟

المشاركة الأصلية كتبت بواسطة أبو حمزة

تخيل وانا كمان

:)

المشاركة الأصلية كتبت بواسطة بحري

بتكفي كام فرد يا باشمهندس..وهي بالوزن وللا بالطلب

بالوزن يا دكتور.....بس مينفعش فيه غير الجمبرى الكبير.....و فى العادى بتلاقى سعر الكيلو فى حدود ال 240 الى 300 جم....حسب الظروف

أنا عن نفسى لما بروح بطلب نصف كيلو مع طبق رز و شكراً على كده

و خلى بالك أن الأكلة دى بتلكم جامد......و فى " قعر الطبق " هتلاقى زبدة سايحة.....قشر الجمبرى و غمسه فى الزبدة و عييييييييييييييش

المشاركة الأصلية كتبت بواسطة BASKOTA

أقول انا ليه
ههههههههههههههههههههههه
بلاش احسن
بس انت مين اللى ضحك عليك ووداك هناك

لأ بلاش عشان الناس متقرفش :)

كنت دايماً أسمع عنه لحد مرة من 4 سنين كنت أنا و مراتى و واحد صاحبى و مراته فى أسكندرية يومين كده و قولت نجرب مش هنخسر حاجة

رحت أنا و صاحبى جبنا منه و رجعنا البيت عشان ناكل.............كلهم كلو إلا أنا

و مرضيتش أقولهم على حاجة..........قولت يمكن أنا اللى حظى وحش

المشاركة الأصلية كتبت بواسطة kok3

احلى سمك تاكله فى حياتك فى البرج بورسعيد انا كلت فى اسكندريه وفى شرم وفى بورسعيد بس احلى اكله سمك كلتها فى حياتى كانت البرج فى بورسعيد ايه دا دى ناس مجرمه سمك والمفروض يحاكموهم دا مش سمك ولا دى شربه بحر مش ممكن بجد انا وانا باكل وشى كله بيحمر وعنيا بتزغلل فورا من الاكل الفاجر دا اكله سمك هتاكلها وهتحلف بيها ومش مهم الفلوس جمب المتعه دى بصراحه واسعارهم معقوله جدا كمان لا بورسعيد الكبيره فى الموضوع دا ابصم بالعشره على كدا

البرج........هو فى زى البرج !!!!!!!!!!!!!!!!!!!!

أنا كلت هناك أكتر من بس فى مرة منهم كان معايا واحد صاحبى على معرفة كويسة جداً بأبن صاحب البرج......و مش عاوز أقولكم أن الأكل فضل ينزل على الترابيزة حتى بعد ما خلصنا أكل :)

عنده أختراع كويس برضه.....وقار محشى جمبرى
عبارة عن وقار فيليه طبقتين و بينهم جمبرى

هيييييييييييييه أياااااااااااااااام

المشاركة الأصلية كتبت بواسطة Moh.Fahmy

يا جماعة جوندل ده للمرمرمين فقط انما مزاج و اكل نضيف مستحيل طبعا
انا كنت زبون عنده قبل الجواز و بعد الجواز بقيت اروحله للطوارئ يعني مثلا المدام تفاجئني بتليفون و انا ماشي في امان الله و طلعت من زنقة البلد و سعيد جدا القيها تقولي - بالله عليك ظبطلنا اكلة سمك سريعة عشان ما لحقتش اعمل غدا النهاردة - اجري علي جوندل لانه ملك السمك الجاهز و اقوم مظبط الواد اللي هناك حتة بخمسة جند يبقي الواد من فرحته عايز يلفني في ورقة فويل بس يظبط المواضيع و يغلف التغليف المتين و شوربة السي فود يحطها في علبة شيك مش كيس نايلون زي ما بيعمل مع باقي الزباين و القصة دي كلها ما تعديش 75 جنيه و مراتي بتبقي طايرة من الفرحة لثقتها الشديدة في زوقي لانها كانت لسه ما شافتش الوجه المرمرم بتاعي لغاية ما جت في مرة كنا معديين قدام الازرايطة وقت الظهر كده و فاجئتني بأنها نفسها في اكلة سمك عند حودة جوندل ..طبعا انا وشي جاب الوان الطيف كلها في وقت واحد - قلتلها خلاص يا روحي خليكي انتي في العربية و انا طيارة اروح و اجيبلك احسن اكلة سمك - فأصرت و الحت انها تاكل في الرستوران - قلتلها بلاش ..أصرت اكتر بدأت اغير اسلوبي و قولتلها اصله مطعم شعبي شوية قالتلي انها بتموت في المطاعم الشعبية - خدتها من قصيرها و دخلنا المنور الملعون بتاع جوندل و صاحبتنا اللي صابها صابها ..تتنيح لكل جزء في المكان و نظرة ثاقبة لاعلي المنور و قوايم الصرف الصحي اللي مبهدلة الدنيا و الصراصير اللي بتتفرج علي المفاجيع اللي بتاكل مرورا بقي بالبنات اللي شغالين هناك و شكل هدومهم عامل ايه و اللي ماسكة (كوز) بتعبي بيه شوربة السي فود اللي في الفونتاظ المهبب داخل اكياس بلاستيك للعملاء
صاحبتنا سألتني علي التواليت ووشها احممممر و زنهر و انا موت علي نفسي من الضحك علي كلمة التواليت في المكان ده و فجأة بركان انفجر من بطنها و بهدلت الدنيا - و ما بقتش مصدقة نفسها انها اكلت وجبات كتيرة من المكان ده - ففكرتها ان انا قولتلها بلاش و قعدت اديها محاضرات انها ما تاخدش الامور بظاهرها و تهتم بالجوهر - انما الحسنة الوحيدة في الموضوع انها بطلت تقولي هاتلنا اكلة سمك سريعة مرة تانية - و طبعا صدمتها فيا كانت كبيرة لاني كنت علطول بعزمها سواء فترة عقد القران او بعد الجواز في مطاعم من شاكلة السلاملك و ابو شقرة و ابو فارس السوري و طربوش لكن طبعا دي مطاعم مرة في الاسبوع او مرتين في الشهر علي اقصي تقدير

معلهش طولت عليكم بس اعذورني افتكرت القصة دي لما بسكوتة قالت ان جوندل ما ينفعش و من ساعتها و انا واحشني جوندل جدا جدا

مش جندل دة اللي كلتو من عندة في عيد ميلاد المنتدي السنة اللي فاتت يا جماعة ؟ حبيبي يا شنوري يا مظبطهم شكلنا هنسحب منك الثقة وكفاية علينا دكتور بحري