محتاج فنى تلاجات يصلح التلاجه وياريت لو يكون متخصص فى التلاجات ويكون كويس وامين فى شغله
ياريت لو حد يعرف شخص بيتعامل معاه وكويس يقولى عليه او يكتبلى نمرته واكون شاكر ليه جدا
عرض للطباعة
محتاج فنى تلاجات يصلح التلاجه وياريت لو يكون متخصص فى التلاجات ويكون كويس وامين فى شغله
ياريت لو حد يعرف شخص بيتعامل معاه وكويس يقولى عليه او يكتبلى نمرته واكون شاكر ليه جدا
ياتري ايه المشكلة ممكن تكون حاجة بسيطة!
حضرتك ساكن فين
والله ياخى الكريم انا تعرضت لعملية نصب بسبب تلاجة كانت عندى فى البيت وعطلت ولة حكيت لك الموضوع موش هتصدق
بسبب انى عايش فى السعودية اخدت على نظام التوكيلات ولما حاجة تخسر لازم تتصل بالتوكيل عشان يصلحها فتضمن لنفسك انه الفنى هيكون فاهم شغله ويستخدم قطع غيار اصلية ويكون فيه ضمان بعد عملية الصيانة
لما التلاجة باظت وانا كنت فى اجازة من العمل فى مصر بحثت عن شهادة الضمان فوجدتها وكان الضمان 7 سنوات مر منهم تقريبا 4 سنين
اتصلت بالتلفون المطبوع على شهادة الضمان فردت انسة حكييت ليها المشكلة فردت بادب بانهم سيرسلوا الفنيين اخر النهار وسيتم الاتصال تلفونيا فى حدود الساعة 7 ونص مساء(الكلام ده كان الصبح)
الساعة 6 اتصل بى واحد من جوال وقال انا المهندس فلان وموجود عندك فى المنطقة فين البيت عشان اشوف التلاجة (قبل الموعد بساعة ونص ماشاء الله)
نزلت فى الشارع ووصلت له وجبته البيت وكان معاه واحد تانى شافو التلاجة وقالوا التلاجة محتاجة تغيير ترموستات ولو عايز تركب لها منظم تيار للموتور وده حاجة مهمة جدا عشان يحافظ عليها ممكن وخاصة انه انت بتسافر وبتسيبها فترات طويلة شغالة بدون وجود احد فى المنزل قلت له ما فيش مشكلة
لاحظت انه كل لما ادخل المطبخ اشوفه بيعمل ايه يطلب منى الى حاجة علشان يخلينى دايما مشغول وموش مركز معاه(للاسف الملاحظات دى اخدت بالى منها بعدين)
بعد شغل حوالى ساعة كدة خلاص اخبرنى بانه صلح التلاجة وطلع دفتر فواتير وكتب لى الفاتورة 550 جنيه
للوهلة الاولى انا اتاخدت شوية ولم اتوقع انه المبلغ كبير اوى كدة وخاصة انه التلاجة موش هى اللى تستاهل لانه كان سعرها جديدة 1400 تقريبا لكن من احراجى دفعت وامرى لله
بعد لما مشى المهندس العظيم فحصت التلاجة من عند الموتور كويس لم اجد فيها اى شئ جديد وبحثت عن المنظم الرائع اللى قال عليه فلم اجده
بعد ساعة التلاجة فصلت وعادت كما كانت المهم نسيت اقول لكم انه انا طبيب بس غاوى تصليح وعندى فكرة موش بطالة وعندى عدة وادوات لكل حاجة بس مشكلتى ماعنديش وقت خالص فقررت انه افك الترموستات اللى ركبى المهندس النصاب اشوف فيه ايه ففوجئت انه ركب لى ترموستات قديم ومصدى وكمان بيسخن وبيطلع شرارة وبيفصل عشان كدة التلاجة فصلت
فكيته وروحت لواحد بتاع قطع غيارعندنا فى المعادى فى شارع حسنين دسوقى ووريت له الترموستات فقاللى ده نوع صينى تعبان ب 20 جنيه فيه ايطالى ب 30 جنيه احسن منه قلت له ده الاصلى بتاع التلاجة قالى صباح الفل يادكتور صلى على النبى كدة وروق.
اخدت الترموستات الايطالى وركبته واشتغلت التلاجة زى الفل من سنتين لغاية دلوقت
المهم الحكاية ليها بقية شيقة جدا هاحاول اكتبها ليكم ان شاء الله
بعد لما اتصلحت التلاجة كانت المشكلة التالية كيف استرد حقى من النصابين دول وكمان اوديهم فى داهية علشان هما بنصبوا على ناس غيرى بالشكل ده كل يوم
اتصلت بالمحامى وسالته عن الناحية القانونية فقال لى شوف العنوان اللى فيه الشركة فى الفاتورة وروح اقرب قسم شرطة واعمل بلاغ وبعد كده سيبنى عليهم هاوديهم فى داهية وهاجيب لك تعويض كمان
فكرت فى الموضوع انا عمرى ما دخلت قسم شرطة فى حياتى ابدا تقريبا وماليش فى البهدلة بصراحة ميلت على المدام وسالتها ايه رايك؟
بصراحة ربنا يخليهالى دايما تعطينى الراى السديد وده فايدة انه تكون الزوجة مثقفة وفاهمة الدنيا ماشية ازاى يعنىup to date من الاخر
قالت لى فيه اختراع اسمه جهاز حماية المستهلك معمول عشان الحاجات اللى زى كده اتصل عليه بكرة وشوف .قولت احاول وموش هاخسر قد ما خسرت بكرة الصبح يحلها حلال
المهم اتصلت تانى على نفس التلفون اللى فى الضمان علشان اشوف فين مدير الشركة بنت الحرامية دى واديهم كلمتين تهديد واشوف النظام تخيلوا انكروا تماما انهم ارسلوا لى اى حد للبيت وان اوردر الصيانة لسة لم ينفذ يعنى انا وقعت فى عصابة
اتصلت بالدليل وطلبت رقم تانى لنفس ماركة التلاجة فاعطونى رقم مختصر اتصلت بيه وكانت المفاجاة
احكيهلكم بعدين لما اشوف الردود
ارحمنا يا الله من معدومي الضمير
فعلا اقل حاجة اننا مش نسكت على حقوقنا ولازم نبقى عرفينها كويس وكمان لازم لما ندفع فلوس يبقى فيه ما يثبت ده
لما اتصلت بالرقم المختصر الخاص بماركة التلاجة والذى اخذته من الدليل فوجئت بان الشركة(بالمناسبة هى شركة الاسكا)قد قامت بالغاء الارقام المطبوعة على شهادات الضمان القديمة واصبح رقمها هو الرقم المختصر فقط وبعدين الارقام القديمة اخذتها شركات وورش صيانة نصابة وادعت انها التوكيل وبترد على العملاء اللى موش عارفين الكلام ده وتقوم بعملية نصب وتاخد فلوس بالطريقة اللى حصلت معايا وشركة الاسكا نفسها داخلة معاهم فى شكاوى ونيابة وقضايا ...............الخ
حاجة جميلة موش كدة قمة العشوائية فى بلدنا الجميلة
المهم الصبح اتصلت بجهاز حماية المستهلك وكان الرد ولا فى الاحلام كاننا فى اوروربا او امريكا طلب منى بياناتى وسجلها على الكمبيوتر وطلب منى ارسله صورة الفاتورة بالفاكس واعطانى رقم للشكوى وقالى فى خلال اسبوع نجيب لك حقك ان شاء الله
ياريت توضح نوع الثلاجة
والعطل وان شاء الله نقدر نفيدك
بعد يومين بالظبط اتصل بى شخص من شركة الصيانة النصابة واخد يطيب خاطرى ويجر ناعم ويسالنى ليه بس اتصلت بحماية المستهلك كنت كلمنا واحنا نتفاهم معاك المهم قلت له بلاش تكتر فى الكلام والمطلوب الفلوس تجيلى لغاية البيت full stop.
قالى احنا هنرسل لك كبير المهندسين يعاين التلاجة ويشوف المشكلة بالظبط ويعمل تقرير بالموضوع قلت له اللهم طولك ياروح طيب خلينى صابر لما اشوف اخرتها معاكم
تانى يوم جالى راجل كبير فى السن شوية عامل نفسه مدير وبيفحص التلاجة المهم انا لى جار اسمه الاستاذ عبد الناصر مدرس عربى بس تشوفه تقول عليه رئيس جمهورية وزير داخلية حاجة جامدة كدة حكيت له الموضوع فقالى لازم اكون معاك اثناء الزيارة دى
المهم الاستاذ عبد الناصر عمل نمرة جامدة على الراجل ده وانه ظابط شرطة وعلى صوته جامد مع المهندس ده وفهمه ان الموضوع ده موش هيعدى على خير ابدا
المهندس الكبير خلص المعاينة وقال لى بكرة هنعمل لجنة ونصدر قرار فى موضوعك قلت له تعمل لجنة تعمل عجين الفلاحة ده موش شغلى الفلوس ترجع ياحبيبى
تانى يوم اتصل بى واحد من الشركة دى وقعد يساومنى انه الفلوس ترجع ناقصة 150 جنيه واتنازل عن الشكوى وارجع لهم اصل الفاتورة المهم اخدته على قد عقله ووافقت
فى نفس اليوم بالليل ارسلوا واحد بالفلوس ناقصة اخدتها منه ورفضت اديله اصل الفاتورة
تانى يوم الصبح روحت وزارة التموين اللى فى شارع القصر العينى ولقيت فى قسم للشكاوى ومدير المكتب لواء شرطة حكيت الحكاية للسكرتير اعطانى نموذج جاهز للشكوى واخد صورة البطاقة والفاتورة وقالى بكرة نبعت لهم مفتشين ونعمل لهم قضية
وعلى فكرة السكرتير فاهمنى انه حالات النصب من هذا النوع زادت جدا لدرجة انه الشكوى بتاعتى كانت رقم 100 فى هذا اليوم
المهم انا سافرت بعدها باسبوع ولم اتابع الموضوع مه وزارة التموين للاسف
المهم خلاصة الموضوع انصحك تشوف واحد فنى من المنطقة اللى انت ساكن فيها ويكون سمعته كويسة وصلح حاجات لناس قبل كدة واتعامل معاهم بالمعروف وقبل ما يصلح اى حاجة لازم تتفق معاه على المبلغ المطلوب وانصحك انه اى قطعة غيار محتاجها خليه يفكها وروح اشتريها انت بنفسك
وتقبل تحياتى
شكرا ليكم على محاوله مساعدتى
ويادكتور للاسف الناس معندهاش ضمير والحمد لله انك رجعت حقك هو مش كله بس اللى وصلت ليه ده يعتبر انجاز
قصه التلاجه بتاعتنا بقى انا جبت اكتر من 20 فنى تلاجات وكل واحد يقولى على مشكله شكل لدرجه انى صرفت مصاريف كتير اوى على الصناعيه وقطع وفى الاخر العيب هو هو
فقصه انى اشوف حد فى منطقتى او حد اعرفه اتعامل مع واحد كويس دى صعبه شويه علشان انا سئالت وجربت وللاسف فشلت فكنت عايز اسئل حد فيكم يعرف حد كويس
التلاجه National no frost يابانى وهى كويسه جدا وكانت شغاله معايا زى الفل لكن المشكله بقى انها بتفصل والفريز يعمل تالج من جوه و يخلى المروحه تقف متدورش فبالتالى مبتوزعش الهواء عملت فيها كل حاجه غيرت التايمر وغيرت المروحه وعملت ليها صرف جديد للميه علشان القديم كان بيتسد ومبيصرفش الميه والميه بتجمد ويعمل تلج على المروحه المهم كل المحاولات فشلت
اما عن المنطقه انا ساكن فى العباسيه
انا دلوقتى ادامى حلين انى اكلم التوكيل بس مش راضى عارف ان التوكيل هيشوف العك اللى اتعمل فيها دى مش هيرضى يشتعل فيها او يضرب رقم عالى اوى وده مخليه للحل الاخير
او اتصل بالناس اللى بيحطوا اعلانتهم فى الجرايد الاهرام وكده بس اغلبهم نصابين
ومره تانيه شكرا جد على ردوكم دى والله انا حاسس انى وسط اخواتى
والله يا اخى الكريم حسب معلوماتى ومن واقع خبرتى فى التعامل مع التلاجات وبالذات الانواع النظيفة زى اللى موجودة عندنا فى السعودية بيكون فيه قطعة تشبه الترموستات راكبة فى مكان ما خلف التلاجة ومتغطية حاجة زى المنظم اللى المهندس النصاب صاحبنا ادعى انه ركبه لى (وده من احد الاسباب اللى خلانى صدقته)مسؤلة عن عملية التشغيل والفصل وساعات بتبوظ وبتحتاج تغيير او انه التلرموستات بتاع الفريزر نفسه باظ وعشان كده بيفضل شغال متواصل بدون فصل لغاية لما التلج بيوقف المروحة
عموما فى عضو فى المنتدى واجه مشكلة فى مكيف واتصل بشركة معروفة اسمها شمس وليها رقم مختصر وصلحوا المكيف وعبوا الفريون كل ده ب 180 جنيه مع ضمان 6 شهور مع العلم انه التوكيل طلب 500 جنيه وكان عايز يفك المكيف وياخده الشركة فممكن تسالهم وتشوف رايهم ايه
المهم خليك مصحصح وواعى كده وما تعملش زيى وخلى بالك النصابين فى هذا المجال اكثر مما تتخيل
رقمهم المختصر 19070
شكرا ليك يا دكتور والله على مجهودك معايا والله فعلا مابيتعلمش ببلاش
انا مشكلتى ومشكلتنا عموما اننا مش عملين يعنى انا زى ما قولت صرفت على التلاجه دى من ساعات ما باظت تقريبا نص تمن تلاجه جديده طيب ما انا كونت وفرت فلوسى واشتريت تلاجه اضمن واحسن علشان كده انا مش عايز اكلم التوكيل ومخليه اخر حاجه علشان يبقى ادام ربنا عملت اللى عليا مع التلاجه دى
وهجرب نمره شمس انا اعرفهم بس المشكله دول بتوع تكيفات وتلفزيونات ممكن يشتغلوا فى التلاجات
هم "شمس" دول في كل المحافظات؟
صلي علي النبي يا باشا
وان شاء الله خير
انا تعبت في التلاجة بتاعتي تقريبا زي ما حضرتك وصفت بالظبط لحد ما قررت اني ابيعها ب 150 جنية من كتر العك اللي اتعنل فيها واجيب واحدة جديدة
لحد ما ربنا وقع في طريقي واحد بتاع تلاجات بس الناس شكرتلي فيه قوي
قولت لنفسي اجرب واهي تبقي اخر محاولة
الراجل جالي تقريبا علي الساعة 12 الظهر فرش العدة بتاعته جنب التلاجة ما سبهاش غير الساعة 7.5 مساء وما شاء الله من ساعتها وهي ماشية زي الساعة
هو اجرته ممكن تكون حراقة حبة بس بيعمل الصح وبيخاف ربنا
لو تحب اكتبلك تليفونة انا تحت امرك فيصل
وربنا يعديهالك علي خير
اسطي سعد 01225494900
وقله انك جبت التليفون من المهندس احمد بتاع فيصل
وربنا يجعل في ايدة الشفا وتريح دماغك من وجع القلب ده
موضوع شركات الصيانة دة موضوع كبير جدا و معقد للغاية لانهم محترفين نصب على الناس
اولا : بعد كشف المهندس على الجهاز اعرف منة العيب و تكلفة الصيانة و نوع قطع الغيار وقولة خلاص خد الكشف وانا هفكر فى موضوع الاصلاح او شراء جهاز جديد هتلاقية يقولك احنا ممكن نعمل تخفيض اوعى تطلب منة يعمل تخفيض سيبة هو اللى هيقولك بنفسة لان قطع الغيار رخيصة مابتزيدش عن 100ج و الموتور ( الكمبريسور) فى حدود 400ج جديد لكن المراكز بتطلب فية 1200ج
ثانيا : لازم تقف على راس المهندس هو شغال وتعرف اية اللى بيعملة بالظبط وبيغير اية و نوع قطع الغيار وتتأكد بنفسك من بلد المنشأ
موضوع الصيانة دة سهل وبسيط لكن اصحاب مراكز الصيانة عايزين مبالغ خيالية
لازم نعمل حملة على مراكز الصيانة النصابة ونفضحهم علشان الناس ماتوقعش فى نفس الموقف :_Alshmokh08[1]: