الموضوع: هي الناس دي زعلانه كده ليه ؟

المشاركة الأصلية كتبت بواسطة romeo_6887

انا اسمي احمد يعني مسلم و مش محتاج نصايح في ديني من حد
و كمان عندي 23 سنه و مريت بتجاب كتير جدا
و بعدين صغير كبير الواحد بعقله مش بسنه
و بعدين كل النصايح في الدين و محدش بيتكلم في اللي انا بتكلم فيه
و بعدين انا متضايق طبعا و تعبان نفسيا من الحال اللي احنا فيه
لان نفسي اشتغل في شغل محترم بشهادتي
مش افتح محل و اعد فيه زي الفازه و معملش حاجه بربع جنيه
لان ده هو حال بلدنا
و الله انا مش عايز اشتغل حاجه غير بشهادتي
لاني ضيعت 4 سنين من عمري عليها
و مش ناوي اخلي ال 4 سنين دول يروحوا هباء
فلو روحت فتحت مصلحه و قعدت فيها
يبقي لا عمري هتجوز و لا عمر هيكون معايا فلوس
عرفت انا متضايق ليه
انا قدامي عشرين الف مصلحه افتحها و الفلوس و الشركاء موجودين
و كل حاجه زي الفل بس و لا بربع جنيه اصلا
انا عايز دخل ثابت عشان اعرف اتجوز و افتح بيت
مش اروح اعد في مصلحتي و معملش حاجه
دي يا راجل المصالح اللي شغاله في ودنه
قفلت و الله العظيم قفلت و زعلان من قلبي علي صحابها
اللي معتش في ايديهم حاجه يعملوها
علم و معانا و فلوس و معانا و برضه مش عارفين ناكل عيش
يبقي مش حقي اتحر دمي من اللي بيحصل
و بعدين حضرتك متعرفنيش كويس عشان تحكم عليا صح
و والدي معلمنيش حاجه الا مثلا في السواقه و في حاجات تانيه
بس مش مفيده يعني او تخليني اعرف اكل عيش صح

ربنا يرزقك من وسع يا احمد ..... بس ليا تعقيب

1- الرزق بتاع ربنا .... ياما ناس مش متعلمين و ربنا رازقهم .... و ياما ناس معاها دكتوراة و شغالين بالليل على تاكسي جنب الشغل بتاع الصبح عشان يادوب يسد المصاريف .....

2- مش من حقك دمك يتحرق لسبب بسيط .... حضرتك حديث تخرج ... الراجل البنغالي ده بيشتغل في المصنع من اكتر من 10 سنين زي ما انت قلت و الله اعلم قبل المصنع ده كان شغال كام سنة و فين .... يعني كده كده هو ما اخدش مكانك .... فاهم قصدي؟

الكلام ده لو الوظائف بتاعة حديثي التخرج بقت مشغولة باجانب و انت شايف انك اولى منهم ساعتها كنت هاوافقك في الرأي

3- الدكتور بحري ما قالش انك صغير .... هو قال ان الناس اللي بتنصحك كلها اكبر منك بكتير سنا و خبرة ... و بينصحك تسمع منهم مش اكتر

4- والدك كفاية عليه انه شرب المر عشان انت تبقى بني ادم ..... ما تزعلش مني بس مفيش حد فينا ليه بركة الا والده

المدارس اللي انت دخلتها كانت من فلوس و شقا و عرق والدك

الهدوم اللي انت لابسها كلها كانت من فلوس و شقا و عرق والدك

الاكل و الشرب و العلاج كلهم كانوا من فلوس و شقا و عرق والدك

البيت اللي ساترك تحت سقفه و العربية اللي بتركبها كلهم من فلوس و شقا و عرق والدك

البامبرز اللي كنت بتعملها فيه و انت صغير و التطعيمات و غيرهم كانت من فلوس و شقا و عرق والدك

والدك - زي اي موظف في العالم - اكيد ياما شاف القرف في شغله و جه على نفسه و استحمل عشان مين؟ عشانك انت و اخواتك .... لو ماكانش مخلف كان قال لهم في الشغل ملعون ابوكوا و مشي !!!!

صدقني مش هتعرف قيمة والدك صح الا اما تتجوز و تخلف و تشرب المر عشان عيالك و تبقى مبسوط ...... و اما تشوف النكران من ابنك هتعرف غلطك ....

انا ابويا اما كان بيسافر مأمورية كان بيصرف كل فلوسه علينا احنا و ما يجيبش لنفسه حاجة الا حاجات هبلة و بسيطة جدا


و انا اول مرة سافرت فيها مأمورية لقيت نفسي باعمل نفس الشئ ..... عارف عملت ايه؟

و الله عيني دمعت ... و اتصلت بيه في ساعتها و قلت له انت لو كنت قدامي كنت وطيت بست رجلك .... ربنا يخليك لينا ......