الموضوع: الي كل منتقدي الميتسوبيشي المكواة لضعف محركها

المشاركة الأصلية كتبت بواسطة shooter123

انا شفت هنا ناس كتيرة بتقول علي المكواة ضعيفة لان موتورها 1300 وخصوصا لما تبقي اوتوماتيك ويلهوي بقي لو شغلت التكييف
بصراحة انا العربية معايا زي الفل داخل المدينة سواء بالتكييف او بدون
لكن امبارح وانا راجع من القاهرة كنت بالليل يعني مفيش ردار وانتوا عارفين بقي يعني ايه مفيش ردار
مسكت واحد باوبل استرا سخنته واديته دروس في كيفية لعب اندر جراوند علي الزراعي وانا موتوري 1300 وهو 1600 وسمعت صوت موتوره وعرفت انه مانويل يعني المفروض يحرق عني كمان لاني انا اوتوماتيك
وكنت بهدي لما افرق منه عشان استناه
المهم بعد ما الواد اتعقد في عيشته مشفنيش تاني فتحت انا بقي 140 والعربية والله قمة في الثبات والهدوء بسبب العزل الداخلي ومراتي كانت جنبي مكنتش بتحس بالسرعه بس كانت بتحس بالغرز
وطبعا عشان ربنا مبيسبش بعتلي واحد بمازدا 3 عقدني
خلاصة التجربة
العربية مظلومة من ناس كتير لمجرد انها 1300 سي سي واللي يقولك ده انت لو شغلت التكييف حتبقي راكب بطة بلدي
وللعلم وانا رايح كنا الصبح ومشغل التكييف بس للاسف كان في ردار يعني اخري كان 90 زراعي بقي
يمكن الناس اللي جربت العربية كانت تجربهم بعربية حالاتها مش ولا بد فحكموا عليها حكم ظاااااااااااااااااااااااا اااااااااالم
انا مش متحيز عشان هي عربيتي بس دي تجربة واقعية حبيت انقلها لاصحابي هنا علي المنتدي
واسف علي الاطالة

يا كبير اللي انت شديت معاها دي استرا 1200cc مانوال التانية بتبقى 1600cc a\t وفيها sport drive ودي مستحيل تطلع منها على طريق سريع بموتور المكوه ممكن تطلع منه أول تاني بس لكن سريع لأ
وأخيرًا الجري مش كل حاجة والمكوه حلوة محدش قال انها ضعيفة ولا حاجة بس متقارنهاش بمواتير 1600 عشان كده تبقى بتظلمها