النهارده الصبح رحت للميكانيكي بدري علشان اظبط الموتور...
....
النيه كانت انه يكشف علي الكستبانات وبلوف التاكيهات علشان الصوت اللي مسمع في الموتور...
المهم. بدردش معاه قبل ما نحل... قالي طقم الكستبانات حيتغير...
ازاي يا عم ... اللي اعرفه ان الكستبان اللي بايظ هو اللي بيتغير بس...
قاللي والله حنحل ونشوف بس في الغالب بنغير ال 8 مع بعض...
حلينا غطا التاكيهات لاقينا عمود الكامات متآكل...
طيب ده بكام...
قالي بيعمل من 300:350 استيراد وحتلف عليه كتير... والموجود جديد صيني ب 310 لكن مش كويس....
طب والكسبانات...
الواحد ب 40 او 45...

يعني 350 + 360 : 710 بس غير جوان وش سلندر وما يستجد والمصنعيه... يعني حتعدي ال 1000...

قلت له قفل لأن الموضوع كده ماكنش معمول حسابه...

طيب لما عامود الكامه والكستبانات والجوان يعملوا 1000 جنيه بالمصنعيه... أمال العمره تتكلف كام... في حين ان الموتور الاستيراد كامل بالبوابه بالرشاشات بالمسطره ومن غير الفتيس بيعمل 2000 جنيه...

انا بيني وبينكم اتقفلت... العربيه مش مزعلاني في اي حاجه غير صوت التكتكه اللي في الموتور... سحب واستهلاك بنزين 10/10


دي صورة عامود الكامات المتآكل والعلامات الحمراء هي مكان التآكل...( كنت فاكر اسمه عامود التاكيهات لكن لما دخلت علي النت ابحث عن صورته عرفت ان اسمه عامود الكامات )...



انا شايف ان تكلفة الصيانه كتيره بالمقارنه بموتور استيراد...
وحبيت آخد رأيكم...

أتعايش مع الوضع مؤقتآ حتي يستجد جديد ( اجيب موتور استيراد - احتمال اغير العربيه بعد كام شهر )...
ولا اتوكل علي الله واعمل الشغل اللي فيها...

حالة السياره حاليآ:
- استهلاك البنزين: 310 كم/الصفيحه خلال السفر.... و 150كم/الصفيحه داخل البلد.
- الميه بتنقص باستمرار ( تسريب من الطبب) بازود زجاجة مياه 2 لتر كل يومين.
- الشكمان بيجيب ميه.
- سحب العربيه كويس جدآ...


ملحوظه: الصوت ده في العربيه من وقت ما اشتريتها من حوالي سنه ونصف 30000 كم... وماسببش أي مشاكل غير صوت الموتور العالي واحيانآ المزعج...