الميه بتغلي في الاربه والمروحه شغاله

صباح الخير يا جماعه ، امبارح وانا ماشي بالعربيه فجأة لقيت الحراره بتعلي جامد استنيت شويه ومشيت بيها تاني ، لقيت برده نفس الموضوع ، وسمعت صوت الميه بتغلي في العربيه والمروحه شغاله، ورحت للميكانيكي ، وقالي احتمال يكون وش سلندر او حساس الحرارة هنستنس لما العربيه تبرد ونشوف، وبعد حوالي ساعتين دورنا ونفس الموضوع ، هو قالي احتمال ميكونش وش السلندر
وبكره نشوف حساس الحراره علشان ده شغلانه وهنفك سير الكاتينه ، بصراحه يا جماعه انا مش عارف بالظبط ايه اللي حصل وايه السبب دي اول مره والعربيه موديل 2002 وعامله 90000
ارجوا الافاده بالرأي ؟؟ اعمل ايه؟؟

ان شاء الله الموضوع يكون بسيط

لكن صباع الحراره ملهوش علاقه بفك سير الكاتينه

بس المهم المراوح عندك بتشتغل على انهي سرعه ؟؟ السرعه الأولى ولا التانيه ؟؟

الكهربائي قال ان المروحه شغاله علي السرعه العاليه وهو اللي قال روح للميكانيكي ، هل ممكن يبقي العيب فعلا في صابع الحراره ده

طيب حضرتك جربت انك تشوف حراره المياه داخل الخرطومين الكبار اللي داخل وطالع من الريدياتير ؟؟؟

يعني هل الحراره في الخرطومين وقت غليان الميا في القربه بتكون متعادله او متقاربه تقريبا ؟؟

ولا ناحيه بارده وناحيه سخنه بتغلي ؟

شكرا لاهتمامك يا استاذ محمد ، بس بصراحه انا مشفتش الخراطيم بس الميكانيكي كان بيضغط عليها ، انت شايف الموضوع ممكن يكون ايه؟؟

معلش انا حاسس اني طولت عليك في الأسئله

لكن نفس الموضوع ده حصل في عربيه جولييت وبردو الميكانيكي قال وش سلندر و و وو


لكن الموضوع كله طلع ان طلمبه الميا كانت منتهيه , وكانت مش بتقلب الميا جوا دوره التبريد , وبالتالي كانت الميا فعلا بتغلي وحراره العربيه بتعدي علامه النص والمراوح بتشتغل على الدرجه العاليه على طول


وبعد تغيير الطلمبه المشكله اتحلت تماماً والحمد لله

الطلمبه الإيطالي 120 جنيه
الطلمبه الألماني 110 جنيه
الطلمبه الكوري 85 جنيه (صيني ومضروبه)
الطلمبه الصيني 75 جنيه


اظن لو صباع الحراره فيه مشكله كان العداد هيخرف وممكن المراوح تشتغل , لكن مكنتش الميا هتغلي في القربه

طبعا حضرتك مكنتش فاتح غطاء القربه والمراوح شغاله !! صح ولا ايه ؟

عالعموم في الغالب هتلاقي من اعراض تلف الطلمبه

لو مسكت الخرطومين الكبار زي ما قولتلك اثناء عمل المراوح على السرعه العاليه , هتلاقي الخرطوم اليمين بارد (في مواجهه الكبوت) والخرطوم الشمال سخن مولع , وهتلاقي قربه المياه بتغلي , سواء مع عمل المراوح او بدون عمل المراوح

شكرا يا استاذ محمد علي المعلومات دي ، بس عايز اسالك سؤال لو العيب في حساس الحرارة هو الحساس ده بيتغير ؟؟؟؟؟

صباع الحراره بيتغير عادي جدا , وتمنه 30 جنيه او 35 جنيه , مش فاكر بصراحه


لما حضرتك تروح للميكانيكي , قوله الأول يبصلك على طلمبه الميا شغاله ولا لا

أن شاء الله هعمل زي ماقلت وشكرا لتفاعلك مع مشكلتي

اقتباس:

---

المشاركة الأصلية كتبت بواسطة khaladsaef

أنشاء الله هعمل زي ماقلت وشكرا لتفاعلك مع مشكلتي

---

انا تحت امرك

هي الميا بتنقص عند حضرتك بمعدل اد ايه اسبوعياً مثلا ؟

وهل الميا في القربه جواها شبه رواسب زيتيه او خلافه ؟؟

الميه يمكن بزودها بمعدل كوب ماء كل شهر ومفيش زيت داخل الاربه بس الملاحظ ان الميه كانت بترد جامد في الاربه وبتعمل صوت كركره غريبه كده

اقتباس:

---

المشاركة الأصلية كتبت بواسطة khaladsaef

الميه يمكن بزودها بمعدل كوب ماء كل شهر

---

المعدل ده كويس , مش وحش

اقتباس:

---

المشاركة الأصلية كتبت بواسطة khaladsaef

الميه كانت بترد جامد في الاربه وبتعمل صوت كركره غريبه كده

---

معلش ممكن توضح النقطه دي اكتر ؟

يعني رد الميا ده بيكون وانت بتفتح غطاء القربه وهي بارده ولا ايه بالظبط ؟

صوت الكركره ده والاربه مفتوحه وكانت الميه بتطلع منها بقوه

اقتباس:

---

المشاركة الأصلية كتبت بواسطة khaladsaef

صوت الكركره ده والاربه مفتوحه وكانت الميه بتطلع منها بقوه

---

حضرتك تقصد اثناء غليان الميا والمراوح شغاله ؟؟؟

ايوه بالظبط كده ممكن اطلب من حضرتك ترتيب الاحتمالات يعني مثلا الاول ممكن يكون ايه ؟؟ والثاني والثالث؟؟؟ معلش انا تعبتك معايا

لو الميكانيكي عايز يفك سير الكتينة يبقى شاكك في البوابة إنها مش بتفتح و بالتالي دورة المياه مش بتصل للريداتير , و ده معناه إنك لازم تغيير الحساس ده و بالمرة لو سير الكتينة قرب ميعاد تغيير يبقى غيره بالمرة علشان كده كده الميكانيكي هيفكه , و في كل الاحوال يفضل تغيير حساس الحرارة بعد إصلاح سبب المشكلة و ده علشان الحساس بيتأثر لو حرارة العربية عليت قوي , مع العلم إن الحساس بتاع الحرارة بعيد عن سير الكتينة لكن ده اجراء إحتياطي حتى لو الميكانيكي قالك ان حساس الحرارة كويس ....... و لاحظ إنك تغير الحاجات دي بالأصلي فقط و مش أي حاجة تانية .........

اقتباس:

---

المشاركة الأصلية كتبت بواسطة khaladsaef

ايوه بالظبط كده ممكن اطلب من حضرتك ترتيب الاحتمالات يعني مثلا الاول ممكن يكون ايه ؟؟ والثاني والثالث؟؟؟ معلش انا تعبتك معايا

---

يا باشا انا تحت امرك واديني بحاول اساعدك وبجتهد معاك على اد ما بقدر

بس عايز اقولك الاول , ان غلط تفتح القربه والمراوح شغاله لان ده غلط على الموتور ودوره التبريد , لان في اللحظه دي بتكون دوره التبريد كلها مفتوحه عشان تبرد اكبر قدر من الميا وبعدها الميا ترجع تاني للموتور بعد التبريد , وفتح الغطاء اثناء المرحله دي بيخلي الميا اللي بتبرد تطلع من دوره التبريد اصلا من خلال القربه

اما بالنسبه للإحتمالات فأنا هرتبها معاك من الأسهل للأصعب

1- صباع الحراره
2- ثرموثتات حراره
3- طلمبه المياه

ولو طلع الموضوع مش من الاتنين دول يبقه الحكايه اكبر من كده , وفعلا الميكانيكي هو اللي هيقدر يشخص الموضوع اكتر

اذا كان وش سلندر ولا ايه الحكايه

اقتباس:

---

المشاركة الأصلية كتبت بواسطة akram

لو الميكانيكي عايز يفك سير الكتينة يبقى شاكك في البوابة إنها مش بتفتح و بالتالي دورة المياه مش بتصل للريداتير

---

حضرتك تقصد ثرموثتات الكوعه ؟؟

طلمبه المياه مكانها ورا سير الكاتينه على طول
ثرموثتات الحراره موجود في كوعه الميا اللي راكب عليها الخرطوم الكبير الشمال بتاع الريدياتير
حساس الحراره (صباع الحراره) موجود تحت البوبينه على يمين الموتور وانت واقف في مواجهه الكبوت

مش عارف هو الميكانيكي مجبش سيرة البوابه دي بس قال انه هيفك سير الكاتينه علشان يشوف حساس الحراره ، انا حاسس انه مش فاهم قوي اصله قلي الحساس ده لو كان باظ مبيتغيرش ، انا بصراحه مش عارف هو بيتغير ولا لآ بس ممكن اجيبه واغيره الاول واشوف بس هل تغيره بيحتاج اني افك سير الكاتينه؟؟؟

اقتباس:

---

المشاركة الأصلية كتبت بواسطة khaladsaef

مش عارف هو الميكانيكي مجبش سيرة البوابه دي بس قال انه هيفك سير الكاتينه علشان يشوف حساس الحراره ، انا حاسس انه مش فاهم قوي اصله قلي الحساس ده لو كان باظ مبيتغيرش ، انا بصراحه مش عارف هو بيتغير ولا لآ بس ممكن اجيبه واغيره الاول واشوف بس هل تغيره بيحتاج اني افك سير الكاتينه؟؟؟

---

هو يمكن يقصد انه هيفك سير الكاتينه عشان يفك كوعه الميا ويطلع منها الثرموثتات ويشوفه يمكن بايظ , وبالقرب من نفس المكان بتاع الكوعه موجوده طلمبه الميا

لكن حساس الحراره موجود في الناحيه التانيه من الموتور تحت البوبينه

وصباع الحراره (او حساس الحراره) بيتغير عادي وتمنه زي ما قولت لحضرتك من 30 لـ 35 جنيه بس
وتمن الثرموثتات بيبدأ من 25 جنيه لغايه 40 جنيه

لو هتضطر تشتري ثرموثتات حاول تجيب الكوري , ويكون معاه الجوان بتاعه

شكرا يا استاذ محمد

اقتباس:

---

المشاركة الأصلية كتبت بواسطة khaladsaef

شكرا يا استاذ محمد

---

تحت امرك يا استاذي

حضرتك ممكن تشوف الموضوع ده بالمره كنوع من زياده معلومات

http://www.nilemotors.net/Nile/144754-a.html

انا قريت المشكله اللي علي الرابط اللي حضرتك بعته ، بس انات متهيالي ان الموضوع عندي اصعب شويه لان مؤشر الحراره مبينزلش خالص الا لمل ابطل العربيه ، يعني بيستمر في الصعود لحد قرب العلامه الحمرا وساعتها باضر اقف لحد العربيه ما تبرد

اقتباس:

---

المشاركة الأصلية كتبت بواسطة khaladsaef

انا قريت المشكله اللي علي الرابط اللي حضرتك بعته ، بس انات متهيالي ان الموضوع عندي اصعب شويه لان مؤشر الحراره مبينزلش خالص الا لمل ابطل العربيه ، يعني بيستمر في الصعود لحد قرب العلامه الحمرا وساعتها باضر اقف لحد العربيه ما تبرد

---

تمام كلام حضرتك , لكن انا قصدت من الموضوع بس هو انك تعرف اكتر عن حساس الحراره عن طريق المناقشات اللي بتدور بين الأعضاء

هو كمان بصراحه في مواضيع كتير بتتناول نفس حكايه حساس الحراره , لكن ده اللي لقيته ادامي بصراحه

لو حضرتك عندك وقت ممكن تتصفح كمان بعض اللينكات الموجوده في الموضوع ده

http://www.nilemotors.net/Nile/143396-a.html

طيب ايه اخبار غطا قربة المياه؟؟؟؟؟؟؟

هو لمما بيبوظ بيعمل فوران وغليان جامد فى المياه وبيسخن العربيه

انما لو فيه حاجه فى الموتور لاقدر الله هاتلاقى اعراض تانيه زى اختلاط الميه بالزيت

انا بصراحه مش عارف ايه ظروف غطي الاربه ؟؟؟ بس قبل مكنش فيه حاجه خالص كان الموضوع عادي جدا ومن يومين كنت مسافر بيها عادي جدا وامبير الحراره كان زي ما هو

طالما المية مش بتنقص يبقى الغطا سليم... ارتفاع درجة الحرارة بشدة ناتج اما عن طلمبة مية وحشة او ترموستات معلق مقفول او رادياتير مسدود

MMamdouh

شكرا يا جماعه علي مساعدتكم ، امبارح فعلا طلع الكلام زي ماقلتوا فعلا ثرموستات الحرارة اللي ورا سير الكاتينه كان قافل وكان بيحتفظ بالميه داخل الموتور ، وفعلا غيرته هو ثمنه 25 جنيه بس من غير جوان فركبت الجوان القديم ، بس المشكله اللي دي الظاهر انها اثرت علي غطي الاربه فبقي يسرب ميه والميه بتغلي ، هل اغيره بغطي جديد ولا اجيب استيراد، والف شكر تاني يا جماعه علي مساعدتكم

اقتباس:

---

المشاركة الأصلية كتبت بواسطة khaladsaef

شكرا يا جماعه علي مساعدتكم ، امبارح فعلا طلع الكلام زي ماقلتوا فعلا ثرموستات الحرارة اللي ورا سير الكاتينه كان قافل وكان بيحتفظ بالميه داخل الموتور ، وفعلا غيرته هو ثمنه 25 جنيه بس من غير جوان فركبت الجوان القديم ، بس المشكله اللي دي الظاهر انها اثرت علي غطي الاربه فبقي يسرب ميه والميه بتغلي ، هل اغيره بغطي جديد ولا اجيب استيراد، والف شكر تاني يا جماعه علي مساعدتكم

---

مبروك يا باشا على الترموثتات الجديد

غطاء القربه الألماني , زي اللي في العربيه تمنه 25 جنيه جديد من التوفيقيه

شكرا يا استاذ محمد انا تعبك معايا من امبارح بصراحه الف شكر يا باشا

اقتباس:

---

المشاركة الأصلية كتبت بواسطة khaladsaef

أن شاء الله هعمل زي ماقلت وشكرا لتفاعلك مع مشكلتي

---

تحت أمرك يا أستاذي وبإذن الله ربنا يوفقك

السلام عليكم,
غطاء القربة الأصلى ممكن تجيبه من أى مركز خدمة شيفروليه بتاع اللانوس أو الأوبترا ب 24 جنيه بعد الضرايب.أنا جايبه من عند منصور شيفروليه هو الأصلى gm.

اقتباس:

---

المشاركة الأصلية كتبت بواسطة marawanshahin

السلام عليكم,
غطاء القربة الأصلى ممكن تجيبه من أى مركز خدمة شيفروليه بتاع اللانوس أو الأوبترا ب 24 جنيه بعد الضرايب.أنا جايبه من عند منصور شيفروليه هو الأصلى gm.

---

طيب لو الموضوع متاح كده يبقه فعلا احسن واضمن من التوفيقيه

الغطا الالمانى عند ابو الحسن... غطيان الدايو اللى فى السوق مضروبة

MMamdouh

شكرا على الإفادة من الاعضاء