الموضوع: مقارنة فعلية من نوع خاص بين الاوبترا والفيرنا ......

دي مقارنة غريبة شوية
لكن دي مش مقارنة بغرض تحديد ايهما اجدر بالشراء
انا عندي الاوبترا من سنتين ... واشتريت الفيرنا للمدام مؤخرا
مش معنى ان الاوبترا تعتبر فئة سعرية اعلى من الفيرنا انها احسن في كل شيء
تعالو نشوف بعد قيادة السيارتين ايه مميزات كل سيارة وعيوبها مقارنة بالأخري
انا حاسس اني بأقارن أولادي محمود وابراهيم
...
الشكل الخارجي ..... متقارب وده عموما مسألة ذوق شخصي
وسع الكابينة ....... الاوبترا اكيد اوسع بشكل ملحوظ
وسع الشنطة ...... الاوبترا اوسع بشوية ظغننه
سحب الموتور ..... الفيرنا اشد بشكل واضح ... مع ان الفيرنا اوتو والاوبترا منيوال .... اعتقد ان التفوق ده بسبب ان العربيتين موتورهم متقارب في القوة برغم ان الاوبترا اثقل في الوزن بحوالي 250 كيلو .... وده بينعكس علي الشد وسرعة استجابة الموتور ..... لكن على المدي البعيد ( في مشوار طويل او طريق مفتوح ) اعتقد الفرق ده ح يتلاشي وممكن يكون لصالح الاوبترا
العفشة ..... الاوبترا عفشتها احسن برغم انها اخشن شوية ..... لكن شعوري في القيادة بامان اكتر مع الاوبترا
الارتفاع عن الارض ..... الاوبترا طبعا
الثبات ...... اعتقد ان الاوبترا اكثر ثبات بسبب وزنها .... لكن انا لسة ما مشيتش على سرعات بالفيرنا علشان اتكد وللعلم الفيرنا الاوتو جنك 14 مش 13 زي المنيوال
التكييف ......... الفيرنا افضل بشكل ملحوظ والسبب .... اولا هو تكييف الهيونداي اساسا افضل من الاوبترا ... ثانيا حجم الكابينة اصغر في الفيرنا مما يؤدي الى ان التكييف بيبقى زي ثلاجة الموز ... ثالثا الفيرنا مافيهاش قلتر تكييف يعني كمية الهواء اكتر والدفع اكتر
الكماليات ..... متساوية مع ترجيح للاوبترا .... الفيرنا فيها سي دي والاوبترا كاسيت ... الاوبترا فيها ريجلاش اضاءة والفيرنا لأ .... الاوبترا فيها اماكن تخزين اكتر و عدادين رحلات مش واحد
عزل الصوت .... الاوبترا افضل بشكل واضح
شياكة الكابينة والتقفيل ..... اكيد الاوبترا افضل
انا شايف ان فرق السعر بين السيارتين فعلا يساوي الفرق بينهم
....
انا من الآخر ح استعمل الفيرنا في المشاوير القصيرة وخصوصا في الصيف ..... والاوبترا في السفر والطوالي ولو المدام عاوزة العربية الفيرنا
......
ملحوظة
الفيرنا افضل مما كنت اعتقد ...... اعتقد اننا ظالمينها شوية في المنتدي ..... السيارة تساوي اكتر من الثمن المدفوع فيها
من كلام الناس عليها انا كنت فاكر انها نسخة حديثة من ال128 مثلا ( مع احترامي الكامل لل 128 اللي قضيت معاها سنين )
وفي الآخر ....... كلهم اولادي ... الاوبترا والفيرنا ...... محمود وإبراهيم ... كل واحد له طعم خاص ومميزات وعيوب ..... لكن باحبهم الاتنين قد بعض