باركولي يا شباب جبت فيكترا 2001 cdx

**ahmedpharma** · 28-04-2010 01:48 AM

السلام عليكم يا أحلى عصابه
و أخيرا بعد عناء و بحث شهرين انضميت للعصابه (ده بعد اذن العصابه طبعا)

جبت فيكترا 2001 cdx اتوماتيك 2000 سي سي
العربيه رشه بره و فابريكه دواخل لونها فيراني

بصراحه أنا جبتها بسعر حلو بس هي كان فيها حبه شغل عايزين يتعملوا
جوز مساعدين امامي و بطاحات و جوان تاكيهات و اويل سيل كوبلن فتيس و جوان كارتيره زيت و كمبروسور تكييف
على طقم الصيانه (تيل و بوجيهات و فلاتر)

و دي أولى مغامراتي في الحرفيين و كانت النهارده
احكيكلوهم على المغامره دي بكره عشان أنا خلاص مش قادر أقاوم التعب و النوم

**cayman69300** · 28-04-2010 01:57 AM

الف مليون مبروك
انا النهاردة لسة شايف فى منتدى كونتاكت كار عربية سى دى اكس
بس السعر عبيط شوية 90000 جنية
على العموم الف مبروك مرة تانية و اعمل اللى فيها حبة حبة علشان المصاريف
و فى انتظار التفاصيل و المصاريف بالتفصيل
و مع حفظ الله

**omdaz_5538** · 28-04-2010 02:00 AM

مبروك يا باشا
و فى انتظار التفاصيل بكره ان شاء الله

**BrainStorm** · 28-04-2010 02:29 AM

ألف ألف مبروك يا باشا وربنا يجعلها وش الخير على حضرتك إن شاء الله ويكفيك شرها :)

**haitham gazaly** · 28-04-2010 02:40 AM

الف مبروك و ان شاء الله تخلص كل اللى فيها
وربنا يكفيك شر طريقها وشر عين الحاسدين

**tamertamer** · 28-04-2010 02:55 AM

الف مبروك ومستنين التقرير

**nab!l** · 28-04-2010 08:48 AM

مبرو
مبروك يعنى

**lancerevolution** · 28-04-2010 09:56 AM

مبروك يا باشا و نورت العصابة

**ahmedpharma** · 28-04-2010 10:02 AM

الله يبارك فيكم يا شباب
العربيه ما شاء الله حالتها كويسه
كفاءه الموتور 83%

بالنسبه بأه لمغامره الحرفيين بتاعت امبارح
أولا أسعار قطع الغيار:

1- طقم بوجيهات جي ام 120 جنيه
2- فلتر بنزين 50 جنيه
3- أويل سيل كوبلن فتيس 60 جنيه
4- جوان تاكيهات 90 جنيه
5- جوان كارتيره صغير 110 جنيه
6- مفتاح مرايات كهربا 130 جنيه
7- تيل فرامل أمامي نوعه حاجه غريبه (sunkop ) و مكتوب عليه جي ام (غالبا صيني و الله أعلم) 140 جنيه
8- عدد 2 مساعد أمامي ماركه مايلي و عليهم ضمان سنه 640 جنيه بعد الفصال المستميت
9- عدد 2 بطاحه مساعد في علبه زرقا كده مش فاكر ماركتهم 130 جنيه

و دول من عند محل اسمه الدوليه في الحرفيين في شارع المرسيدس

ثانيا الميكانيكي العزيز اللذيذ اللي أنا اتخنقت منه على الأخر:

الميكانيكي ده اللي كان صاحب العربيه اللي اشترتها منه كان بيعمل عنده الشغل يتاع العربيه و الصيانات
هو اسمه محسن و على حسب كلام صاحب العربيه كان شغال عند واحد اسمه الشيخ هيثم في الحرفيين بردو
و بعدين محسن ده استقل بذاته و فتح ورشه لنفسه في الحرفيين
المهم الراجل كشف على العربيه تاني من الألف الى الياء و غير الحاجات دي كلها و ربط العفشه

بعد تغيير كل الحاجات دي و الدنيا المفروض تبقى زي الفل العربيه اتبرجلت و لمبه الأعطال نورت
مع أني كنت جاي بالعربيه زي الفل و لمبه الأعطال مفيهاش حاجه سبحان الله
قعد يفك و ينضف الحساسات و قعد يبخ علبه اسبراي كده مش فاكر اسمه جبته ب 25 جنيه عشان ينضف بيه
و بردو العربيه متبرجله و بعدين كانت المفاجأه الكبرى لما قلتله نحطها على الكمبيوتر قالي للأسف معنديش كمبيوتر !!!!!

المهم بعد اجتهاداته لمبه الأعطال طفت و العربيه اتظبطت يا دوب امشي بالعربيه 50 متر
و لمبه الأعطال تنور تاني و العربيه تتبرجل و الموقف ده اتكرر 3 مرات
قلتله اتصرف و حط العربيه على الكمبيوتر أنا مليش فيه مش هاستلمها الا و هي صاغ سليم
و فعلا رحت معاه عند ميكانيكي تاني صديق ليه في الحرفيين و حط العربيه على الكمبيوترو اتظبطت

و مشيت بيها زي الفل الحمدلله و طلعت الدائري و بعد حوالي 10 كيلو على الطريق حصلت حاجه غريبه
لمبه التراكشن كنترول نورت (TC ) و فضلت منوره مش عايزه تطفي و الار بي ام و العربيه واقفه بيعلى و يوطى لوحده
يعني عمال يلعب من تحت الواحد بسنه و يطلع لحد واحد و نص و بعدين ينزل تاني و هكذا

و طبعا كنت مشيت مشوار لا بأس به فقلت أروح و هأرجعله التاني النهارده ان شاء الله
و يا أنا يا هو لحد ما استلم منه العربيه على الشعره مفيهاش الهوا
ادعولي بأه ربنا يوفقني النهارده و تخلص قصه العربيه دي على خير

**ahmedpharma** · 28-04-2010 10:04 AM

يا ريت يا شباب تفيدوني في حد بتاع تكييفات عشان اعمل عنده التكييف

يا ريت يا عصابه ضروري لأني فهمت أن مش أي حد بيعرف يظبط التكييف بتاع الأوبل

الموضوع: باركولي يا شباب جبت فيكترا 2001 cdx

LinkBack

أدوات الموضوع

عرض

-

-

-

-

-

-

المواضيع المتشابهه

باركولي يا شباب ال بي واي دي

ايهما افضل توليدو 2001 ولا اوبل فيكترا 2001

باركولي يا شباب هنضم للعــــائـــله

باركولي مقدما يا شباب

باركولي يا شباب

الكلمات الدلالية لهذا الموضوع

المفضلات

المفضلات

ضوابط المشاركة