الموضوع: لأول مرة الفرحه تكتمل , مصر تنتج سيارة EgySpeed النسخة الأولى

بعد دراسة تم طرحها على شركة مصر الأولى فى أنتاج السيارات تم طرح أول نسخة من سيارة EgySpeed التى تمتاز بإنها تسع 5 أفراد و بـ4 أبواب و محرك 1400 سى سى و شنطة تكفى لـ3 حقائب سفر متوسطه الحجم و هى من فئة السيارات السيدان و تبلغ عدد 100 حصان و السرعة القصوى 160 كيلو متر و جاء تصريح خاص لمدير الشركة بأن السيارة EgySpeed سيكون سعرها بالكماليات (تكييف - الجنوط أسبور) لا يتعدى الـ25 ألف جنيه مصرى



دا مش خبر
دا كلام من تأليفى



قطعت عليكم القراءة بس أنا دماغى بتولع و هتجن و عمال أفكر و أفكارى سرحت بيا و أكيد زعلتكم بس للأسف دا الواقع مفيش حاجة أسمها عربية مصريه حتى الأن معرفش أزاى طبعا دا مش عشان أحنا شعب مش بنركب عربيات و الدليل على كدة وجود عدد كبير و مبالغ فيه من السيارات فى الشوارع ولا عشان أحنا مش قادرين نعمل محرك ولا مش قادرين نصنع أو ننتج سيارة كامله 100% ولا حتى عشان الأيد العامله الحمد لله عندنا بطاله زى الفل قولوا بس هنفتح مصنع و عايزين ناس تشتغل هتلاقى مهندسين على دكاترة على محاسبين على أعلاميين كلهم على نفس القهوة و بيشربوا من نفس الكوباية إلى مليانه صبر مع أحباط مع يأس الموضوع مش كدة خالص الموضوع إن فيه راس كبيرة فى وسط الليلة , أة دا الكلام الصح طيب يا عم مين الراس الكبيرة دى ؟ أقولك علمى علمك بس الراس دى مش مواطن عادى أو مستثمر أو عضو مجلس شعب أو واحد معاه حصانه لأ الراس دى مسؤلة عن شعب كامل لكنها للأسف مش بتفكر فى الشعب الكامل , الراس دى بتفكر فى أزاى ناخد معونه ؟ أزاى نعمل منظر أو شقلباظ زى السيرك يخلى أمريكا تسقفلنا و ترميلنا حبه قمح معونه



جهل فى التخطيط
و دا واضح جدا أحنا من أكبر الدول فى العالم فى أنتاج الغاز الطبيعى و هوب مرة واحدة و انا بتصفح كدة الجرنان ألاقى أن فيه أزمه فى الغاز الطبيعى و غاز البوتاجاز طيب ازاى يا جدعان دا احنا مصر يعنى أرضنا لوحدها بتسرب غاز دا أنا بخاف أولع سجارة و أنا قريب من الأرض لحسن الغاز يولع فى وشى ألاقى الناس بتقولى لأ يا عبيط دا فيه أزمه أصل المسؤلين مش بيحاسبوا إلى تحتهم قولت دا الطبيعى عادى بس لما بركز كدة بلاقى الصحرا دى و الخامات الطبيعيه إلى فيها دى مش هتعمل عربيه !؟


أكلين لحوم البشر و مصاصين دمائهم
فكرت تانى قولت ياض أنت عبيط لما يبقى غبور و أباظة و أبو الفتوح و البافارية و السعودى و منصور و كل دول ضاربين السعر فى العلالى طيب نفكر كدة لو مصر عملت عربية فيها كل الكماليات و عامله زى الفيرنا أو أقل كدة و فجأة يكون سعرها 25 ألف جنيه ماهو الخامات موجودة الأيد العامله موجودة المصانع موجودة يبقى مفيش جمارك ولا ضرايب إلى بتزود لحد 300% و ساعات 400% و محدش حاسس يلا ماهى أستغمايه كله بيأفش فيها و يجرى قولت أة طيب الناس دى و أصحاب التوكيلات دى أكيد مش هيبيعوا دا كفايه أن مصر هيكون فيها مركز مابعد البيع و خدمات و قطع غيار و رخص التراب قولت أة بس كدة هوا دا السبب طيب ازاى أقولك يا عم الحج (منصور و غبور و أباظة و ابو الفتوح و السعودى و البافارية) الناس دى كدة بتدى للراجل المسؤل إلى أتكلمنا عنه , طيب حلو و بعدين , الراجل المسؤل دة عايش على فلوسهم , طيب حلو و بعدين , الراجل المسؤل دة لو حد كلمه أن مصر تعمل عربيه هيقول لأ ,طبعا مفيش حاجة أسمها ليه أصل الفلوس إلى تحت الطرابيزة زادت أوى و الجشع زاد و الطمع وحش و من كتر الفلوس دى ممكن نعمل كراتين و شوله منها بس لو المسؤل دة فكر مجرد التفكير فى راحه الشعب التوكيلات دى ممكن تسحب البساط من تحت رجل المسؤل و ترميه فى الهوا و ينزل على الشعب و ساعتها محدش هيرحمه
ولا عزاء لأصحاب القلوب الرحيمه أو الضعيفة