ايه رأيكم دام فضلكم شاهين ولا ياريس ؟

الواحد لما يقعد يفكر بطريقه مختلفه وأكرر مختلفه مش متخلفه بلاقى ان عربيه زى الشاهين سعرها قريب جدا جدا من الياريس ان مكانتش اغلى إذاى الكلام ده ؟
الشاهين النهارده ب 60 ألف جنيه مفيهاش اى كماليات
الياريس ب 82900 جنيه طب اذاى الشاهين اغلى
أولا الياريس تزيد عن الشاهين بتكييف + باور +كاسيت +مرايات كهربائيه +2 وساده هوائيه +تقفيل يابانى
الحاجات دى سعرها كام ؟
الباور مش أقل من 5000 جنيه
التكييف الأصلى مش أقل من 5000 جنيه
الكاسيت التويوتا مش أقل من 1500
المرايات الكهربائيه مش أقل من 1500
الأير باج متهيألى ان سعر الواحد مش أقل من 5000 جنيه فى 2 = 10 آلاف
التقفيل اليابانى لا يقدر بثمن لكن حنفترض انه ب 7000 جنيه مثلا
زود الحاجات دى على سعر الشاهين حتلاقيها بقت ب 90 ألف جنيه ولسه تمن الكاوتش والمساعدين ايه رأيكم فى التفكير ده أنا عارف انها متتحسبش كده لكن بالطريقه دى المصانع اللى فى مصر بتنهب المستهلكين

أستاذ محمد
لايمكن مقارنة الشاهين بالياريس أقولك ليه
الشاهين انا معاك عربية ممتازة وتنفع لطرق مصر ولكن يعيبها التالى:
استهلاك بنزين مرتفع مقارنة بالياريس
الصالون الخلفى ضيق مقارنة بالياريس
الشنطة الخلفية ضيقة مقارنة بالياريس
التقفيل أنا عن نفسى مش راضى عنه واليك أمثلة أنا شفتها فى عربيتى لما اشتريتها
مثلا السماعات اللى فيها سواء الامامية او الخلفية الاتنين أسوأ من بعض ده طبعا غير الكاسيت التعبان والشماسات كل واحدة كانت ناقصة مسمار ودرج التابلوه مش بيقفل كويس
طبعا انت هتستغرب من الكلام ده لكن انا واحد دفعت فى العربية 49500 جنيه ساعت لما كانت بالسعر ده سنة 2003 دافع فيها وألاقى الحاجات دى فالواحد بيتنرفذ بصراحة
المهم زود كمان انك لازم تغير الاربع كاوتشات والمساعدين مش لازم تغيرهم لأنهم وعن تجربة المساعدين الاستاندارد بتوع العربية ممتازين جدا سواء الامامى او الخلفى
نرجع تانى للمقارنات بينها وبين الياريس
طبعا الشكل مختلف 100 % فى الاتنين
الاستايل بتاع الياريس احلى من الشاهين وأحدث
الموتور أقوى الياريس 92 حصان 1300 والشاهين 78 حصان 1400
الفتيس فى الياريس أنعم بكتيييييييير جدا من الشاهين
الدريكسيون طبعا فرق السماء والارض
أنا مش بقولك الكلام ده عشان أعيبلك الشاهين لأ طبعا
الشاهين مزاياها ان قطع الغيار الأصلية تلاقيها فى اكتر من مكان ورخيصة و موتورها معمر جدا لو انت اهتميت بالصيانة بتاعتها والابعاد بتاعتها أسهل وأوضح من ابعاد الياريس بكتير ده غير ميزة الدفع الخلفى اللى فيها وطبعا الشاسيه بتاعها برقبة شاسيه الياريس
تقريبا الاتنين عاليين عن الارض ومش هيحكوا فى اى مطب لكن
عيب الشاهين انها لما تكون محملة السوست الخلفية بتنزل جامد وطبعا لازم هتحك فى اى مطب عالى
فى حين ان الياريس مش بتوطى مهما كانت الحمولة فيها
انا طولت عليك جدا فى الكلام ولكن حبيت اوضحلك الفروقات والاختلافات بين السيارتين على قدر معلوماتى عن السيارتين وتجربتى
الخلاصة
لو انت هامك الشكل والاستايل والنعومة والكماليات يبقى عليك بالياريس
لو انت مش هامك الشكل ولا الكماليات و عايز نعومة متوسطة وعربية تمشى فى اى طريق فى مصر يبقى عليك بالشوشو
وان شاء الله تتوفق وتشترى العربية اللى ترتاح لها اكتر

الشاهين لما نيجى نقارنها باى سيارة فئة اعلى يباة نقارن بالشاهين 1600بور وتكييف دى نقطه نقطة اخرى لا تقارن الشاهين مع اليارس لان دى عربية ودى عربية دى فيها مميزات بتهم شخص ودى فيها مميزات بتهم شخص اخر - والاثنين عربيتين ممتازين ولكن كل فى الفئة السعرية الموجود فيها

يا جماعه الاستاذ محمد مش بيقارن علشان يشتري.
الراجل بيقول وجهه نظره في اسعار العربيات المجمعه في مصر و انها ارخص من المستورده و جاب مثال الياريس كارخص سياره سيدان ياباني .
طبعا رد شريف وافي جدا.
بس حنقول حاجه ان تكنولوجيا الشاهين من المستحيل انك تلاقيها في اي عربيه غير البيمر و المرسيدس لانهم يعتبروا الوحيدين اللي بينتجوا عربيت علي شاسيهات و دفع خلفي

اقتباس:

---

المشاركة الأصلية كتبت بواسطة hazem_khidr

يا جماعه الاستاذ محمد مش بيقارن علشان يشتري.
الراجل بيقول وجهه نظره في اسعار العربيات المجمعه في مصر و انها ارخص من المستورده و جاب مثال الياريس كارخص سياره سيدان ياباني .
طبعا رد شريف وافي جدا.
بس حنقول حاجه ان تكنولوجيا الشاهين من المستحيل انك تلاقيها في اي عربيه غير البيمر و المرسيدس لانهم يعتبروا الوحيدين اللي بينتجوا عربيت علي شاسيهات و دفع خلفي

---

+ اللادا :):)

والله هى مقارنة غريبة شوية بس انا هعمل لك مقارنة اغرب منها

ايه رأيك نقارن الشاهين بالنيسان صنى سعرا واداء

الشاهين اللى كانت معايا 1400 ، بس احنا لو هنقارن نقارن ال1600 علشان يبقى فيه عدل

الشاهين 1600 تمنها 70 ألف جنيه وفيها موتور 1600 سى سى 96 حصان، مكيفة وفيها باور ستيرنج وكاسيت وفوانيس شبورة وعداد Rpm وسنتر وساعة

النيسان 1600 تمنها 86 ألف جنيه ، وفيها موتور1600 سى سى ، 2 كامة و 16 صباب 118 حصان ، لكن العزم الأقصى له اقل من عزم موتور الشاهين، وفيها برضه تكييف وباور وسنتر وساعة وعداد Rpm لكن مافيهاش فوانيش شبورة، تزيد عن الشاهين ان فيها قزاز كهربا ومرايات كهرباء وقابلية رفع وخفض كل من عجلة القيادة وقاعدة كرسى السائق ونقطة تعليق حزام الأمان، وفتح الشنطة وتنك البنزين من داخل السيارة وجهاز انذار بريموت،واماكن تخزين عديدة بداخل السيارة

نأتى للأداء
محرك الشاهين مش هنعرف نلاقى لة نقط تفوق عن محرك النيسان برغم ان محرك الشاهين محرك محترم، لكن فى النهاية محرك النسيان اكثر تعقيدا لأنه 2كامة و 16 صباب وضبط هيدروليكى لخلوص الكامة وهذا طبعا كلة بينعكس على قوة الأداء سواء بالنسية للانطلاق او السرعة القصوى، لكن النقطة الإيجابية الوحيدة التى استطيع ان اقولها لمحرك الشاهين هى ان نغمة صوته انعم من نغمة صوت النيسان، حيث ان صوت محرك الشاهين احادى النغمة ومريح جدا للأذن لكن محرك النيسان برغم انخفاض صوته لكن صوته خصوصا مع تعجبل السيارة يشبه كثيرا جدا الصوت متعدد النغمة الخاص بالمحركات الأمريكية

بالنسبة للتسارع والسرعة القصوى برضه لسة النيسان متفوقة بس مش كتير ، يعنى عمليا الشاهين 1600 ممكن توصل ل 160 كيلومتر فى الساعة، الصنى هتوصل ل 180 كيلومتر فى الساعة

بالنسبة للثبات فى السرعة العالية برضه نقطة تفوق ساحق للصنى ، فبينما الشاهين لم اكن آمن اصلاقا انى اخد بيها غرزة على 120 ، الصنى بتاخد بيها غرزة على 140 بدون قلق ، عموما انا احساسى وانا سايق الصنى على 140 مثل هو نفس احساسى فى الشاهين على 120، دايما فيه 20 كم/ساعة فرق فى الإحساس

احد نقاط تفوق الصنى الأخرى هى الفرملة، هم الإتنين تقريبا قدرتهم الفرملية مش مختلفة لكن مشكلة الشاهين انها مع الفرامل الفجائية من سرعة عالية ممكن تفقد السيطرة عليها

بالنسبة للعفشة، واللى هى فى الإتنين مش مختلفة تصميميا بشكل كبير(فقط المقصات فى الصنى صاج وفى الشاهين بنظام الحدادة، بعد كدة كله واحد) هنلاقى ان قصاد تفوق النيسان فى الثبات تتفوق الشاهين جدا فى الإحساس بالمطبات، فبينماان مطبات بلدنا لا بد من التعامل معاها بمنتهى الحذر بعربية زى الصنى، هنلاقى ان الشاهين بتتعامل مع المطبات بطريقة "كل واشكر" يعنى كل المطب واشكر ربنا على نعمة الشاهين اللى خلتك متحسش بيه

نيجى للهاندلنج او السيطرة على السيارة، فى الطرق المفتوحة تتفوق الصنى بشكل واضح بسبب الثبات
على الأرض، لكن بداخل المدينة تتفوق الشاهين وده بسبب ان عرضها اقل بشكل واضح من الصنى كما
انها اقصر و اطرافها واضحة للسائق فيما يجعل عملية المرور بها من فراغ اعرض منها ب10 سم فقط عملية فى منتهى السهولة، يعنى ببساطة فى المشوار من الشغل للبيت انا كنت بلاقى نفسى مش قلقان نهائيا وانا سايق الشاهين بعكس الصنى اللى فيه جزء كبير منها انا مش شايفه

الصاج والشاسيه، صاج الشاهين الخارجى افضل فى مقاومة الأحداث العابرة مثل الجلوس على السيارة والكرات الطائشة ، اما بالنسبة للصدمات الحقيقية فلا يوجد فرق واضح، لكن فى مجال الأمان على الركاب داخل السيارة فى الحوادث الكبيرة والإنقلاب تتفوق النيسان

بالنسبة للأدوات، فتيس الشاهين تقيل وهى باردة لكن بيفك مع سخونة السيارة ودبرياش الشاهين تقيل
كما ان الشاهين غير مريحة لطوال القامة لكن وضعها ووضع ادواتها مناسب جدا لقصار ومتوسطى القامة

طبعا شنطة الصنى اوسع بكتير جدا من شنطة الشاهين، فيها حوالى 60 لتر فرق هم فرق عرض السيارتين ومساحة تنك بنزين الشاهين الموجود فى بين الكنبة الخلفية والشنطة

عزل صوت الطريق عن الكابينة تتفوق فيه الشاهين ، ففى النيسان تسمع الى حد ما صوت حفيف الكاوتش فى الطريق وصوت احتكاك الكاوتش بالزلط فى الأرض الخشنة فى حين ان الشاهين تتفوق كثيرا فى هذة النقطة

صالون الصنى اعرض من صالون الشاهين، وقعدة الكنبة الخلفية اريح فى الصنى، لكن اكاد اجزم نه بالنسبة لى كسائق السيارة الموضوع مفرقش كتير، مفبش فرق واضح فى القعدة

يبقى المنظر العام ،طبعا لا جدال ان الأختيار مسألة اذواق وانا شخصيا بحب الأشكال الحادة عن الدائرية ، يعنى لو كانت الشاهين شكلها اتغير شوية من الأمام والخلف (شوية لعب فى الفوانيس) مع الحفاظ على شكلها الحاج كنت هحب شكلها جدا، لكن يبقى لدينا الواقع اللى بيقول ان الناس فى الشارع لما بتشوفك جوة عربية زى الصنى او اللانسر او الأوبترا ....الخ بتديلك برستيج اكثر بكثير من برستيج الشاهين برغم ان فرق السعر زى ما احنا شايفين مش كتير

بالنسبة لقطع الغيار فطبعا معروف ان قطع غيار الشاهين ببلاش تقريبا ، لكن لو دخلنا فى التفاصيل شوية هنلاقى ان الموضوع مش بالبساطة دى، يعنى فعلا هنلاقى تميز للشاهين فى مسألة الفوانيس والإكصدامات ،و ادوات تغذية المحرك والمقصات وعلبة الديريكسيون ، لكن لو بصينا على كبوت او رفرف او باب او مساعدين او حاجة جوة الموتور هنلاقى الدنيا مش فارقة كتير

طبعا هى مقارنة تبدو فى بدايتها غير منطقية لكن زى ما احنا شايفين انتهت الى ان فيه اوجه تفوق واوجه قصور لكل سيارة مما يجعلها الى حد كبير مقارنة منطقية

انا بصراحة شايف ان الشاهين ليست قيمة مرفوضة من الألف للياء، لكن لها زبونها ولها استخدامها ولولا وجود زبون لها لما استمرت ، خاصة ان شركة النصر ليست ماهرة فى البيع لشركات الحكومة والقطاع العام (مثل بعض الشركات التى لا تشاهد على سياراتها ابدا نمر ملاكى ومع ذلك تستمر فى الوجود بفضل صفقات الحكومة والقطاع العام) فزبون شركة النصر الأساسى هو المواطن المتوسط وسائق التاكسى وكل منهما حساس جدا بالنسبة للسعر مقابل القيمة ، ولو ان هذا الزبون رفض الشاهين لما استمرت

أنا الحمد لله اشتريت الياريس فعلا لكن كنت حشترى الشاهين لولا ان سبعاوى خلى بيا وبعد كده راودنى هذا التفكير فلقيت ان بالمقارنه بالشاهين الياريس تعتبر رخيصه

الشركات في مصر مش بتضحك علينا و لا حاجة
بل على العكس
سيارة مثل الياريس يجب أن ينخفض سعرها قليلا ليتماشي مع العوامل التالية

كمية الانتاج الرهيبة التي تتميز بها تويوتا مما يجعلها قادرة على تخفيض السعر مع بقاء هامش ربح محترم
ثانيا السيارة 1300 سم مكعب و ثمنها بيوصل ل 100 ألف بجميع الكماليات !!!!!!!!!!!!!!!!!!!!! هل هذا منطق

أما الشركات اللي بتجمع في مصر فلها قدرة في تحديد الأسعار أقل من الشركات العالمية مثل تويوتا و نيسان و غيرها
و هذا رأيي الشخصي البحت
و إذا قارنا الشاهين بالياريس ( و لو أنهم فئتين مختلفتين )
من وجهه نظري أيضا الياريس أفضل
تكنولوجيا أعلى .........
توفير في الوقود ..........
شكل أحلى بكتير ..........
محرك جيد جدا .............

للاسف تويوتا عملت ايلي عليها...
الياريس....برة كاملة وفيها اوبشنز قد ايلي في مصر 3 مرات...وسعرها 12 الف دولار ....يعني حوالي 66 الف جنية....هنا بقي الجمارك والضرايب والوكيل بيوصلوها لـ 90 الف و100 الف كمان.....

مقارنة مش غريبة ولا حاجة ......الشاهين احسن و كتير كمان
(مجرد رأى ) بس عن تجربة الاتنين.. وعدة عوامل اخرى

ياريس طبعا من نقاش ولا وجه للمقارنه (مع اني مش بحب الاتنين)

لو عايز حاجه تستحملك فى المطباط والبهدله يبقى شاهين
لو عايز رفاهية وروشنة يبقى اليارس

هي فعلا ملاحظة غريبة مافكرتش فيها قبل كده !!!
بس كلام منطقي

بس طبعا الحاجة طالما ليها زبون واستخدام هاتفضل مطلوبة (الشاهين)
والياريس بدأت تثبت كفاءة ووضعها في البلد دليل انتشارها

"بالنسبة للتسارع والسرعة القصوى برضه لسة النيسان متفوقة بس مش كتير ، يعنى عمليا الشاهين 1600 ممكن توصل ل 160 كيلومتر فى الساعة، الصنى هتوصل ل 180 كيلومتر فى الساعة"

أستاذ سبعاوى هختلف معاك فى النقطة دى بس. صحيح انى سقت الشاهين و مسقتش الصنى عشان كده مقدرش أقارن بينهم فى الثبات و النعومة, انما فى التسارع ممكن نسبيا.
الشاهين 1600 سى سى و 96 حصان و وزنها 960 كغ فقط!!
النيسان 118 حصان و وزنها 1120 كغ.
الصنى أتقل ب160 كغ كاملين و ديه نقطة مهمة جدا فى التسارع.
صحيح انو الصنى بتدى احساس أكبر بالتسارع بفضل صوت محركها الناعم و نعومة العربية ككل, و تنتمى الى المدرسة الأمريكية التى تراعى عوامل الراحة و النعومة و سهولة القيادة, بعكس الشاهين التى تنتمى الى المدرسة الايطالية التى تحمل لواء القيادة الرياضية الخشنة, الا أننى أعتقد أن تسارعهم متقارب جدا أو قد تتفوق الشاهين بعض الشىء بفضل خفة الوزن.
أما لجهة الثبات فى المنحنيات فلازم نتذكر أشياء مهمة جدا:
الشاهين دفع خلفى أى توزيع وزن مثالى, و عدم وجود "أندير ستيرينج" بالاضافة الى قسوة نظام التعليق نسبيا, و لا يعيبها سوى ارتفاع نقطة ثقلها. و هى تنتمى للمدرسة الايطالية التى تعنى بالثبات أكثر من أى شىء أخر و نظم التعليق القاسية التى لا تفقد السيارة توزيع وزنها فى المنحنيات.
الصنى فى المقابل دفع أمامى, أى توزيع سىء جدا للوزن, بالاضافة الى احتمالية كبيرة لحدوث ال"اندير ستيرنج" لأنها دفع أمامى بمحرك كبير نسبيا 1600 سى سى. بالاضافة طبعا الى انتمائها الى المدرسة الأمريكية التى تعطى الأولوية للراحة على حساب الثبات عن طريق اعتماد نظام تعليق ناعم جدا. و كان يمكنها أن تتفوق على الشاهين فى الثبات فى حالة واحدة فقط, لو كانت مزودة بنظام اليكترونى للحفاظ على الثبات, و ذلك لتجنب ال"أندير ستيرنج", و لا أعتقد أن الصنى مزودة بنظام مثل هذا.

اقتباس:

---

المشاركة الأصلية كتبت بواسطة analyzer

لو عايز حاجه تستحملك فى المطباط والبهدله يبقى شاهين
لو عايز رفاهية وروشنة يبقى اليارس

---

1000+

العربية مش قيمة مطله لكن قيمة نسبية... يعنى ايه؟

قى واحد جارى كان بيقارن بين الشاهين و اللانوس ز طبعا طبعا كلكم عارفين انى من انصار اللانوس بشدة لكن الغريب عليكوا انى قلت له اشترى شاهين!!!

فى البداية شرحتة ليه اللانوس احسن و مكنش فيه اى صعوبة فى النقطة دى لان الفروق واضحة زى الشمس بس من وجهة نظرى انا... اراجل قاللى :اصل انا محتاج العربية عشان حركب عليها شبكة و برضة حبقى انقل فيها بضاعة للمحل بتاعى (محل خردوات)

طبعا هنا اتقلبت كل الموازين و اصبحت اللانوس كلها عيوب و الشاهين كلها ميزات بعد ما عرفت الغرض من شراء العربية و قلت للراجل بكل ثقة اشترى الشاهين و فعلا اشتراها

الفكرة هنا ان كل واحد له اولويات ووجهة نظر و متطلبات فى العربية اللى بيشتريها و بالتالى كل نوع عربية بيلبى رغبات قطاع معين من الزبائن لذلك مينفعش حد يسال "ايه احسن عربية" او "اشترى عربية ايه" لان كل واحد بيفكر غير التانى... كل اللى نقدر نعملة اننا نوضح العيوب و الميزات لكل عربية و صاحب الشان بعد كدة يحدد ايه المناسب ليه

فى النهاية نكتشف ان اليارس و الشاهين مش احسن من بعض... هما مختلفين عن بعض و كل واحدة ليها زبونها اللى يقدرها

MMamdouh

اقتباس:

---

المشاركة الأصلية كتبت بواسطة فادى

"بالنسبة للتسارع والسرعة القصوى برضه لسة النيسان متفوقة بس مش كتير ، يعنى عمليا الشاهين 1600 ممكن توصل ل 160 كيلومتر فى الساعة، الصنى هتوصل ل 180 كيلومتر فى الساعة"

أستاذ سبعاوى هختلف معاك فى النقطة دى بس. صحيح انى سقت الشاهين و مسقتش الصنى عشان كده مقدرش أقارن بينهم فى الثبات و النعومة, انما فى التسارع ممكن نسبيا.
الشاهين 1600 سى سى و 96 حصان و وزنها 960 كغ فقط!!
النيسان 118 حصان و وزنها 1120 كغ.
الصنى أتقل ب160 كغ كاملين و ديه نقطة مهمة جدا فى التسارع.
صحيح انو الصنى بتدى احساس أكبر بالتسارع بفضل صوت محركها الناعم و نعومة العربية ككل, و تنتمى الى المدرسة الأمريكية التى تراعى عوامل الراحة و النعومة و سهولة القيادة, بعكس الشاهين التى تنتمى الى المدرسة الايطالية التى تحمل لواء القيادة الرياضية الخشنة, الا أننى أعتقد أن تسارعهم متقارب جدا أو قد تتفوق الشاهين بعض الشىء بفضل خفة الوزن.
أما لجهة الثبات فى المنحنيات فلازم نتذكر أشياء مهمة جدا:
الشاهين دفع خلفى أى توزيع وزن مثالى, و عدم وجود "أندير ستيرينج" بالاضافة الى قسوة نظام التعليق نسبيا, و لا يعيبها سوى ارتفاع نقطة ثقلها. و هى تنتمى للمدرسة الايطالية التى تعنى بالثبات أكثر من أى شىء أخر و نظم التعليق القاسية التى لا تفقد السيارة توزيع وزنها فى المنحنيات.
الصنى فى المقابل دفع أمامى, أى توزيع سىء جدا للوزن, بالاضافة الى احتمالية كبيرة لحدوث ال"اندير ستيرنج" لأنها دفع أمامى بمحرك كبير نسبيا 1600 سى سى. بالاضافة طبعا الى انتمائها الى المدرسة الأمريكية التى تعطى الأولوية للراحة على حساب الثبات عن طريق اعتماد نظام تعليق ناعم جدا. و كان يمكنها أن تتفوق على الشاهين فى الثبات فى حالة واحدة فقط, لو كانت مزودة بنظام اليكترونى للحفاظ على الثبات, و ذلك لتجنب ال"أندير ستيرنج", و لا أعتقد أن الصنى مزودة بنظام مثل هذا.

---

ردود سريعة:

1- بالنسبة لموضوع التسارع فأنا محسبتهاش بالإحساس يا بشمهندس فادى، انا حسبتها بساعة وجى بى إس، يعنى حتى عداد سرعة العربيتين معتمدتش عليه، انا يوميا بروح الشغل الصبح الساعة 7 من الطريق الدائرى وبيكون فاضى تماما مما يتيح لى الكثير من التجارب، وانا بحب اوى استعمل الساعة والجى بى اس والطريق الدائرى لمسافة 26 كيلومتر فاضية تماما لمعايرة تسارع ةسرعة العربية، وبالتالى فالإحساس والشعور والمسائل الأدبية الجميلة دى خارج الموضوع، حضرتك اتكلمت على عاملين واهملت عاملين، اتكلمت عن القدرة الحصانية للمحرك ووزن السيارة واهلمت معامل الفقد فى جيربوكس وكورونا كل من السيارتين ، وطبعا اكيد حضرتك عارف كمية الفقد اللى بتحصل لما بتنقل الحركة على محورين متعامدين وهو ما يحدث فى سيارات الجر الخلفى، والعامل التانى الللى حضرتك اهملته هو معامل مقاومة الهواء، وعموما من مناقشة سابقة انا عارف انك مش بتحب تحطة فى اعتبارك لكن حقائق الحياه تقول ان على سرعة 160 يكون 60% من القدرة الحصانية للسيارة موجهة لمقاومة الهواء وبالتالى اقل فرق فى معامل مقاومة الهواء هيفرق معاك بشدة فى السرعة القصوى للسيارة، فى النهاية فإن الفيصل كان الساعة والجى بى إس

2- بالنسبة للثبات فانت برضه قلت كلام حلو جدا نظريا لكن اهملت بعض الإعتبارات التصميمية، اهمها يا باشمهندس هو فرق وجود التعليق الحر فى عفشة الصنى الخلفية فى حين ان عفشة الشاهين بنظام القطعة الواحدة (الدنجل) ولو حضرتك بصيت على عفشة الشاهين الخلفية هتلاقى ان وضع الشدادات الخمسة الخاصة بالدنجل (2 شداد بطول العربية، 2 شداد قصير مائل، واحد شداد بعرض العربية) بتقلل جدا من حرية حركة العجلات الخلفية راسيا فى المطبات وبالتالى بتشيل العربية كلها معاها وده بيقلل الثبات فى السرعة العالية بعكس منظومة التعليق الحر التى تسمح لكل عجلة بالتعامل مع المطبات بصوةر شبه مستقلة(بالمناسبة، نظام التعليق الحر فى سيارات الجر الخلفى باستخدم live axle كان موجود فى الداتسون موديل 82 ومع ذلك مش موجود فى الشاهين لحد النهاردة، ومع ذلك فداتسون دى ماركة حقيرة تروح فين جنب الماركات العالمية، المهم ، ما علينا)، كمان انت اهملت شكل قاعدة العجلات فى كل من السيارتين فقفرق العرض واضح بين قاعدة العجلات المستطيلة للشاهين وقاعدة العجلات الأعرض الأقرب للشكل المربع الموجودة فى الصنى، طبعا تعرف ان كل ما كانت قاعدة عجلات السيارة اقرب للشكل المربع، وكل ما كانت مساحة اكبر من السيارة واقعة داخل قاعدة العجلات ثبات السيارة بيزيد ، شنطة الشاهين كلها خارج قاعدة العجلات وبالتالى انا كنت بحس بمشكلة لما احمل حاجة تقيلة فى الشنطة ، مرة كنت شايل 3 جراكن مية مجموع اوزانها 75 كيلوجرام فى شنطة الشاهين، العزم الناتج عن قوة كتلة الجراكن فى اى منحنى بسيط كان عامل لى مشاكل ملحوظة فى ثبات العربية على الطريق االدايرى لأن وجودها فى الشنطة مخليها بالكامل بره قاعدة العجلات بذراع عزم محترم بطول الشنطة، يعنى حولى 60 سم تقريبا، بعكس شنطة العربيات الحديثة ومنها الصنى اللى جزء ضغير منها هو اللى برة قاعدة العجلات
الحاجة التالتة اللى نت برضه مخدهاش فى اعتبارك هى مشاوير المساعدين والعفشة ودرجة مرونة قضيب منع الإنقلاب (الميزان) ، ودرجة حرية حركة قضبان التوجيه(المقصات) فى اتجاه المحور الطولى للسيارة ، هل هى صفر ام مسموح لها بحركة بسيطة باستخدام كاوتشات ،وكل الحاجات دى بتتراعى تصميميا لتحقيق الغرض المطلوب من العربية اذا كان اقصى ثبات او اقصى راحة

وبالتالى زى ما انت شايف كدة ان ما نراه فى النهاية من اداء السيارة لا يتوقف على عامل تصميمى واحد او اتنين لكن على عشرات العوامل والمعيار النهائى للمستخدم هو التجريب، وانا عشت مع كل من العربيتين فترة كافية ، كما ان لدى الأسس البسيطة لقواعد التجريب العلمى المعتمد على قراءات قابلة للتكرار وليس على المشاعر،

تبقى معلومة اخيرة لازم اصلحهالك لأنها -عفوا-خاطئة تماما وعذرك فيها انك قرأت ولم تجرب، وهى ان العربية الصنى على عكس ما قلته انت تماما، تدعم الثبات على حساب الراحة ، واسال اى واحد معاه صنى هتسمع منه مباشرة ان عفشتها ناشفة لكن ثابتة جدا على الأرض، او اقترح عليك انك ترجع لمنتدى النيسان وتشوف الكلام على عفشة الصنى من كل ماليكها-ولو انى عارف انك طبعا مش هتقتنع بكلام اى حد من مالكيها باعتبار ان كونه اشترى سيارة يابانية ده يشكك فى قواه العقلية بما لا يضع وزنا لشهادته- ،عموما كلامك عن المدرسة الامريكية ينطبق بدرجة كبيرة على الكورولا لكن ليس اللانسر والصنى مثلا