اختصارا للوقت والمجهود....

حدد انت ناوي على ايه بالنسبة للإستقرار....يعني ناوي تكمل في مصر ولا تسافر الخليج....ولا تهاجر دولة غير عربية...هجرة مش تسافر وترجع....

أولا....
لو ناوي تستقر في مصر....يبقى لازم تمشي في الطريق المعتاد....التكليف ثم النيابة....تحضير الماستر في التخصص المطلوب....

ثانيا...
لو ناوي تسافر الخليج.....هتمشي نفس المشوار السابق....لازم تمشيه....عشان يبقالك سعر في البلاد دي....اياك والسفر ممارس عام-إلا للضرورة طبعا- وبجانب الماستر بالتوازي حضر زمالة بريطانية في نفس التخصص...وحبش السي في بتاعك بدبلومة مكافحة عدوى او ادارة مستشفيات او جودة طبية....الحاجات دي هتعليك جدا هتعليك جدا....

نصيحة اعمل حسابك انك راجع مصر....عشان متستحلاش القعدة هناك وتتتحول من اب الى بنك.....

ثالثا...
لو ناوي -تهاجر- ومش هترجع مصر تاني....يعني هتحاول تاخد جنسية البلد اللي هتسافر ليها.....
تحدد الأول انت ناوي على اي بلد....
-كندا....تحتاج معادلة كندية....صعبة الى حد كبير....يقال انها اصعب من اي معادلة....لو نجحت هتعيش هناك عيشة كريمة... سكن بالإيجار وسيارة وعيشة نظيفة جدا....بس مش هتعمل فلوس زي ما ممكن تعمل في الخليج مثلا...
المقاطعات الفرنسية اسهل من الإنجليزية في قابلية الوافدين الجدد....ولكن تتطلب مستوى غير عادي في اللغة الفرنسية

-امريكا....الحصول على المعادلة الأمريكية ممكن....ولكن اجراءات الدخول والهجرة صارت شديدة التعقيد بعد احداث سبتمبر....


-استراليا...المعادلة الاسترالية....والعمل هناك في بيئة قاسية...

اوروبا....بريطانيا...إنسى....م كن فرنسا او ايطاليا او المانيا

مشكلة السفر الى الدول غير العربية يتمثل في الآتي:

مكلفة جدا....في السفر والدراسة والإقامة...بالإضافة الى الحساب التأميني في البنك قبل السفر

صعب تكوين ثروات هناك....صعب تحوش قرشين يسندوك

مش هتعرف تربي عيالك مهما عملت....ولو كنت شيخ المشايخ....إلا من رحم ربي....

طبعا لو قررت ترجع مصر....هتبدأ من الصفر...لأنك لسه هتعمل اسم من أول وجديد....



ايه تاني؟....ايه تاني؟...مش فاكر....الأفكار اتبخرت

بس دي تقريبا خلاصة البحث والتمحيص في مثل هذه الأمور....

ولو عندك اي استفسار انا تحت امرك....