الموضوع: انا حرمت اروح التوكيل..ابو غالي وتجربتي..ضروري جدا.....!

يا جماعة انا نسيت اقول حاجة تانية

انا اشتكيت ان ال ار بي ام بيقطع
كنت باصص عليهم وهما موصلين الاسكانر علي العربية ولاقيت الكهربائي فتح الكبوت ولعب في حاجة بمفك عند البواب وقرص الاكسراتير

تفتكروا عمل ايه..........علي فكرة لسه بيقطع وبالعكس بقي يعلق فوق شوية ويبقي عالي وبعدين ينزل............اعمل ايه ؟

انا اسف يا جماعة علي التاخير اصلي كان عندي صداع فظيع من احداث النهاردة

انا لما وصلت كلمت مهندس الاستقبال فقعد يناكف شوية وقالي فعلا انهم بيستخدموا تيل جولد مع ال gm .....تخيلوا تيل جولد ب 110 جنيه.....المهم المهندس قالي استني مدير الصيانة لما ييجي(م/محمد ماجد) وهو علي وصول

قلت لحد ما يوصل اسال في الخباثة كده قطع الغيار....قالي فعلا ان فيه جولد ب 110 وفيه gm ب 152 قلتله ازاي (طبعا انا واخد خبرة من المنتدي ان جولد ب 50 جنيه حاجة كده ) قالي لا فيه جولد انواع وحوارات رحت سيبته ومشيت
قعدت في العربية واستنيت لاقيت مهندس الاستقبال بيجري عليا يقولي انت فين م/محمد ماجد وصل

دخلتله وحكيتله حكايتي قالي فعلا المفروض كان حد قالي ان فيه نوعين تيل وكده وان التيل ده بينزله من المصنع من فترة عشان gm مكنش موجود وان اصلا gm محدش بيرضي يركبه

تخيلوا قالي ايه كمان........قال ان فيه نوعين من gm كوري ومصري......قلتله ازاي مصري.....قالي بيتركب للتاكسي عشان مش معقول هيدفعوا 152 او 110 في تيل لانه بيتغير كتير اوي عندهم وهو كمان انشف شوية فمش بيخلص بسرعة.....بكام ده يا باشا قالي ب 65 جنيه

المهم وصلنا انه هيفك واني ممكن ادفع الفرق واخد التيل ال gm لاني مش مستريح للجولد لانه ناشف اوي
قلتله علي موضوع الصفارة قالي نبص علي الطنابير ممكن يكون فيها شفة هي اللي بتعمل كده

قلت فرصة يمكن اقدر اهرب واخد فلوسي واسيبلهم التيل واطلع اجيبه من برا او افكر في عمل تعديل الفرامل

بعد فترة نزلتله بعتلي عشان ادخل الورشة وقالي الطنابير فيها جزازة (مجززة)
يعني ايه ده ومنين جت ......سالني انت بتغسل العربية كتير.....قلت لا....قال ممكن تكون دخلت في مياه والطنابير سخنة فعملت الجزازة دي

ووراهاني
فعلا الطنابير عاملة زي الازاز والتيل معلم فيها (ياااااااااا اخيرا عرفت ليه زمان الفرامل كانت بتحدف ومنين الصفارة)

قلت ايه العمل.........قالي ممكن ناخدلك منها طبقة الجزازة دي وترجع طبيعي.......قلتله ممكن يكون عيب صناعة ومهما اخدت منها هتفضل زي ما هي....المهم قلتله العربية في الضمان وانا هغيرها علي حساب الضمان

قالي هيبعت للضمان ويقولهم بس احتمال كبير يرفضوا لانها مش بتعمل ولا غربلة لا حاجة ومش بتعمل غير الصفارة
قلتله نجرب...............

معلش طولت عليكم بس عشان الناس تعرف الاحداث كلها ويستفادوا

بعد فترة نزلتله تاني قالي الضمان رفض التغييرتحب نعمل ايه...قلت وايه سبب الرفض....قال عشان انت معملتش 3 صيانات (ال 10 و ال15 و ال 25)
قلتله بس ايه علاقة الطنابير بالصيانات......مفيش صيانة للطنابير غير اهمال التيل فيخلص وده محصلش.......فوراني كتيب الضمان مكتوب فيه في اول صفحة في الوش (لا يسري الضمان في حالة عدم الالتزام بالصيانات الدورية)

...قلت ممكن تخليني اكلمهم.....قالي حضرتك اتصل برقمهم لاني مش هقدر اديك نمرة مدير الضمان

اتصلت ووصلت لنمرة مدير الضمان في مصنع دايو في اكتوبر وكلمته وكان راجل محترم جدا

قالي انا مجاليش اي اجة ضمن النهاردة ومجاليش اي حاجة من ابو غالي جسر السويس...خليهم يبعتوا فاكس بشرح الحالة واحنا نرد عليها فورا
ايه ده.......مدير الصيانة بيكدب عليا.....قلت اعمل عبيط
رحت كلمت م/محمد ماجد وقلتله انهم بيقولوا موصلهمش حاجة من عندكوا وياريت تبعتوا فاكس بتفاصيل المشكلة...........هنا بقي الهمني الله والحمد لله بفكرة ممتازة وهي اني كنت بشتكي من الفرامل من صيانة ال 5000 عومان وحدفة وصفارة ومعايا امر شغل دايو موتور ايجيبت

فقلت ل م/محمد ماجد ارفقلي امر الشغل ب الحالة.....لان بكده الشكوي قبل اهمال الصيانات (بيني وبينكم انا اصلا مكنتش هسيبهم كنت عامل شكوي او ل لان مفيش اي علاقة بين اهمال الصيانات والطنابير)

اختصارا بعد مناهدات بعت ولا مبعتش اه بعت طيب موصلش طيب ابعت ميل بعتنا ميل (كل مرة لازم اتصل بنفسي بالجهتين عشان امشي الموضوع.....لو قاعد في الكافتريا ولا هتاخد اي حاجة)

المهم جت الموافقة..............الحمد لله........تغيير الطنابير بجديدة........
قلت ل م/محمد ماجد كده هتتغير ب طنابير gm صح ..قال اكيد (مانا اتلسعت قبل كده)....قلتله طيب التيل...... قال هنغيرهولك علي حسابنا بالاصلي

المهم بداوا شغل في العربية 3 خلصوا 3 ونص وانا اصلا كنت هناك من 8 ونص تقريبا

طيب استلام العربية.......لسه بيقفلوا الورق......راح م/محمد ماجد اتدخل وقالهم سلموه العربية وخلصوا الورق براحتكوا...وفعلا سلموني العربية ومشيت من غير ما ادفع ولا مليم......

الحمد لله والشكر لله
وشكرا لكل اللي دعولي وربنا يكرمكم كلكم ومحدش يقع في ضيقة زي حالاتي