السلام عليكم جميعا

معلش يا تمبراوية انا متأخر عليكم شويتين و مش بدخل المنتدي كتير مشغوليات والله

المهم عشان ماطولش عليكم

انا اليومين دول بظبط في العربية شوية حاجات و اليكم البيان و الاسعار و اللي عرفت اصورة صورتة

1- العربية كانت بتخبط جامد من تحت و انا كنت فاكر انها المقصات لتاني مرة بس روحت للعفشجي و طلعت بطاحة المساعد اليمين و غيرلي البطاحة بواحدة من عندة و التخبيط انتهي
كمان كان عندي كاوتشة اوكورديون بتاعة التيش اللي خارج من علبة الدركسيون كانت مقطوعة و غيرهالي بواحدة جديدة اشتريت جوز بـ 20 جنيه و ركبت واحدة بس ، البطاحة و تغيير الكاوتشة اخد فيهم 30 جنيه

2- تغير كل من الاتي

- رادياتير برازيلي ( 570 جنيه من الكيلاني - التوفيقية )
مصنعية + مياه خضراء 40 جنيه ( الهرم )
(ملحوظة : الرادياتير القديم اللي كان عندي كان نحاس و تم بيعة لبتاع الرادياتيرات بـ 60 جنيه )

و احب اشكر جاليليو باشا جدا لاني كنت شكاك في موضوع برازيلي ده و اتصلت بيه و هو اكدلي انه كويس ، شكرا يا جاليليو

- تصليح خرم في سربنتينة التكييف + شحن فريون امريكي ( 200 جنيه - الهرم )
بصراحة السربنتينة اللي عندي طالع عينها و الراجل كان عاوز واحدة جديدة و سألت عليها كانت بـ 850 جنيه عند الكيلاني و يوسف

- زوج طنابير امامي الماني ( 180 جنيه من محمد يوسف - فيصل )
- زوج كبالن مايلي الماني ( 400 جنيه من محمد يوسف - فيصل )
- تيل فرامل امامي بولندي ( 60 جنيه من محمد يوسف - فيصل )
- سير دينامو ايطالي ( 35 جنيه من محمد يوسف - فيصل )
- سير كاتينة ايطالي ( 70 جنيه من محمد يوسف - فيصل )
- بوجيهات NGK بلاتينيوم ( 100 جنيه من وكيل NGK شركة التوفيق فرع المعادي )
- فلتر بنزين روسي ( 5 جنيه من اي محل قطع غيار لان عند محمد يوسف بـ 25 جنيه و بردو روسي هو هو اللي بـ 5 جنيه بالظبط )
- مسامير عجل عدد 4 مسامير ( 10 جنيه من العبد لقطع الغيار- الهرم )
- كاوتشة علبة الفتيس ( 15 جنيه من العبد لقطع الغيار- الهرم )
- تنظيف كربراتير و ظبط هواء و كهرباء

عملت كل اللي فات ده عند الميكانيكي واخد 100 جنيه

- فلتر زيت ( 10 جنيه من عفت المواردي - فيصل )
- زيت موتور شيل هيليكس 5000 كم ( 98 جنيه من بنزينة شل - الهرم )
- زيت فتيس شل ( 13 جنيه العلبة من بنزينة شل - الهرم )

و اليكم الصور بالتفصيل و اعذروني في الصور لان كاميرا الموبايل اي كلام تماما

علبة الطنابير












الكبالن




سير الكاتينة




سير الدينامو




ده سير تكييف كنت هاركبة بس طلع مختلف عن اللي عندي ، اللي كان عندي بسنان و رفيع و ده من غير سنان و عريض




ده تيل فرامل امريكي بـ 80 جنيه ياريت محدش يجيبة لاني جبتة و الراجل لما ركبة لقاه بيلق لفوق و تحت و قالي مع كل فرملة هاتسمع صوت طقة ، فا غيرتة و جبت البولندي و طلع كويس وعلي فكرة بعد التجربة مش بيصفر










ياريت بقي اللي يعرف سعر طقم الدبرياج يقولي عليه و ايه احسن نوع اجيبة ؟؟