ذهبت امس لتوكيل عز العرب بالإسكندرية لعمل صيانة ال 1000 كم لل GEN-2 وصلت الساعة 8.50 صباحأ و جدت عدد 2 عربية JEEP و 1 CHRYSLER فكنت انا رابع سيارة تصل وصل بعدي 2 Gen-2
المهم الساعة 9 تماما وصل العمال و المهندسين اتضح ان كل نوع عربية له المهندس المختص بمعني ان مهندس البروتون غير ال JEEP غير ال CHRYSLER فبقيت انا اول واحد
جاء المهندس وسألني و كنت محضر ليستة عشان اقولهالو عشان اللي سمعته عن سمعتهم من واحد هنا في المنتدي فقلت يا قاتل يامقتول خاصة ان العربية كانت لسه واحدة بنت حلال بعربية 127 حكالي الجنب كله فا كنت علي اخري
اولاً: السبب الرئيسى صيانة ال 1000 و كنت جايب الزيت معايا موبيل1 و سعرة 225 جنية و هما كان عندهم توتال 240 جنية
ثانياً: فرامل اليد كانت مش بتترفع للأخر يعني بتنزل سنتين بس هيا بتوقف العربية عادي
ثالثاً:الرفرف كان مفارق بتاع 2 او 3 مم كان عاوز يتربط من اليمين و مفكوك من نايحة الشمال لانه اتشد مني في رصيف عالي المسامير اتفكت و الكليبسات اتكسرت
رابعاً:مكنتش لاقي حاجة اقولها فقولتلو الاول و التاني بيعضو في الغيار و العافشة ناشفة شوية
خامساً:ودي انا ما قولتهاش بس كان في صوت لا يذكر لما تجيب الدريكسيون علي الاخر
بعد ما رصيتلة الليستة السالفة قولتلوا هتخلص امتي قالي اتفضل حضرتك استريح في الريسبشن و الساعة 11 هتكون خالصة قولت الراجل ده بيشتغلني
المهم انا رحت قعدت قدام التليفزيون شوية و بعدين قومت الف شوية اتسحبت و رحت وقفت علي اول باب الورشة لاقيتهم اربعة ملمومين علي العربية و بعدين رفعوها وقعدوا يشتغلوا و انا عمال اروح واجي المهم قابلت واحد شاب شكلة محترم سألته بتعمل ايه هنا قالي انا بعمل صيانة ال 15000 قولتله العربية عاملة ايه معاك قالي زي الفل هي بقالها 9 شهور تقريباً و قالي ان مهندسين صيانه عز العرب جالهم امر يعملوا موضوع ال الخبطه بتاعة الدريكسيون فقولتلو هي مش ملحوظة اوي
جات الساعة 11 رحت ابص علي العربية تاني عشان افرح فيهم و قولهم اهي ما خلصتش و الساعة بقت 11 مالقتش العربية ابص يمين شمال مافيش استجمعت شجعتي و رحت داخل علي الورشة مع ان مكتوب ممنوع الدخول لغير العاملين
اخر الورشة في ساحة فيها عربيات كتير جميع الماركات اللي بيتعامل فيها عز العرب و عربيات الحوادث -ربنا يبعدنا- و لاقيت عربيتي واقفة عليها الدور في الغسيل
لاقيت المهندس جاي لي و قالي احنا عملنا كل اللي حضرتك قولته و بالنسبة للفرامل هنغير دراع الفرامل خالص مدام هيا في الضمان احنا عملنا اوردر و هنكلم حضرتك علي اخر الاسبوع
رحت عشان ادفع الحساب لقيت المحاسب بيحاسبني علي الفلتر ب 55.50 جنية و ضريبة مبيعات فقط دفعت 61.50 جنية
مافيش مصنعيات و لا اخدو فلوس عشان الرفرف و لا حاجة سألته علي دراع الفرامل تاني - اصل انا زنان شوية - قالي احنا هنكلم حضرتك و لو عاوز تسأل دي النمرة اللي تتصل بيها
انطباعي ان الناس محترمة جداً و انت قلت انقلكم صورة تفصيلية من اللي حصل عشان اللي خايف من التوكيل بتاع عز العرب
و العربية بعد ما اخدتها بصراحة فعلا زي الفل نمسك الخشب بقت انعم اكتر ما كانت يعني لو كنت بحبها بنسبة 95% دلوقتي بقت 99%
اسف للأطاله
المفضلات