الموضوع: ممكن تساعدوني يامازدويه

المشاركة الأصلية كتبت بواسطة mamido83

السلام عليكم، معلش يا باشا لو كنا متاخرين عليك فى الرد
لو العربية المازدا الى انت بتقول عليها فابريكة بالكامل تعمل فى حدود 117 الى 120 الف
العربية المازدا بسم الله الله اكبر تحفة و اوبشن كتيرة اوى و ثبات و شكل افخم و موتور 1600 يعنى اكيد اكيد هتحس بفرق جامد
موضوع ان الراجل هياخد منك 30 الف زيادة مش هعرف افيدك اوى فى النقطة دى عشان انا مش عارف سعر عربيه حضرتك يعمل كام
فى بس نقطة حاسس ان لازم اوضحها ليك، قطع الغيار فى المازدا اكيد اغلى من الانسر و استهلاك البنزين برده اعلى
المهم بعد ما تشوف السعر و تظبته صلى استخاره و ربنا ان شاء الله يوفقك للخير
اخوك محمد و تحت امرك فى اى سؤال تانى

المشاركة الأصلية كتبت بواسطة himaz

انت لو عرضت عربيتك الاانسر تجيب كام ؟ وهى بكام جديدة بنفس الامكانيات ؟
كمان حالة العربيتين عاملة ايه ؟
العربية فابريكة اوك بس برضة شوف حالة العربية من صالون و بطن العربية و التيل و الصيانة .... الخ


موضوع المصاريف بتعتك فى العربية انا رايى الكلام ده برة الموضوع


مستنين ردك يا باشا

الف شكر ياأستاذ محمد mamido83 وياأستاذ himaz علي الرد علي موضوعي جزاكم الله خير

وأكيد هيكون في فرق مابين اللانسر والمازدا بس انا حابب المازدا قوي رغم الفرق اللي هيكون كبير في

قطع الغيار والبنزين وسعر أعاده البيع بس انا مش ناوي أبعها هخليها عربية العمر أن شاء الله لو ليه

نصيب فيها وعربيتي كانت جايبه 78 الف بس معجبنيش السعر لأن العربيه لسه زيرو فعلا ومواظب

علي صيانتها الدوريه اما العربيه المازدا فافيها شويه تطبيقات خفيفه مردوده علي البارد وشوية خدوش

في الأكصدام الأمامي اما عن الصالون فالسه جديد والفرامل تمام لأني عملت بيها تست درايف أما

بطن العربيه وحاله العفشه والمساعدين فأنا أتفقت معاه في حالة التنفيذ أني هاخدها لسمارت كار علشان

أكشف عليها بس كنت عايز أعرف حاجه هو الدريفتات والأمريكاني لو تأثير علي العربيه لأن العربيه

أمبارح كان مأجرها الراجل وبالصدفه شوفتها وعرفتها من رقم اللوحه واللي كان مأجرها كان في فرح

من ضمن الزفه وعمال يخمس ويأمريك وهات يادرفتات هو وعربيه كيا سيراتو وزياده عن ربع ساعه وأنا واقف بعربيتي مستني يخلصوا الهبل ده وقلبي بيتقطع

لدرجة أني قلت هاصرف نظر وأبيع عربيتي وأجيب واحده زيرو كاش بالقسط لأني مش

ضامن ممكن يكون حصلها ايه قبل وبعد كده طالما بدأ في تأجيرها

مره آخري شكرا جزيلا لحضراتكم

المشاركة الأصلية كتبت بواسطة mamido83

السلام عليكم،

لا شكر على واجب يا استاذ احمد، المفروض كلنا هنا نساعد بعض، ببساطة كده نفيد و نستفيد

على كلام حضرتك كده حاسس و الله اعلم ان العربية اتبهدلت فى المعرض ده، و اكيد طبعا الحاجات دى كلها لازم يكون ليها تاثير على العربية، يعنى على سبيل المثال ،اكيد الكاوتش اتاكل حبة من كتر الفرك عليه، العفشة اكيد برده كان عليها تاثير

بقول لحضرتك، نصيحة لوجه الله تعالى، متستعجلش خالص، و حاول تجب عربية بيتى زى ما بنقول عليها كده، و يكون صاحبها مهتم بيها من ساعيت ما جابها و عامل كل الصيانات و الزيت بيتغير فى معاده و كل الكلام ده، لانه هيفرق معاك جامد فى حاله العربية و كمان انت هتدفع مبلغ كبير مش قليل، و حتى انت دلوقتى حضرتك مش شايف او حاسيس انك ممكن تبعها بس انت متضمنش الظروف، فالصبر اكيد حلو و حاول تجب حاجة نظيفة

و كلام حضرتك ان سمارت هتشفلك كل حاجة فيها، هما فعلا ناس كويسه و فاهمه و انا عملت كده لما جبت عربيتى، بس نصيحة لو قالولك ان العربية سليمة و معملتش اى جوادث، خليهم يبصوا على كل حتة فى العفشة و الصيانات كلها زى حالت المساعدين، المقصات، فلتر الهواء و الزيت و التكييف و تيل الفرامل و الطنابير، بص انا مكنتش واخد بالى و انا بجيب عربيتى من كل الكلام كده، انا كنت عاوز اسمع منهم بس ان العربية سليمة و مركزتش فى اى حاجة تانية، و لقيت نفسى بعد فترة صغيرة لما جبت العربية انها محتاجة مساعدين امامى و مقص و تيل فرامل، و الكلام ده بمبلغ
معلش ان كنت طولت عليك فى الكلام بس مش مستريح للعربية الى حضرتك قولت عليها انها كانت متاجره، دا اكيد كانو حطينلها بنزين 80 و كلوا بيها المطبات كلها

استخير يا باشا و شوف رد باقى الاعضاء برده و ربنا يوفقك للخير، و نا تحت امر حضرتك فى اى سؤال تانى

اخوك محمد

شكرا ياأستاذ محمد ربنا يبارك فيك وانا فعلا قلقت من العربيه دية بعد اللي انا شوفته والحمد لله

ان ربنا وقفلي ولاد الحلال اللي ذيكم علشان يدلوني علي الصح وكان الله في عون العبد مادام العبد في عون أخيه وان شاء الله لو فيه نصيب هاعمل اللي

انت قولتلي عليه كله وزياده عليه حاله الماتور عامله ايه وفلتر البنزين وهشوف لو فيه مشاكل في

العفشه او في حاجه من اللي حضرتك قلت عليها هاشوفهاهتتكلف كام وهخصمها من الفلوس وناس

اصحابي قالولي تدفع 23 الف بس لو العربيه مفهاش حاجه بس كنت عايز أعرف سمارت كار بيدي

ريبورت بالمشاكل بعد الفحص وعنوانه فين بالظبط وهل له أفرع تانيه قريبه من شبرا

وشكرا جزيلا لك أخي في الله أستاذ محمد