نصيحتى اشترى الاكسنت دلوقتى وما تستناش الاشكال الجديدة
طبعا يا جماعة انا مش بعمل دعاية لعم غبور بس قريت كام موضوع هنا عن نزول الاشكال الجديدة وكلام جميل كتير .....انا مليش دعوة بالانترا لان فية موضوع هنا اتعمل عن توقع سعرها واللى غالبا هيكون غالى جدا .......بس هنا حديثى عن النيو اكسنت
كتير مننا نفسو يشترو العربية دة وكان منهم انا اللى ربنا وفقنى واشترتها فى شهر واحد اللى فات ولو رجع الزمن بية تانى كنت هشتريها بس اوتو علشان راحة السواقة
بس هل تشتريها دلوقتى فى التوقيت دة لحد معرض اوتوماك ولا تستنى الشكل الجديد؟؟؟؟
الاجابة بدون تفكير اشتريها دلوقتى لتلك الاسباب
1:موديلات 2011 بتاعت بكين مش شرط تتسوق للشرق الاوسط وبالذات مصر فى وقتها
2:اى موديل فى اى ماركة بينزل فى بلدو بتاع سنة وشوية وبعد كدة نبدأ نشوفو فى مصر
3:غبور اصلا عندو سياسة انو ما يحرقش عربيتو يعنى ماهو لسة منزل الاكسنت سبورت دة اللى هى المفروض الفيس ليفت اللى نازلة فى بعض الدول على ان تباع مع العادية اللى بتتسوق فى دول تانية فاكيد لازم يسيبها شوية على الاقل سنة كمان
4:الاى 20 اللى نازلة فى العالم كلو بقالها سنتين ...مفيش منها غير اليتيمة اللى مرمية فى ابو رواش ومش عارفين يحددو سعرها
5:الفيرنا اللى عندنا ومازالت لسة بتتجمع فى بلدنا الوحيدة مصر
6:غبور اصلا ممكن يقرر ما يجيبهاش مصر او يخترع افتكاسة انو يجمع الاكسنت بدل الفيرنا
دة ساحر ويعملها توقعوا منو اى شئ
7:بلاش نسرح باحلامنا ونتخيل انها لو نزلت حتى بعد سنة هتنزل بنفس السعر دة اقل واجب هتزيد 10 الف وهيسموة التطور الطبيعى للتكنولوجيا وساعتها ال هتدخل فى رينج تانى انت ممكن تجيب بية حاجة تانية دلوقتى احسن
8:اة اللى يضمنلك التكنولوجيا الجديدة ....اة اللى يضمنلك ما تبقاش فيها تعقيدات ميكانيكية ويحصل فيها مشاكل واحنا مش ناقصين
9:اسعار قطع الغيار هتبقى لسة مش منتشرة وهتبقى غالية اكيد زى ما الاكسنت نزلت اول مرة مكنش حد عرفها
10:عرض مايو دة اى كلام وهيفضل ان شاء الله لحد معرض اوتو ماك هوة حد بيشترى اصلا
11:معرض اوتوماك دة انا الا اتوقع فية حاجة جديدة خالص غير انو هيبقى منظم حلو جدا وبشكل مبهر (واللى ممكن ينزلو همة اللوجان الهاتش باك...والاى 20 لو ربنا هداهم...والبولو الجديدة )ولااظن اى حاجة تانية هتبقى مختلفة غير انهم هيعرضو بقى الموديلات اللى نزلت فى مصر خلال الفترة اللى فاتت الكام شهر اللى فاتو بس بشكل تفصيلى اكتر علشان يخدو حقهم زى:
الابيزا والليون والرينو اسكالا والهوندا سيتى الفول اوبشن على موديلات الكيا على كام عربية صينى ....على عربية فيات برافو تيربو .....وهكذا
12:وفى الاخر العربية النيو اكسنت الحالية تمتاز بالاتى (حلوة وعملية وواسعة وموتورها معقول وكويس وكماليتها معقولة وتصلح لجميع الاغراض ومشاكلها تقريبا منعدمة وموضوع عفشتها دة لة ميزتة وعيوبة ومميزاتة اكتر الصراحة كفاية انك ممكن تركب 4 فوق بعض على الكنبة اللى ورا والعربية ولا تتأثر ولا تحك ومساعدين بيستحملو بجد وقطع غيارها موجودة برة فى كل حتة وسيبك من الوكيل اعملها صيانة فى اى حتة معتمدة وريح بالك ....انا عن نفسى بعمل فى وهدان اللى فى اكتوبر اريح واروق )................والسلام ختام ....واسف على ازعاجكم
...........وفى انتظاركم لفتح النقاش حتى نفيد الاخوة هنا لما فية الخير
المركز الالكترونى لخدمة السيارات - وهدان - المنطقة الصناعية الثالثة السادس من اكتوبر,
المركز الالكترونى لخدمة السيارات - وهدان
- المنطقة الصناعية الثالثة
السادس من اكتوبر, الجيزة
التليفون:
02-38342411
الفاكس:
02-38342410