الموضوع: التكييف و اعادته للحياه

كنت باعمل شغل فى العربيه فى شهر 11 اللى فات و غيرت خراطيم التكييف اللى خارجه من الكومبريسور بناء على طلب الباشا الميكانيكى و اشتريتهم و بعتهم لمعاليه و بما ان الجو كان شتاء نسيت بصراحه اشوف ايه اللى حصل فى التكييف و فرحت بالكلاكس الجديد اللى ركبته و جوز الكشافات و الفوانيس الخلفيه و الغمازات و الفوجات ( طقم جديد فى جديد و كله اصلى على فكره لزوم النظافه ) و طبعا التكييف ماشتغلش خالص لغايه فتره قريبه من حوالى 3 أشهر تقريباً و انا فى الجراج و فتحت الكبوت لمره من المرات القليله جداً لقيت فرش الكبوت متعلق على 4 كلبسات بس و منظره عار المهم زعلت جداً و فجأه لقيت نفسى بابص على الموتور من غير سبب و قلت يا واد اتفرج شوف الدنيا لقيت ماسورتين خارجين من الكومبريسور و الاتنين مكسورين ( مفاجأه غير ساره ) دورت العربيه و شغلت التكييف لقيته جثه هامده .
اتصلت بالباشا الميكانيكى الرسمى بتاعى و قلتله قاللى مش ممكن دى ماتجيش ابداً انا متأكد اننا ركبنا الشجره بتاعت التكييف و على العموم ادينى يومين اسأل فى الورشه جايز تكون مركونه هنا و الا هنا و اليومين وصلوا لشهر و بعد كده الموضوع تطور لعدم الرد على رقمى و م الى ذلك من الحركات المصريه المستحدثه فى الموبايل لغايه ما واحد تاجر صديقى فى معروف قاللى انه جنبه واحد بتاع تكييف شاطر قلتله و ماله بعت العربيه الصغيره يشوف ايه نظامها الراجل شحنها و ظبطها و خلاها تمام قلت خلاص ابعت الاوبل و بعد نص ساعه الراجل طلب شويه حاجات بيانها كالتالى :
لحام الماسورتين
اكسبنشن
دراير
قلتله توكل على الله .
و فعلاً فى خلال ساعتين كانت العربيه تمام و الغريبه بقى ان التكييف بقى حاجه مخيفه فعلا يعنى ثلاجه بجد مش زى مابنقول للمجامله اقوى من تكييف الدايو الصغيره اللى كنت باحلف بتكييفها ( التكييف بس محدش يفهمنى غلط ) ماستحملتش التكييف على اول درجه بجد مش مبالغه و قفلته و فتحت الزجاج و فى انتظار اول موجه حاره على احر من الجمر و بالنسبه للأسعار
اكسبنشن جديد 250 جنيه
دراير 200 جنيه
لحام مواسير 50 جنيه
مصنعيه و شحن 120 جنيه