الفتيس قفش الحل ايه ؟؟؟!!!

**abogogo** · 04-05-2010 01:24 AM

عربية صديق الفتيش قفش على وضع المارشدير ولا عايز يتحرك الغيار من مكانه على اي غيار يا ترى السبب ايه ؟!!

**samirayad** · 05-05-2010 08:28 PM

أول حاجه خليه يكشف على عقربة الفتيس

**windofchange** · 05-05-2010 08:33 PM

لما حصلت معايا كان الفتيس اتكسر من قاعدة من قواعدة المتصلة بالموتور....ربنا يستر وطبعا البشمهندس سمير ان شاء الله كلامه يكون الأكيد وبشروا ولا تنفروا

**abogogo** · 06-05-2010 02:42 AM

اولا شكرا لردودكم واهتمامكم وخصوصا الباشمهندس سمير
ثانيا ذهب صديقي للميكانيكي طبعا زق وهو دايس على الدبرياج افاد الميكانيكي بأن العربية واخده غيارين مع بعض ؟!! والفتيس لازم يتحل ويروح لمتخصص فتيس روحنا لآخر تقريبا قال نفس الكلام
المهم افتكرت ورشة اصلاح فتيس اعرفها روحنا ليها الصنيعي قام فك طبه من تحت العربية قطرها 15 سم وفضى الزيت وفك جزء صغير معرفش اسمه ايه بس قال ده الجزء المتصل من العصايه لتروس الفتيس وراح وداه للخراط يزوده عشان كان متاكل وحل التعشيقة وركب الجزء ده وربط الطبه وزود زيت ورجع الفتيس زي ما كان واحسن واخد 60 جنيه مصنعيه و5 للخراط

**eng.octooo** · 06-05-2010 03:09 AM

الحمد لله ان الموضوع اتحل

**macdiv** · 06-05-2010 03:39 AM

مبروووووك ... مكن لو سمحت تبعتلي رقم بتاع الفتيس ده و عنوانه على الخاص عشان ميبقاش اعلان و الاداره تزعل

**abogogo** · 08-05-2010 01:05 AM

المشاركة الأصلية كتبت بواسطة macdiv

مبروووووك ... مكن لو سمحت تبعتلي رقم بتاع الفتيس ده و عنوانه على الخاص عشان ميبقاش اعلان و الاداره تزعل

الورشة في مساكن عين شمس بتاعة الاسطى عزوز لما اروح هناك في اقرب فرصة هجيبلك رقم الورشة وابعتهولك ان شاء الله

**COOLCHEETOS** · 09-05-2010 04:06 PM

المشاركة الأصلية كتبت بواسطة abogogo

الورشة في مساكن عين شمس بتاعة الاسطى عزوز لما اروح هناك في اقرب فرصة هجيبلك رقم الورشة وابعتهولك ان شاء الله

طيب ممكن وصف تفصيلى لمكان الورشة دى عشان انا محتاجه ضرورى

**abogogo** · 09-05-2010 10:32 PM

المشاركة الأصلية كتبت بواسطة coolcheetos

طيب ممكن وصف تفصيلى لمكان الورشة دى عشان انا محتاجه ضرورى

انت هتيجي عن طريق جسر السويس في اتجاه ميدان الاف مسكن وتعدي محطة فندق السلام ومحطة العرب بعديهم محطة الجراج هتلف وترجع من جنب حديقة بدر تعدي حديقة بدر بعد بدر فيه مركز التدريب المهني وبعديه نادي النخيل كل ده على اليمين تخش يمين شارع 6 اكتوبر على يمينك سنترال النزهة وشمالك قدام مصنع كوفرتينا تاخد الشارع ده طوال وانت ماش هيكون على يمينك سور قطار السويس عين شمس وتفضل ماشي لحد مركز شباب مساكن عين شمس هيكون على الشمال آخر سور المركز هتخش شمال هتلاقي بلوكات مساكن شعبية على اليمين تحتيها كذا ورشة مكانيكي على بتوع فرامل وزيت اسأل على ورشة الاسطى عزوز بتاع الفتيس هيدلوك ان شاء الله وفي اقرب فرصة هجيب رقم التليفون وربنا معاك ان شاء الله