بالأمس كنت مروح البيت عادي جداً الساعة 6:00 بعد الظهر على طريق الأوتوستراد في إتجاه حلوان

و عند مطبات المعصرة التانية اللي عند المدخل...كان فيه بعض أمناء الشرطة و العساكر و عدد 2 رائد أو مقدم شرطة...كانوا بيوقفوا العربيات النقل و النص و الربع و ما إلى ذلك علشان يشوفوا رخصهم و الكلام ده

أمامي على اليمين كان فيه عربية ربع نقل و محملة عمال في الصندوق ..أكيد شوفتوا المنظر ده كتير....و ده ممنوع طبقاً للقانون...

لاقيت الرائد بيشاور للعسكري اللي بيوقف العربيات و قاله هاتهولي الواد ده....قام العسكري بدوره وقف أمام الجانب الأيسر من العربية و شاور بإيده للسائق انه يقف...

و فجأه بدون مقدمات...لاقيت سواق الربع نقل إنحرف بشدة من أمام العسكري علشان يهرب منه و خبط فيه خلى إيده إتنطرت جامد و لف حوالين نفسه من الخبطة....و جري بأقصى سرعة ممكنة علشان يهرب من الكمين

قام الرائد مزعق و نادى على العسكري و قاله يالا على العربية (البوكس)...العسكري واضح انه مفهمش أو مش متعود على حاجة زي دي (و انا كمان الصراحة)...فا بصله ببلاهة و ضحك....قام الرائد قاله إجري بسرعة...و بالفعل ركب هو و الرائد البوكس و إبتدوا يتحركوا...بس طبعاً الحركة دي إستهلكت ثواني ثمينة و الربع نقل كان بدأ يبعد...فقمت بدون نفكير...كبست على العربية في محاولة للحاق به...

العربية كانت شيفروليه الدبابة الجديدة...فطبعاً كانت بتجري بسرعة رهيبة...و عربيتي البيكانتو غلبانة مش ملاحقة تعمل حاجة....

و المصيبة ان أول ما العمال اللي كانوا راكبين في الربع نقل من ورا شافوا البوكس بيتحرك...قاموا بلغوا السواق علطول...و ده زود من جنونة..فبدأ يأخذ غرز مجنونة ماتنفعش خلت العمال كأنهم قاعدين في منخل...بيترموا شمال و يمين جوه الصندوق...غرزة من الغرز دي...أطاحت برفرف ماهيندرا سكوربيو و مراية ميكروباظ تويوتا و طبعاً بدون أدنى مبالاه من السواق!!

للأسف معرفتش ألحقه خالص...لكن كنت شايف البوكس جاي ورايا بسرعة محاولة للحاق به...و طبعاً مكملتش المطاردة و دخلت مدخل حلوان ...و أعتقد بأي حال من الأحوال لو حاولت أعمل معاه حاجة كان زماني لابس في عمود أو مقلوب :)

الخلاصة من هذا الموضوع...تحية و إعجاب شديد بمجهود رجال شرطة مرور حلوان و إحساسهم العالي بالمسؤولية...لما يبذلونه في الحفاظ على النظام و القواعد على الطريق...و أتمنى أن يكون هذا الأمر ممتد لما بعد ذلك...