مساء الخير لو انت بتقرا الموضوع بالليل و صباح الخير لو بتقراه الصبح

وحشتونى جدا و جايلكم انهاردة بتعديل صاروخى و فكرته سهلة بعد ما لقيت كهربائى شاطر يعملهالى ... مع العلم إنه تعديل يهبل و حاجة ببلاش كدة و مش بياخد وقت

التعديل عبارة عن لمبة تركب جوة الباب ورا العاكس بتاع البابين الأماميين مش شرط بس النيوسيراتو لأ دا ممكن يتعمل فى أى عربية بسهولة و بدون مخاطر

أولا : المكونات

1- 3 متر سلك مجوز من عند الكهربائى ب 2 جنيه

2- لمبتين صالون من عند كهربائى سيارات ... لو انت من سكان اكتوبر هتلاقيهم عند سنتر على الدين بعد فودافون ليلة القدر ... سعر اللمبتين 2 جنيه بس اتأكد الأول إن إضائتهم قوية ... و دى شكل اللمبة



3- شنيور ببنطة رفيعة و متتخضش أوى أوى كدة مش هنعمل جريمة

4- كهربائى شاطر ... لو انت ساكن فى اكتوبر ده هتلاقيه عند بتاع الاكسسوارات اللى فى الحى السابع اللى جنب سوبر ماركت خيرزاد "ولا داعى لذكر اسمه علشان ميبقاش إعلان بس هو أصلا مفيش غيره" صنايعى فوق فوق فوق الممتاز اسمه مصطفى و شغله فابريكة و اللى عايز نمرة تليفونة يبعتلى على الخاص ... و أخد فى التركيب 40 جنيه

ثانيا: التركيب
مجرد إنه هيفك البابين بالكلبسات ... هيفك العاكس الأحمر اللى فى الباب .... هيعمل خرم صغنون لل لمبة بالشنيور و يلزقها كويس على حرف الخرم اللى عمله و يعزلها بال Doubleface علشان متقعش و متسيحش البلاستيك ... مع العلم إن لمبة الصالون مش بتسخن أوى لدرجة إنها تسيح حاجة ...

بعد كدة هيوصل الطرف ال (+) فى سلك من أسلاك الباب المسئول عن التعرف على فتح الباب "لونه أصفر" ... هو بيعرف السلك ده بالمفك الTest بدون فك أو لعب فى الضفيرة

بعد كدة هيعدى الطرف ال (-) من الباب مع ضفيرة الباب لحد العلبة اللى بتبقى عند عتب الأبواب و يعدى السلك بالشكل ده و يوصله فى طرف من طرفى الحساس اللى بيتعرف على فتح و قفل الباب اللى شبه زرار التلاجة ده



يقفل الباب و العلبة و العتبة و يعمل الباب التانى بنفس الطريقة

ثالثا: سيناريو الإضاءة
فى حالة تم فتح الباب اليمين تقيد اللمبة اللى فى الباب اليمين مع نور الصالون ... فى حاة تم فتح الباب الشمال تقيد اللمبة اللى فى الباب الشمال و اليمين و نور الصالون ... حد يقوللى ليه الباب اليمن يقيد مع الباب الشمال مش العكس؟؟؟ ... لأن الباب الشمال هو اللى متجمعة عنده كل الأنوار بتاع الصالون و البابين ... حتى لو لاحظت انت لو فتحت الباب اليمين العربية مش هتصفر ... إنما لو فتحت الباب الشمال العربية هتقعد تصفر لحد ما تدور العربية أو تقفل الباب أو تشيل المفتاح من الكونتاك

منظر الصالون من جوة لما تفتح الباب بالليل مع نور العدادات الأحمر حاجة وهم اللهم صلى على النبى هههههههههه

رابعا: أسيبكوا مع الصور و أى استفسار انا فى الخدمة