الموضوع: الحمد لله - حكايتى مع الحادثة والتوكيل والنيابة و التامين

الحمد لله - الحكاية كانت لها نهاية سعيدة و حبيت اقولها لفائدة الجميع

اولا : انا عملت حادثةبسيارتى الافيو الاوتوماتيك موديل 2009 يوم 29/1/2010 فى طريق القاهرة - اسكندرية عند عودتى لاسكندرية الساعة 7 مساء عند الكيلو 60 قبل قرية الاسد مباشرة

كانت الحادثة هى ركوبى لرصيف احدى استراحات الصحراوى عند احدى التحويلات السخيفة

الحمد لله لم يصب احدمن العائلة باذى

اما السيارة فكان التلف الواضح هو الفانوس و الرفرف و الشداد ( النحية اليمنى)

و الاكصدام الامامى و مياه من الردياتير و السيارة لا تعمل يعنى حادثة اقل من المتوسطة

طلبت ونش و جاء بعد 10 دقايق و الراجل ربنا يكرمه قللى لو مامن لازم تعمل محضر

رحت لنقطة الشرطة اللى كانت امام الحادثة وعملت محضر و طبعا بعد دفع المعلوم 50 جنيه قالوا روح خد صورة رسمية من المحضر بعد اسبوع من نيابة الدخيلة ( ربنا يولع فيها)

اخدت السيارة عالونش ورحت توكيل شيفروليه فى مرغم سبت العربية بره لحد تانى يوم بعد ما اخليتها تماما من متعلقاتى الشخصية

رحت تانى يوم السبت سلمت العربية للتوكيل قالوللى احنا قدامنا 3 ايام ونعمل مقايسة خللى التامين يتابعنا

رحت عملت اخطار حادث فى التامين ( بيت التامين المصرى السعودى ) اللى لسه مامن عنده بتاريخ 4/1/2010 بمبلغ 70 الف جنيه قالولى اهم حاجة دلوقت المحضر

بعد كام يوم عرفت ان المقايسة خلصت رحت التوكيل و كانت المفاجاءة

المقايسة عملينها ب 54 الف جنيه ليه يا عم شيفروليه
1. 12 الف جنيه مصنعية
2. تغيير فارغة الجير بوكس 9 الف جنيه لشكهم فى وجود شرخ
3. تغيير الكومبروسور و دائرة التكييف و دائرة التبريد
4. و طبعا تغيير الفانوس و الرفرف و الكصدام و العتب

و عرفت ان مهندس التوكيل اخد صورة من المقايسة و الجميل فى الموضوع ان مهندس الورشة بيقولى احنا عاملينها كده عشان التامين يلاقى حاجة ينزلها

المهم بعد كام يوم رحت التامين قالوا احنا نزلنا المقايسة ل 31 الف مع وجود بنود حسب نتيجة الفحص مما يجعلها تزيد عن 35 و هو ما يساوى 50% من القيمة التامينية للسيارة
و نصح مهندس التامين بالهلاك الكلى

حاولت اجعل التامين يصلحها بعيد عن التوكيل رفض وفالوا لو تعرف انت حد خدها و هات فواتير واحنا ندفعلك

انا بصراحة قلقت بسبب موضوع الجيربوكس و خصوصا انى معرفش حد وخفت اصلح بره البس العربية بعد كده فقلت خلاص

لسه كده المحضر عشان ملفى يبتدوا يدرسوه و يا سلام بقى على القضاء المصرى

1. رحت نيابة الدخيلة و هو مكان قذر للغاية شكلا و موضوعا قالولى هات رقم المحضر الادارى من قسم العامرية تانى

2. رحت القسم و هو مكان نظيف شكلا و ليس موضوعا اخدت رقم المحضر و سالت عليه قالوا حيكلفك كتير دفعت المعلوم 25 جنيه عشان اخد صورة

3. رحت التامين قالولى احنا عايزين صورة محضر رسمى من النيابة.

4. بعد كام يوم رحت النيابة عشان اسال قالوا المحضر عند رئيس النيابة ادخل له

5. فضلت واقف 3 ساعات عشان ادخل للبيه و طبعا غمزت الافندى اللى على بابه دخل قالوه على الموضوع بعت لواحد ينزل يدور عالمحضر ويحطه امامه و طبعا ده كمان اتغمز

6. بعد ساعة دخلت للبيه لقيته بيقولى انت منتظر كل ده ليه تعال كمان كام يوم قلت حاضر يا سيدى ( اعمل ايه مضطر)

7. بعد كام يوم رحت قالولى ده البيه قال دى مخالفة و تعال كمان كام يوم

8. بعد كام يوم اخيرا اخدت المحضر و قالوا ان المخالفة حتحفظ

الموضوع ده اخد حوالى شهر و نص تحيا وزارة العدل المصرية

رحت للتامين ايتدى يحاول يطلع اى غلطة فى المحضر معرفش قاللى عايز اعاين مكان الحادث

رحنا عاينا المكان و اخد صور

قاللى الملف كده تمام حيروح القاهرة خلال اسبوع

بعد اسبوع اتصل بى مدير التعويضات فى الشركة الاستاذ / اسماعيل و هو رجل محترم و صادق و اود شكره من هنا

قاللى احنا حنعملها هلاك كلى بس حنقدر القيمة الشرائية للعربية ب 65 قلت خلاص اقل الخسائر

بعد اسبوع بعت لى بعض الاوراق اللى لازم انهيها عشان اتمام الاجراءات و هى:

1. شهادة مخالفات للسيارة

2. اصل بوليصة التمين

3. بيع رسمى للسيارة مسجل فى الشهر العقارى ( دفعت 1500 جنيه)

4. ارسال حطام السيارة لمخزن الشركة فى ناهيا و لكن ا/ اسماعيل مشكورا ارسل احد مندوبينه لاستلامها فى مرغم

طبعا لما رحت استلم العربية لقيتى مطالب بتكاليف المقايسة 2200 جنيه و كمان الارضية 20 جنيه / يوم لمدة شهرين بس دول عمولى معايا واجب فيهم

بعد ارسال السيارة كلمت ا/ اسماعيل قاللى الشيك حيخلص بعد اسبوع و ابقى كلمنى كل يوم عشان تفكرنى بالموضوع

و فعلا بعد 6 ايام عمل الشيك كان فى فرع اسكندرية

و الحمد لله صرفت التعويض يوم 28/4/2010 بعد 3 اشهر من الحادثة

الحمد لله على هذه النهاية و شكرا لكل من ساعدنى

المشاركة الأصلية كتبت بواسطة ahmed643

حمد لله على سلامتك ياباشا

بس هل لما عملت المحضر طلعت خبير تبع المرور عاين الحادثه ؟ ولا لا؟

الله يسلمك


بالنسبة للمحضر انا عملته فى نقطة الشرطة القريبة من مكان الحادث و اللى حصل ان امين الشرطة اللى كان موجود طلع معايا عسكرى عشان يعاين التلفيات و الحادثة

طبعا بعد ما خد خمسيناية لزوم المحضر