الموضوع: تقرير مقابلة عيد ميلاد المنتدى بالاسكندريه 7/5/2010

المشاركة الأصلية كتبت بواسطة بحري

والله كان يوم جميل وأنا عن نفسي كنت في غاية السعادة لاسيما بمقابلة ناس كتير الواحد كان نفسه يشوفهم من زمان ومحبتهم زادت جدا في قلبي بعد المقابلة...مش حاقول أسامي عشان منساش حد بس هم عارفين نفسهم كويس

حقيقي مكنتش حابب اتكلم في النقطة دي وقلت نشوفولها حل في المقابلة الجاية وخلاص... ولكن السلبية الوحيدة في اليوم فعلا كانت عدم الاهتمام برفع بقايا الاكل...شنوري بيتكلم عن الكوبايات وبقايا التورتة والاطباق ونسى تماما موضوع بقايا السمك والغداء وده اللي كان كاااااارثة بكل ما تحمله الكلمة من معان ولولا فضل الله بوجود بعض الزملاء زي أحمد علاء الدين وأبو عبد الله ومجدي ميشوهات مكانش حيبقى في مكان أصلا عشان التورتة تتحط فيه والذباب كان ممكن يفضل ياكل لغاية لما يكبر ويتحول لديناصورات وياكل كل الناس اللي جت المقابلة على سبيل التحلية....النظام ساعة الأكل كان كويس جدا..لكن بعد الأكل كان الوضع صعب جدا

عموما مفيش مشاكل وإن شاء الله ملحوقة وتتعوض والمرة الجاية تكون أفضل
وأنا نيابة عن شنوري أخويا الكبير اللي مستحمله وأنا عارف ليه -عشان راجل جدع- نيابة عنه باسحب هذا الاعتذار...وياريت يا إخوانا محدش يزعل الراجل ده عشان بيقلب شراني وأنا عارفه..أي نعم هو فيلسوف بس برضه شراني وقرصان على رأي كريم

المشاركة الأصلية كتبت بواسطة shnory

هو كل مره كان بيكون عتاب
انما عتاب 3 مرات والنتيجه كانت واحده
فالمرادي هو لوم شديد
كل مره كنا بنقول يا جماعه قبل ما تمشوا يا ريت نسيب المكان انضف من ما استلمناه
بس المرادي الموضوع كان اوفر شويه
كل اللي حصل اننا شيلنا العفش من الجنينه رجعناه جوه الشاليه
وبعد كده لقيت الناس كلها وقفت بره بتسلم علي اللي ماشيين
وبعدها فوجئت ان الناس كلها مشيت
وطبعا محكيلكوش
كبايات مرميه وسط الزرع
اطباق مطرح التورته
دا بره
جوه الشاليه بقي
كبايات قهوه مرميه في كل مكان
وعلي الارض
وملاعق
وزباله في كل مكان
وطبعا واحنا بنسلم الشاليه كنا عاملين زي العيل الصغير اللي معملش الواجب بتاعه وفي منتهي الاحراج
والاكيد طبعا ان خالد ابو رقيه هو الي في وش المدفع لان هو اللي يعرف السمسار وجها لوجه
ده مش عتاب
ده لوم
--------------------------------
وسامحوني
بس انا بعتذر عن تنظيم اي مقابلات في اماكن خاصه او مؤجره بعد كده
مش حنظم مقابلات غير في اماكن عامه
علشان ولا احرج حد ولا حد يحرجني
زي مقابله المنتزه وكافيه السلسله الاخيره من حوالي 4 شهور
اخوكم

[b]محمد الشنوري

المشاركة الأصلية كتبت بواسطة abou_ruqi

هو بصراحة مكنتش عاوز أنكد على الناس فرحتها
إنما من تبقى في الشالية وهما شنوري وميسو أليكس و مصطفى مهران والعبد لله , مكناش عارفين نبتدي منين و ألا منين
حالة التواليت والمطبخ و الرسيبشن و الجنينة كانوا أصعب من إننا نعمله حاجة إحنا الأربعة
ولذلك تم تعويض صاحب الشقة بتعويض مادي على سبيل بدل النظافة

ومالم أكن أحب أن يصرح بيه شنوري هو أننا قررنا
no more meetings
وللأسف الشديد لن يكون هناك مقابلات أخرى من تنظيمنا نحن المثلث السكندري
د. بحري , شنوري , خالد

أولا انا حزنت جدا لما سمعت مع إني كنت متوقع مثل هذه المعاناه لما رأيت من عدم إكتراث بعض الناس بالمساعدة في تنظيف وإزالة سواء بواقي الأكل السليم او حتى القشر وبقايا الأكل والشرب والعلب والأطباق والأكواب وخلافة, وطبعا الكل عارف يعني ايه سمك وبقايا سمك, يكفي ان اقول اننا عدد 2 سلة مهملات كبيرة (من الي بيتحطوا في الشارع) في المعمورة يعتبروا اتملوا بشكل شبه كامل وده كل لحد وقت المغرب وقبل الإنتهاء تماما من اكل التورته.

ثانيا انا بعتذر لكل من تسببنا في ضرره عن الوضع ده نيابة عن نفسي وعن باقي الأعضاء والإخوه المحترمين في منتدانا سواء الي شاركوا او الي لم يشاركوا في إزالة المخلفات لأن المسئولية مشتركة سواء بالمشاركة في الأعمال او حث الناس عليها ودفعهم إلى المساعدة .

وطبعا الناس الي شاركت وساعدت في إزالة المخلفات مش هما بس الي الدكتور بحري ذكرهم وهم مجموعة ربنا يبارك فيهم لكل اقدر اقول انه كانوا قله قليلة بالنسبة للعدد شكر الله لهم.

ومره اخري اعتذاري للإخوه شنوري وخالد ابو رقيه عن اي تقصير , ولو فيه اي مصاريف إضافية أويد فكرة تحميلها للمجموعة كاملة فالمسئولية مشتركة وانا اولهم.

جزاكم الله خيرا كثيرا

المشاركة الأصلية كتبت بواسطة alaa74

والله فعلا كان يوم جميل وممتع
وبخاصه لأنى شرفت بمعرفه الأعضاء المحترمين المميزين كل من قابلته بالأمس وبلا إستثتاء .
مش عارف أقولكم إيه لكن أتمنى أن تدوم بمشيئه الله عز وجل هذة المحبه والمعرفة الطيبه وأن نكون دائما معا أسرة واحدة تحت مظله منتدانا العزيز نايل موتورز .
سعيد جدا بمعرفتى بالأخ المحترم جدا م./ أحمد علاء الدين وكذلك الخلوق د /أحمد عبد الغنى والذى أحمل له رساله شكر خاص لشخصه الكريم من والدى العزيز ودعاء من كل قلبه له بالصحه ودوام التوفيق .
وشكر خاص جدا جدا لرجال الأسكندريه الذين نظموا هذة المقابله المميزة وبالفعل هم مميزون كعادتهم .وعلى رأسهم قائد سلاح المأكولات البحريه القبطان القرصان الربان شنورى بك .
وعضويه المؤثر جدا والنشط الدكتور المحترم أحمد بك بحرى .؟
وسيناريو وإخراج الشيك الهادئ أ/ خالد بك أبو رقيه .
ولن أنسى المهذب محمد بك الطويل والذى سمعت عنه كل الخير فى مقابلات خاصه ودائما له دور مميز .
وأخيرا دمتم جميعا بكل خير وصحه وسعادة .

علاء الشناوى

استاذ علاء
انا سعدت جدا بحضرتك وبالوالد الكريم وربنا يدم عليك وعلية الصحة والعافية ويعينك على بر هذا الرجل الكريم ,وفعلا إحتكاكي بحضرتك في المده القصيره ديه أكد لي انك من اصل طيب وطبعا لما رأيت الوالد علمت ان صلاح الأبناء نتيجة لصلاح الاباء وإهتمامهم بالتربية مع توفيق الله عز وجل.
ولا يخفى فضل والدتك عليها رحمة الله عليكما واعانك الله على برهما .
والله سعدت بلقائه جدا وكان نفسي اتكلم معاكما اكثر بس قدر الله وما شاء فعل.
واسعدني صحبتك في طريق الذهاب انت وابو هاشم صحيح كل واحد في سيارته بس فعلا خففتوا علينا حده السفر بالصحبة الجميلة ديه.
جزاكم الله خيرا