المشاركة الأصلية كتبت بواسطة ghazy12
السلام عليكم و رحمة الله و بركاته
أولا و قبل أي كلام, كل الشكر و التقدير و التحيه على المجهود الكبير جدا جدا جدا جدا من اصدقائي
الأعزاء, و اجدع اسكندرانيه... خــالد أبو رقيه, أحمد بحري, محمد شنوري ( مع حفظ الالقاب)
والله المجهود اللي بتبذلوه في سبيل اتمام المقابلات و خروجها للنور بهذا الشكل الرائع شئ مشرف جدا,
و مافيش كلام ممكن يوفيكوا حقكم بجد... ربنا يبارك فيكم
سعيد جداا و شرفني مقابلة كل اصدقائي اللي اعرفهم من قبل كده, و اللي اول مره اتعرف عليهم
و طبعا الأعضاء في غنى عن التعريف, قمه في الذوق و الاحترام و الأخلاق... ما شاء الله
الأكل كان أكثر من رائع, و عمري ما كلت سمك بالجمال ده إلا في مقابلات اسكندريه و على
يد أبورقيه, و بحري, و شنوري..... مش عارف هاكل سمك بره اسكندريه تاني ازاي..!! :))
ولا ننسى طحينة د.احمد بحري الخراااافيه, و اللي مشكورا رجع البيت تاني علشان يعملها مخصوص
و ده تقديرا منه للأعضاء, و أنا بكل تقدير بشكرك شكراً جزيلا يا دكتور, و جزاك الله خير
التورته كانت جميله جدا, و تسلم ايد أبورقيه على الديزاين المتميز لصورة الاحتفال بعيد ميلاد المنتدى
كل التقدير لمحمد شنوري اللي كان بيكلم كل الأعضاء علشان يأكد عليهم الحضور, ده غير مجهوه
الملحوظ في التنظيم... شكرااا
اليوم كان ممتاز, و القعده مع رجالة نــايل موتــورز ما يتشبعش منها أبداااا... ربنا يديم الود بيننا
---------------------------------------------------
أنا ملاحظ بعد كل ده ان الأعضاء تجاهلوا (عن غير قصد) مشاركة خالد ابورقيه الأخيره
و اللي بشكل شخصي ضايقتني من نفسي و حسستني بالأسف بجد......
كل ده ماكانش هيظهر بالمستوى الراقي, و الشكل ده الا اذا كانوا المنظمين عايزين يعملوا افضل
شئ ممكن يتعمل في سبيل اسعاد الأعضاء, و الظهور بهذا الشكل المشرف.... و في المقابل
لا اظن ابدا ان أي حد فينا من كل الأعضاء اللي حضروا يرضى ان اخواتنا يتعبوا و يبذلوا
كل المجهود ده, و في الاخر لا يقدر مننا...!!!! افتكر ان ده مش عدل أبدا, و ماحدش يقبله
يبقى بعد اذن الجميع, انا شايف ان المبلغ اللي تم دفعه في مقابل نظافة الشاليه اللي خدمنا طول اليوم
من قبل الثلاثي المنظم للمقابله و هم.. خالد أبورقيه, أحمد بحري, محمد شنوري (مع حفظ الألقاب)
يتقسم على كل من حضر المقابله (باستثناء ثلاثي التنظيم), و اظن ان ده هيكون اقل تعبير مننا
عن تقديرنا لمجهودهم الجبار اللي تم بذله في المقابله دي...
يعني أبورقيه مشكورا يقولنا دفع كام بالظبط, و المبلغ ده اياً كان يتم تقسيمه على كل الحضور
ما عدا الناس اللي تعبت طول الأيام اللي قبل المقابله تجهيزا ليها...
أرجو من الساده الأعضاء التفاعل بصدد هذا الموضوع, لأن مافيش حد يرضى ان اخواتنا هما
اللي يتحملوا شئ كلنا اشتركنا فيه, و الاستفاده منه عادت علينا كلنا, يبقى حرام هما اللي يشيلوها
و حرام يدفعوا من جيوبهم بعد كل المجهود ده...
كل سنه و نايل موتورز و ادارته في تقدم و رقي, و الأعضاء الكرام بألف صحه و سلامه...