الموضوع: عربية بين 70 - 75 ألف..أرجو المشورة

السادة الأفاضل


أولًا أحب أشكركم فعلاً على المنتدى الجميل ده وآرائكم وتعبكم الواضح فيه وفى مواضيعه وردوده

أخيرًا الواحد لقى مكان يقرا فيه آراء محترمة وصريحة عن مختلف أنواع السيارات واللى ليها واللى عليها بعد ما مكانش فيه غير ملاحق الجرايد اللى فيهم كانت كل العربيات - سبحان الله يا جماعة - قمة في الأداء والروعة والانسيابية والأمان والحنان وبتطير بيك كمان فوق الزحمة لو حبيت :o وكل وكلاء السيارات والمعارض
محترمين ونزيهين وملايكة ومش عايزين منك فلوس خالص وممكن تدخل معارضهم وتشيلك عربيتين تلاتة في شنطة وتدفع أو ماتدفعش محدش هيكلمك :o


أذكر فى ملحق من الملاحق دى أيام قضية الفرسان رئيس التحرير بتاعه كتب مقالة طويلة عريضة عن إنه ياعيني مصدوم ومش مصدق نفسه من اللى حصل ده وعنده أزمة نفسية فزيعة مريعة ياحبة قلبى :o وياريت الصحافة تبقى تاخد بالها وتتحرى كويس قبل ماتخلق شهرة للمعارض اللى زي دي وتخلى الناس تضيع تحويشة عمرها فيها :(



طبعًا بما إنى كنت بتابع ملحق سيادته من زمان، وكل إسبوع مكانش بيبطل ينزل فيه مقالات عن جمال الفرسان وحلاوة الفرسان وتسهيلاتهم والسوبر ماركت بتاعهم إلخ إلخ، فأنا دمي اتحرق وبعت إيميل لرئيس التحرير المذكور أقوله فيه ما معناه أن سعادتك أكيد أكيد بتستهبل، وأنت فاكر نفسك رئيس تحرير مجلة سيارات محترمة فعلاً ويهمها تفيد الناس؟ وأنت شخصيًا واحد من أهم أسباب شهرة الفرسان دول من خلال صفحات الملحق ومقالاتك، وشوية انتقادات تانية بس بأسلوب مهذب طبعًا وسيادتك وحضرتك وبتاع ومع ذلك ماتنشرتش طبعًا


المهم مطولش عليكم، حبيت أحييكم بس واعبر عن احترامي
نيجي للأسئلة بقى وأرجو انكم تستحملوني لأن أكيد أنتم اتسألتم الأسئلة البايخة دي قبل كده بس معلش أنا عشمي كبير :)



الحكاية باختصار إني عايز أجيب عربية في رينج ال75 الألف ، يزيدوا أو ينقصوا الفين مش مشكلة، بس مش هقدر أعدى لفئة ال80

الاختيارات اللى قدامي أفيو وكليو وجيتز وسيريون ونوبيرا

النوبيرا ماعرفش مزاياها أو عيوبها، بس شخصيًا مش بارتاحلها ومش بحب شكلها وواطية قوي وضيقة من جوه (ملحوظة : أنا 195 سم فتقريبا كل العربيات بالنسبة لي ضيقة من جوه، عشان بس ملاك النوبيرا ميزعلوش :D)


االأفيو عربية حلوة بس لما قعدت جواها في المعرض ضايقني قوى التقفيل المصري، حسيت انهم أهملوا اللمسات الأخيرة اللى بتدي أناقة للعربية وخلوا جوايا شيء منها كده، ده حتى الفرش حسيت انهم واخدين بواقى أقمشة ملايات وبيجامات كستور قديمة وعملوا منه فرش عربية بس عامة ده عيب بسيط ممكن اتجاوزه لو اقتنعت بباقى مميزات العربية ويمكن تكون العربية اللى شفتها فى المعرض دي هيا اللى مبتهدلة شوية بس


السيريون زي ماقريت في كام موضوع هنا عربية محترمة وتوكيلها ممتاز (ودي نقطة تهمني جدًا جدًا)
بس لسه مشفتهاش على الطبيعة الحقيقة ومقعدتش جواها ومعرفش هتناسب طولى ولا لأ


الجيتز لسه مشفتهاش فى معرض ولا قعدت فيها برضه بس قريت عنها هنا كلام حلو وسمعت عنها كلام حلو برضه بس قريت لأعضاء كتير هنا أن غبور توكيل سيء ومشاكله كتير وده قالقني


نيجي للختام بقى ، الكليو، الحقيقة العربية دي أول ما قعدت فيها حسيت إنها مش عربية، دي فتاة أحلامي :D
بصراحة الناس الفرنساويين دول عندهم لمسة أناقة مميزة فى عربياتهم سواء الرينو أو البيجو أو الستروين تخلى الواحد مبهور


ده غير إنها الشقيقة الصغرى لسيارة الأحلام (الرينو ميجان) اللى خطفت قلبى من ساعة ماشفتها نزلت مصر ، واهو على رأي المثل، لو ممعاكش فلوس بلاها سوسو خد أختها الصغيرة نادية :p

أنا ميال ليها أكتر حاجة بصراحة لكن فيه اعتراضات من أهلى للأسباب التقليدية، أسعار قطع الغيار والصيانة وسعر الريسيبل إلخ، بس النقطة اللى عاجباني أن حسب كلام حضراتكم برضه إنها عربية ممتازة ومفيهاش مشاكل وتوكيلها محترم


المهم أنا عايز أسئل هل فيه عيوب جوهرية في أى واحدة من العربيات دي؟ ميكانيكا أو عفشة أو ما شابه؟
طبعا العربيات كلها هتكون متظبطة وتمام وهيا زيرو بس أنا قصدي المقالب اللى بتطلع بعد ما الواحد يمشي بيها فترة
أنا بصراحة ماليش فى الميكانيكا خالص ولا افهم فيها أى شيء ومش عايز اتبهدل مع العربية ::(


وأنهي توكيل فيهم الأفضل والأريح فى التعامل؟ ويكون صيانته قريبة جوه القاهرة (بالمناسبة فين أبو رواش بتاعة صيانة هيونداى دى؟ )


وأخيراً لو حضراتكم فى نفس موقفى تختاروا إيه وإيه أسباب الأختيار وإيه أسباب الرفض برضه للموديلات التانية؟


أنا شاكر جدًا مقدمًا لحضراتكم وأرجو إنى مكونش طولت عليكم