الموضوع: مشكلة السحب والتدوير في الميجان

السلام عليكم ورحمة الله وبركاته
كنت من فترة كده (حوالي 3 أسابيع) بعت على المنتدى علشان استفسر من مشكلة عندي في الميجان 2008
وهي اني لما كنت باجي أدورها كانت بتتأخر وبحس فيها برجة خصوصا لو شغلت التكييف وسحبها كان ضعيف جداً
والناس في المنتدى مشكورين قالولي ده ممكن يكون عيب بطارية او كويلات.
المهم رحت وديتها التوكيل والمهندس قاللي نفس الكلام تقريباً وقاللي هو غالبا الكويلات. فخد مني العربية وانا انتظرت في الإستراحة علشان يخلصوها. بعد شوية لقيته جاي بيقولي تعالى معايا فرحت معاه لقيتهم خالعين الكنبة اللي ورا ومخرجين قلب العربية من جوا فأنا اتخضيت وقلتله هو في إيه؟
فلقيتهم مخرجين طرمبة البنزين ووراني الضغط فيها قاللي المفروض يوصل (مش فاكر بصراحة 2.5 ولا 3.5) وهو كان قرب الصفر.
وقاللي طرمبة البنزين لازم تتغير.
فالحمد لله غيروها ورجة العربية زي الفل.
بس قاللي وهم بيكشفوا على العربية إن في تسريب خفيف في زيت الفتيس. وقاللي اني إحتياطي ابقى اتابعه كل فتره ولو لقيته نقص ابقى ازوده لحد ما ابقى اصلحة بعدين.
انا مشيت ونسيت اسأله أتابعه إزاي وأعرف المؤشر بتاعة منين وأزوده إزاي
فهل حد عنده فكرة عن الموضوع ده؟