تجربتي مع طلمبة البنزين...
امبارح بالليل كنت رايح بورسعيد... وفي الطريق لاقيت العربيه بطلت...
احاول ادورها تاني... استحاله...
قلت كتاوت طلمبة البنزين عاوز يتفك ويتركب كالعاده... لكن فكيته وركبته ولا جديد...
وكان في كذا احتمال :
1- سير كاتينه اتقطع ( عامل 20000 كم حتي الان).
2- موبينه قطعت.
3- سلوك بوجيهات ودعت ( كانت محتاجه تتغير وانا مكسل )...
4- طلمبة البنزين.
5- حساس من الحساسات قطع.
1- فكيت العمه وفكيت مسمارين غطاء سير الكاتينه ابص عليه. (الحمد لله طلع سليم)...
2- اختبرت شرارة الموبينه اثناء ما اخويا بيحاول يدور مرش.. (تمام)
3- فكيت سلوك البوجيهات وبصيت علي سن البوجيه واحد واحد ( لو السلك قطع بيقي له بوادر ان سن البوجيه بيهبب اسود نتيجة سوء توصيل كهربي "تجربة شخصية")...
وبرده اختبرت الشراره مع المارش ( لو السلك قاطع حيسرب كهرباء لارضي العربيه وسيادتك حتتكهرب)..
4- فكيت فلتر البنزين وفتحت الكونتاكت علشان اشوف الطلمبه بترفع بنزين ولا لأ... (مافيش بنزين)... حاولت اسمع صوتها. الموتور مش شغال.
يبقي كده يا اما الطلمبه يأما الكتاوت...
صعب الكتاوت يقطع فجأه فاحتمالية الكهرباء ضعيفه... والاحتمال بنسبة 90% طلمبة بنزين..
المهم عملت تليفون لوالدي وطلبت منه يجيب لي طلمبه استيراد او موتور صيني...
بعد ساعه لاقيته جاي ومعاه موتور بوش الماني (بتاع مرسيدس او bmw مش فاكر )... كان عندنا من زمان لكن ماكنتش اعرف انه ممكن يركب لاني مافكيتش الموتور قبل كده ومش فاكر شكل الي عندنا...
ولما وصل كنت فكيت طلمبة البنزين وطلعت الموتور... قارن ده بده.... هو هو.
وجرب. تمام التمام...
الموتور في علبه صفراء وحاحاول اجيب لكم صورته...
بس بحد الموقف كان بايخ جدآ وبيبقي بايخ اكثر لو معاك العائله...
بوادر تلف الطلمبه معايا:
1- صوت زنه مستمره من الكنبه الخلفيه من حوالي شهر...
2- لو التانك قرب للربع تلاقي العربيه ممكن تقطع وتبطل...
3- حاجه غريبه حصلت قبل تلف موتور الطلمبه ب 1/2 ساعه.
مؤشر البنزين رفع ربع التدريج لمدة 5 دقائق وبعدين رجع لمستواه الطبيعي...
ومن اهم اسباب تلف الطلمبه عندي (فيما دون العمر الافتراضي)... كانت شطبت بنزين من حوالي 3 شهور وبقيت ادور واحاول امشي بيها لاقرب بنزينه وكانت تبطل وانا ماشي... (وده طبعآ بيسخن الموتور جدآ..)
نصيحه لو حسيت ان طلمبة البنزين بدأت تقل باصلها ماتترددش انك تغيرها فورآ وخللي القديمه احتياطي معاك في الشنطه...
عند فك وتركيب الموتور الجديد:
1- حتلاقي الخرطوم المتوصل بالموتور ماسك حتسخن عليه بولاعه عاديه مش سخان حاجه بسيطه لحد ما يحل معاك...
2- عند تركيب الموتور الجديد ( لو مش حتغير الفلتر) خللي بالك من اتجاهه علشان يكون راكب في الفلتر مظبوط... انا عن نفسي ماعرفتش افك الفلتر القديم علشان اركب الجديد...
http://www.aa1car.com/library/fuelpump_cutaway.jpg