-
هو انت عملت الصح بانك سيبت العربية تتحرك الى الامام شوية علشان تعطى للميكروباص
مساحة ياخد فيها قراره سواء بضرب فرامل خطر او انه يتفادى الموقف بغرزة
لكن فى نفس الوقت كان لازم تسيب العربية تتحرك للامام وتنتبه للامام مش للمراية
وتفرمل قبل ما تريح على العربية اللى امامك حتى لو مجرد ترييحة او خبطة صغيرة
وعموما قدر الله وما شاء فعل والحمد لله انها جت سليمة
-
-
انت عملت الصح
انا عملت حاجة زي كدة بس كنت خارج من شارع جانبي وفجأة لقيت نفسي داخل علي الشارع العمومي بسرعة كبيرة فقلت ألحق نفسي قبل ما ألاقي حاجة تلطشني من العمومي وكان ورايا كورولا وكان هو كمان بيجري ورايا
وبعد ما ضربت فرامل لقيت نص العربية في الشارع العمومي ولقيت أوتوبيص كان جاي بسرعة هيشيللي الأكصدام ويفرتكة
المهم في ثانية العربية وقفت من هنا وانا أديت مرشدير ورجعت علي طول وكنت شايف الكورولا ورا واقفة بس ويا دوب هلزق فيه بس كان لازم أخبطة سنة عشان الأوتوبيس كان هيفرمني
وهوب خبطته حاجة بسيطة
الأوتوبيس يدوب عدي وكان في بتاع 5 سم مابيني وبينه
ونزلت أشوف العربية لقيت مفيش خربوش في أي عربية وأستنيت تعليق بتاع الكورولا
هو الراجل طلع زوق جدا وقاللي حاجة واحدة : أنا أرخص !!!!
وكان علي وشه ابتسامة كدة قمت ضاحك أنا كمان وقلتله أنزل شوف لو فيها حاجة
قاللي لأ ياللا مفيش مشاكل
:)
-
فعلا عندكم حق انا غلطت لما بصيت في المرايه كان لازم اريح لقدامي قبل ما اخبطه بسنه
بس المشكله ان كل ده حصل في جزء من الثانيه رد فعل
بس اوعد لا قدر الله ده حصل تاني ححاول اخد بالي من اللي قداميو انا ببص ورا
وربنا يخليلنا السواقه في مصر :)
-
في رأي الشخصي حط نفسك مكان الراجل اللي انت لزقت فيه هل هترضي بالحصل ده و لا لأ
-
معلش حصل خير و قدر الله و ما شاء فعل بس انصحك انك تسيب مسافة شوية بينك و بين اللى قدامك على قد ما تقدر و كمان ما تجريش حتى لو الطريق جرى طالما انت جوا البلد و مش على طريق سريع
-
ربنا سترها الحمد لله واري انه حل وسط وسليم بدل ميخرشمك ويخرشم اللي قدامك لأنو ميكروباص والحمد لله ان ربنا وفقه لأخذ الغرزة
-
يا جماعه انا كنت سايب مسافه بيني و بين اللي قدامي
و لو مكنتش عملت كده كانت عربيتي و عربيه اللي قدامي ادشدشت يعني مكنتش اناني و اخبط اللي قدامي علشان اتخبط و كده
و مش انا اللي كنت بجري اللي ورايا هي ديه الفكره كلها
و شكرا جدا ليكم كلكم
-
الحمد لله على سلامتك.
على فكرة رغم اعتراض الكل على إنك تلمس اللي قدامك لكن ده عمليا أحسن حل.
في حالة إن في مسافة بينك و بين اللي قدامك و لا قدر الله اللي وراك لبس فيك عربيتك هتتخبط من ورا و تطير على اللي قدامك. كده ال3 عربيات إتخبطوا، لكن لو إنت لامس في عربية اللي قدامك و خبطك من ورا، أنت و اللي قدامك ككتله واحده هتطيروا لقدام مع بعض. في الحاله دي اللي قدامك مش هيتئذي. صحيح إن الخبطه عندك ورا هتكون أجمد شويه بس ده أرحم من خبطه ورا و قدام.
و في الأول و الآخر ربنا هو اللي بيسترها بس إحنا نعمل اللي علينا و نمشي صح بقدر الإمكان.
-
اعتقد كل موقف له حيثياته......فصعب نحكم لان انت اللي سايق واكتر واحد تقدر الموقف اللي انت فيه.........بس الصح انك تحاول تعدي الموقف باقل الاضرار
وربنا يسترها علينا جميعا
Content Relevant URLs by
vBSEO 3.6.0 PL2