الموضوع: حد فيكم يعرف حاجة عن الريس الصينى (مش رئيس الجمهورية طبعا) أنا قصدى الموتوسيكل

الصيني للاسف بقى هو القاعدة و الاساس

يعني ما ينفعش تمشي في شارع ما تلاقيش موتوسيكل صيني

و من كل 100 موتوسيكل في الشارع فيه 95 صيني ...... و 3 هوندا و 2 ماركات اخرى (كاواساكي على سوزوكي و قليل جدا من الهارلي)

نسال ليه؟

اولا بملاليم

ثانيا من برة هلا هلا

ثالثا كبير و مغري

رابعا ليه تدفع 30 الف في ياباني مستعمل لما ممكن تدفع اقل من نصهم في صيني زيرو !!

نيجي بقى للردود

1- هو مش بملاليم صدقة و سبيل .... بملاليم لانه من اسوا الخامات

يعني سهل جدا في ثانية يعطل بيك و يقرفك ..... و آاااااااه من الموتوسيكل اما يعطل ......

العربية ممكن تركنها و لو حتى زق .... و تقفلها و تروح تجيب الميكانيكي

انما الموتوسيكل ..... انسى ..... هترجع مش هتلاقيه

لازم يا اما تجره لو الميكانيكي قريب و هتزهق و تطهق في عيشتك

يا اما واحد صاحبك يجيب الميكانيكي و يجيلك بيه مكان ما انت و ادفع يا معلم

يا اما لو العطل ما يتصلحش الا في الورشة يبقى هات عربية ربع نقل و حمل و ادفع برضه يا معلم

غير ان العطل ده ممكن يبقى خطر على حياتك زي عطل في الفرامل اثناء السير

2- تكملة المثل ايه؟ و من جوة يعلم الله !!!

صدقني مش هيعمر معاك ...... و هيفتح بقه بدري بدري ... يا جماعة ده العربيات الصيني خربت بيوت الناس و دي عربية مش موتوسيكل موتوره مفتح و مكشوف !!

3- هات موتوسيكل صغير و معقول ياباني و لا تستسلم للاغراء انك تركب الاكبر منه صيني

4- صدقني الفرق يستاهل في كل حاجة ...... استقرار و امان و دول ممكن في ثانية يفرقوا بينك و بين لا قدر الله الكرسي ابو عجل او الكفن .... غير بقى حاجات كتير ...... قلة الاعطال ..... سعر اعادة البيع ...... و خلاص ..... لو مامعاكش ال 30 ..... هات ياباني في حدود 10-15 صغير بس يكون حالته نضيفة من مكان مضمون ..... و اما ربنا يكرمك و يفرجها عليك ابقى بدله بالاعلى ...... بس و الله صدقني ....... فرخة ياباني و لا جمل صيني !