الموضوع: فيات 128 عاجل جدا

أهلا بالاخ عبد الرؤوف

هأجاوبك على قدر علمي على السؤال الاول و الثالث لان الثاني معرفوش

كبس الموتور أنا عملته لما كنت بأشتري العربية و عملته كمان على عربيتي القديمة قبل ما أبيعها , هو طريقة لقياس ضغط السلندرات جوه الموتور و دي بتبقى مؤشر على قوة سحب الموتور و بالتالي حالته .

الراجل بيفك البوجيهات و بيركب مكانها حاجة شبههم و بعيدن يخليك تدور الموتور و بمؤشر معين بيشوف قوة الكبس قد ايه و بالتالي بيعرف حالة الموتور كام في المائة .

السؤال الثالث : عمود الكامة هو المسئول عن فتح و قفل صمامات البنزين و العادم
أو بمعنى آخر تنظيم القفل و الفتح و مش عارف ايه هم الحاجتين اللي قال لك عليهم
ممكن يكونوا جلب الكامة ؟؟؟؟؟؟؟؟؟؟؟؟

المهم حسب معلوماتي لو عامود الكامة عطل العربية هتقف و الموتور مش هيدور لان الصمامات مش هتقفل و تفتح لكن عربيتك موديل 1976 و ده موديل قديم و بالتالي حسب معلوماتي فيه مسافة أو interface بين الصمامات و البساتم و بالتالي لو عامود الكامة عطل العربية هتقف و بس .

لكن حسب معلوماتي و أرجو التصحيح من باقي الاخوة الموديلات الحديثة لايوجد خلوص بين البساتم و الصمامات و تسمى non interface يعني لو حصل قطع مثلا في سير الكاتينة اللي بينظم حركة الكامة و بالتالي قفل و فتح الصمامات ممكن الصمامات تضرب في البساتم و تدخل على عمرة موتور و نفس الشئ يهيئ لي لو حصل حاجة في الكامة ممكن الصمامات تصطدم بالبساتم لكن لو عربية قديمة مش مشكلة .

أنا مرة في عربية الوالد القديمة فيات 125 بولندي موديل 1977 و كنا لسه عاملين عمرة كاملة للموتور و بعدين جلب الكامة أتكسرت و أحنا على الطريق الصحراوي لكن ربنا ستر و كنا في أوله و العربية وقفت تماما و الموتور لم يدور
فقطرتنا عربية نقل للميكانيكي بتاعنا و كشف على الموتور و يومها فك الموتور مرة أخرى و غير جلب الكامة و طبعا كان وشه في الارض لانه هو اللي عمل العمرة
و كان المفروض ياخذ باله لكن ربنا ستر و لم يحدث شئ للموتور او للبساتم