كنت عايز اخد رأيكم ..انا ناوي ان شاء الله اجيب بي ام 316 اوتوماتيك و عايز اجيب جنبها عربية تانية صغيرة عشان تريح البي ام و استغل حجمها الصغير في الزحمة و كمان عشان استخدام زوجتي...يعني عربية تانية مش اساسية
و كانت عاجباني الجيتز بس شكلها قديم قوي و غالبا مش هاتنزل 2011...انا ناوي اشتري موديلات 2011 و عشان كده هافترض ان موديلات 2010 هي نفس موديلات 2011
انا صرفت نظر عن الجيتز و كل الكوري و عايز اجيب حاجة اوروبي و ممكن ياباني و ان كنت افضل الاوروبي
السعر اللي اقدر ادفعه في العربية دي 100 -125 الف
انا لسه قدامي وقت كتير افكر و اختياراتي انحصرت في الاتي:

- بيجو 207 110,000 جنيه
اكتر حاجة عاجباني فيها شكلها...فعلا الفئة دي من بيجو تصميماتها في منتهي الجمال و تعكس الذوق الفرنسي..سواء 206 او 207 فعلا شكلهم رائع....ولكن..الحلو مايكملش...سامع شكاوي كتير من التوكيل و عدم توفر قطع الغيار...كان عند ولدي زمان 405 و مرة اتركنت شهر عشان مش عارف يصلحها و التوكيل ماكنش فيه القطع المطلوبة...و كمان مش شايفها كتير في الشارع و دي حاجة تقلق...انا مش من النوع اللي بيفضل راكب العربية لاخر العمر و ان شاء الله ممكن اغيرها في حدود 5 او 6 سنين...و في الحالة دي ممكن ماحتاجش قطع غيار...يعني اول ما تبدأ تفتح بقها هابيعها و بما انها ماركة محترمة يبقي هاتمشي الخمس سنين كويس...رايكم ايه؟

-فيات جراند بونتو 125,000 جنيه
نفس الكلام اللي قلته علي البيجو بس اقل جمالا من وجهة نظري و برده مش منتشرة مش عارف ليه بس يمكن توكيلها و قطع غيارها احسن...ايه رايكم

-سكودا فابيا 125,000 جنيه
عاجبة زوجتي مش عارف علي ايه...شكلها مش عاجبني خالص مع اني اعشق حاجة اسمها اوكتافيا و كمان الفيليشيا القديمة كانت جميلة لكن الفابيا مش داخلة دماغي خالص بس برده قلت احطها في الاختيارات يمكن الناس تقولي معلومات كويسة عنها تخليني اغير رأيي

- نيسان تيدا هاتشباك 119,000 جنيه
ماعنديش اي معلومات عنها

- دايهاتسو تريوس 116,000 جنيه
دي الوحيدة اللي مش صغيرة و ساعات بقول عربية زي دي تنفع برده في الطرق الوعرة و كمان يعتمد عليها اكتر من العربيات الصغيرة في السفر و بالتالي هاتريح العربية الاساسية اكتر و اهي ياباني برده مش وحشة...ايه رأيكم؟

-رينو ميجان هاتشباك الجديدة 128,000 جنيه
شكلها غريب شوية...بس دايما الرينو تعمل تصميمات ثورية و بعد شوية الناس تاخد عليها و تحس بجمالها

انا هاحط صورة كل عربية عشان تساعدكم في ابداء رأيكم
-------------------------------------------------------------------------------
بيجو 207





فيات جراند بونتو





سكودا فابيا




نيسان تيدا هاتشباك




دايهاتسو تريوس




رينو ميجان هاتشباك