الموضوع: ما هي الأفضل كسيارة ثانية ( للمدام ) في حدود 65 الف ؟؟؟؟؟؟ محتاج مشورة

بعد سنتين من العلام .... والتدريب .... والأدب ... مع ال 128 الاصيلة
حان الوقت اني اشتري سيارة اكثر راحة ورفاهية لمدام شوماخر .... وطبعا دي ح تكون السيارة الثانية للأسرة .. الاولى اللي معايا هيا اوبترا 2008 مانيوال
مواصفات السيارة الخاصة بالمدام اكيد بتفرق عن سيارتي انا
وكونها ح تبقة السيارة الثانية بتفرق كتير في الاختيار
المبلغ المخصص للسيارة في حدود 65000 وانا مش باحب ي حاجة بالقسط يعني ح اشتري كاش
اختياراتي و المميزات والعيوب ح اقولها لحضراتكم بالتفصيل وياريت ما تبخلوش عليا بالنصيحة والمشورة
...
انا طبعا باتكلم على الزيرو ..... ولو لقيت كسر زيرو بحالة الزيرو ومن شخص مضمون ممكن يكون اختيار مطروح .... والترتيب ده حسب الاقرب الى نفسي حاليا
......
1 - لانوس هاف اوبشن ب 66000 .... فول اوبشن 69000 وكلها مانيوال مافيش منها اوتو حاليا
مميزاتها
سيارة الشعب ... منتشرة ولما بقت تاكسي انتشرت اكتر .... سهلة الاصلاح .... اكسسوارات وقطع غيار متهاودة .... كابينة واسعة ... اعادة بيعها جيدة..... توكيلها كويس بالنسبة لي

عيوبها .... يقاااال ان مستواها نزل لما بقت شيفرولية .... يقال ان فراملها ضعيفة شوية ....استهلاك الوقود مش عارف عنه حاجة وياريت حد يقوللي ... شكلها تقليدي بقالها ردح من الزمان ... موتور كامة واحدة 1500 cc يعني اقل من الفيرنا واللوجان


2- فيرنا هاف ب 62000 .... وفول 65500 .....و فول اوتو 72000
مميزاتها ....
منتشرة زي اللانوس تقريبا .... اكسسوارات وغيار رخيص ... صيانة سهلة.....موتورها اقوى من اللانوس و 2 كامة و 1600 ..... في منها اوتو ... اعادة بيعها جيدة وسهلة
...
عيوبها
العربية جراية اوي وثباتها مش عالي مع السرعة وده مش كويس للنساء ... والرجال كمان
كابينتها ضيقة من ورا ..... تقفيلها اقل جودة شوية من اللانوس ... واطية وبتحك في المطبات ....توكيلها بالنسبة لي مجهول وما اعرفش عنه غير اللي بأسمعه .واللي باسمعه طبعا مش كويس
....


3- رينو لوجان 57000فاضية خالص ب ...هاف اوبشن ب 64000 .... فول ب 68000 ومافيش منها اوتو
...
مميزاتها
شكل شيك واحدث من اللانوس والفيرنا ..... عالية عن الارض..... صناعة اوروبي بتجميع مغربي ... توكيل محترم الى حد ما لكن غالي
عيوبها ...
سيارة جديدة في السوق يعني لسة ما بانش عيوبها ( لسة بطيخة مقفولة ) واكيد صيانتها خارج التوكيل صعبة ...
اكسسواراتها وغيارها اكيد مش سهل لكونها جديدة .... خايف من تكييفها ... اكيد حيبقى اقل من الكوري ..... سامع كلام عن بعض العيوب مثل رعشة الفتيس والحرارة داخل الكابينة
..
4- هيونداي i 10 هاف ب 58900 ... فول منيوال ب 63900 ..... اوتو ب 71900
مميزاتها
تقفيل كوري ..... شكل حديث وملائم للستات ....حجمها بيخليها سلسة في القيادة للستات ... استهلاك اقتصادي علشان موتور 1100
..
عيوبها
1100 ccفقط يعني موتور نونو .....غيارها و اكسسواراتها اكيد مش زي اللانوس والفيرنا .... هاتشباك يعني من غير شنطة تقريبا .... الكابينة ضيقة .....واطية ع الارض .... الوكيل ( انظر الفيرنا )
...
طبعا فيه اختيارات تاني لكن مش بافضلها
بيكانتو
ساجا
افيو
سيبرانزا

ولسة النهاردة زوجتي بتقوللي شافت اعلان في الجرايد عن عربية شبه الياريس ب 66000 ... طبعا انا لسة ح اشوفها لأن مش معقول طبعا تكون ياريس ... او ياريس وده المقدم بس
...
ياريت اللي عنده نصيحة يقولها
وياريت يكون الموضوع بعيد عن الحساسيات وكل واحد ما ياخدش الامور بتحيز لسيارته .... كلها في الآخر حديد بنركبه عشان يمشي بينا ..... يعني العربيات مش من بقيت أهلنا
..
..

المشاركة الأصلية كتبت بواسطة Beam28

أرشح من الأوتو الفيرنا او الـ i10 وفيه من الـ i10 اوتو هاف اوبشن بـ 66 الف ودي انا حجزتها بس لسة هاستلمها وفضلتها عن الفيرنا لانها أعلى وافضل في القعدة من الفيرنا ومش فارفة معايا قوة مواتير بالعكس الواحد بيدور عالتوفير في البنزين اللي شكله هايغلى قريب.. حاجة كمان الـ i10 تقفيل هندي مش كوري لكن نضيف جدا.. في المانيوال اعتقد اللوجان كويسة جدا يعيبها حجمها الكبير بالنسبة لسيدة مع تقل نسبي للباور وتقفيل اقل جودة وطبعا التوكيل غالي.. الفيرنا ايضا جيدة جدا مع مراعاة عيوب التقفيل المعروفة
وبالتوفيق ان شاء الله

انا لما سألت ماحدش قالي ان فيه هاف اوتو .... عموما هيا سعرها كويس والاوتو افضل للسيدات اكيد ....
...
احمد نوبيرا باشا
السوزوكي دي نزلت السوق فعلا ؟؟؟ واقدر اشوفها فين ؟

وهيا تقفيل هندي زي الماروتي ... ولا متقفلة فين ....
شكرا لكم جميعا