الموضوع: بطاحات و لا إيه.....؟؟؟؟؟

المشاركة الأصلية كتبت بواسطة Ahmed A.Maksoud

بص يا باشا.........البطاحات حسب تجربتى معاها فى الميجان مكنتش بتعمل صوت خبطة.....هو حاجة عاملة زى أحتكاك أو خشونة عند لف الدركسيون يمين أو شمال للأخر.....و مكنتش بتعمل صوت خبطة مع طلعة العربية.

غالباً و الله أعلم اللى عندك ده ممكن يكون بيض المقصات

لو عاوز حد كويس برة التوكيل ممكن تروح لكار بويز فى طريق السندباد....متطلعش الكوبرى و تلف من تحته و ترجع هتلاقى ورشتهم على اليمين بعد 3 أو 4 معارض عربيات

هتلاقى هناك أصحاب الورشة المهندس سعيد ( مليان شوية ) و المهندس خالد قولهم من طرف أحمد عبد المقصود.....و شوف هيقولولك أيه.

ملحوظة 1 : المهندس سعيد مش بيطلع يجرب عربيات....المهندس خالد هو اللى بيجرب
ملحوظة 2 : لو ملقتش حد منهم متعملش حاجة فى العربية

هما بيقفلو الجمعة و شغالين طول الأسبوع من الساعة 1 أو 2 الظهر .

أسمع الكلام اللى هيتقالك و تعالى نتناقش فيه تانى.

و على فكرة......البطاحات ممكن تحتاج تشحيم فعلاً.....لأن البطاحات بيبقى فيها رلمان بلى....و لو هتشترى من برة يبقى لازم تسأل على السعر بالرلمان بلى و لا من غيره.....لأنها بتتباع فى الحالتين.

مشكور ا / أحمد على المساعدة....

للأسف أنا من الأسكندرية فمش عارف هقدر أروح كار بويز قريب و لا لأ...

أنا النهاردة قعدت أعمل إختبارات على البطاحة لقيت كل حاجة تمام...شكلها فعلا مش بطاحات.

أنا بصراحة خايف من فتاوى العفشجية و مش عارف أتصرف إزاى....خصوصا إن الصوت مش دائم يعنى ساعات يظهر و ساعات لأ.

خبرتى مع التوكيل فى إكتشاف الأصوات مكنتش ناجحة أبدا...لازم أنا اللى أقول لهم إيه اللى فى العربية إلا لو العيب واضح جدا.

بفكر بصراحة أتعايش شوية معاه (مع إنى مش بستحمل أى صوت ) لغاية لما الحاجة دى تزيد و تظهر أكتر هى إيه بدل ما أقعد أغير حاجات على الفاضى.

أنا حريص جدا فى سواقتى...و إسكندرية إلى حد كبير مطباتها معقولة و مشوارى غالبيتها على الكورنيش و أى مشوار مش ولا بد باخد الماتريكس بدل الميجان.

علشان كده أنا مش شاكك فى حاجة خطيرة فى العفشة لكن الحاجتين اللى ممكن يحتاجوا تغيير قريب هما تيل فرامل أمامى و كاوتش العربية علشان لسه الكاوتش الستوك فيها..مش عارف هل فيه حاجة من دول ممكن تعمل كده؟


أنا بشكرك مرة أخرى على مساعدتك......