هى فكرة غريبة بس طقة فى دماغى كنوع من الفضول
:

ممكن كل عضو يقولنا هو عرف المنتدى منين و ايه اسباب دخوله لاول مرة و ليه مستمر لدرجة ان فى بعض الاعضاء تقريبا عندها ادمان .. و لو كنت من مدمنين المنتدى ازاى اكتشفت ادمانك.. بس رجاء بلاش المجاملات يعنى بلاش الكلام المبالغ فيه اللى مش حاتحسه من اول كام مرة دخلت فيها


و حابدأ بنفسى :

انا عرفت المنتدى ده عن طريق ابن خالتى و اسمه محمد رزق و بيدخل المنتدى باسم FIGHTER
اول مرة دخلت كنت بادور على عربية و قالى ان فى منتدى كويس و ممكن تلاقى طلبك فيه
بعد كده لقيت مواضيع و مناقشات كتيرة و مفيدة جدا و ناتج خبرات عديدة لاعضاء كتير و من ساعتها بقيت بادخل بانتظام طول ما انا فى مصر
ابتديت ادمنه لما ابتديت اشارك فى المواضيع و متهيألى بسبب انك لما بتشارك فى المواضيع بيبقى فى تواصل مع الاعضاء و مع الوقت بيبقى فى الفة

عرفت انى ادمنته لما بقيت اول حاجة باعملها لما اقوم من النوم او لما باروح البيت انى افتح و اشوف المشاركات و الردود و المواضيع المختلفة..


مين تانى حايعترف .. لأن الانكار مش حايفيد .. التهمة لابساك لابساك