انقلاب عربية نقل على الدائري والسبب عربية ملاكي !!!

**survey** · 15-05-2010 09:52 PM

كلاكيت المرة ال 700 في حوادث السيارات على الدائري

النهاردة وانا راجع من الشغل في حدود الساعة 3 ونص حصلت حادثة اسفرت تهشم سيارة ملاكي بالكامل وانقلاب سيارة نقل كبيرة وتدمير للجانب الايسر من سيارة ربع نقل اخرى بس الحمد لله الكل خرج سليم ,ازاي ... ما اعرفش

اسباب الحادث اللي تفرس

في الاتجاه من المطار الى المعادي بالظبط عند مخرج مدينة نصر قبل النفق

صاحب السيارة الملاكي ماشي عادي ودخل اول النفق
اكتشف فجأة انه غلط وكان لازم يطلع من مخرج مدينة نصر
قام سيادته موقف العربية تماما في منزل النفق وسط الطريق وبسلامته بيرجع بضهره
طبعا اخينا سواق النقل ماشي سريع وداخل لسة على النفق ومش حاطط في باله ان في حد مجنون بيرجع وهووووووووب لبس فيه لبسة محترمة وكان بيحاول يفاديها بس بعد ايه وراح حااااااااااادف يمين على الاخر وخبط في الرصيف الفاصل بين منزل النفق والمخرج والعجلة اليمين طارت من النقل وده اللي خلاها تتقلب على مخرج مدينة نصر.
وسواق العربية الربع نقل حظه الاسود انه كان جنبهم بس والعربية النقل لطشته من الجنب

بس الشهادة لله الاسعاف جات بعد 10 دقايق تقريبا ودي الحاجة الوحيدة الكويسة في الموضوع ده

**shouk_1987** · 15-05-2010 10:00 PM

أيوه أنا شفتها و أنا راجع عند مدخل مدينة نصر الساعة 5:15 كده
العربية النقل لونها أخضر على جنبها و الملاكى بيضة و مدمرة (مش عارف إزاى خرج سليم) والربع النقل الحمره ملطوش فى جنبه بس لطشه جامدة بصراحة
طيب ياعنى لو الملاكى كانت طالبة معاه يرجع خلاص
ماجاش ليه على اليمين و لزق فى الرصيف و رجع بطىء جدا و مشغل الإنتظار ياعنى هو رجع و هو فى نص الطريق كده ؟؟؟؟؟

**hobaz** · 15-05-2010 10:05 PM

لاحول ولا قوة الا بالله والحمد لله انها جت على قد كده وربنا يصبرهم ويستر طريقنا كلنا....

**ابو فرح** · 15-05-2010 10:08 PM

لاحول ولا قوه الا بالله
لامبالاه متناهيه من يومين بردو واحد راكب النترا وفى طلعه اكتوبر اكتشف انه ماشى غلط راح راجع بضهره فى مطلع الكوبرى بس الحمد الله ادنيا كانت رايقه محصلش حاجه بس بصراحه مناظر تحرق الدم

**د.محمود صلاح** · 15-05-2010 10:13 PM

اخطاء بشرية في الغالب ولا حول ولا قوة الا بالله العلي العظيم

**hugan** · 15-05-2010 10:18 PM

المشاركة الأصلية كتبت بواسطة د.محمود صلاح

اخطاء بشرية في الغالب ولا حول ولا قوة الا بالله العلي العظيم

استهتار يا دكتور
مش اخطاء
قمه الاستهتار والغباء
ارواح وممتلكات

**eino666** · 15-05-2010 10:45 PM

المشاركة الأصلية كتبت بواسطة hugan

استهتار يا دكتور
مش اخطاء
قمه الاستهتار والغباء
ارواح وممتلكات

حضراتكم كده بتظلموا الاغبياء والمستهترين بتشبيهه بهم
لان الغبى ده خلقة ربنا والمستهتر طبعه كده وممكن يتعلم ويبطل استهتار لكن اللى يعمل عملة زى اخينا ده يبقى مالهوش وصف اصلا وحرام يتحسب علينا بنى ادم
................................
محمود عينو

**Dr.lancer** · 15-05-2010 10:54 PM

الناس اللى بتكلموا عليها دول (اللى ماشى عكس الإتجاة و اللى وقف تماما فى طريق سريع) لو خدتهم الى أى دول أوروبية أو حتى خليجية حتلاقيهم ملتزمين جدا. الموضوع موضوع رقابة و عقاب للمخالف. لكن اشمعتى القيادة وسلوك لعض المواطنين هو اللى مستغربين منه. الفساد لما يحل فى بلد بيقضى على كله مظاهر حضارتها كلها.