بايكر مصر وبايكر الهرم بالذات خلوا بالكم كويس من شارع الهرم عشان الي بيتمسك فيه بيحبسوه وأنا بقولكم الكلام ده من واقع تجربه شخصيه لمدة 8 أيام
وعلى فكره في الهرم بيمسكوك بالليل حتى لو معاك رخصك سليمه
إوعى تقف في شارع الهرم لو ماشي ولا حد هايبصلك لكن لو وقفت على جنب هتلاقيهم فوق راسك
أنا إتمسكت الساعه 5 الفجر ورحت قسم الهرم والساعه 8 الصبح رحلونا على نيابة المرور تحت كوبري فيصل انا وإتنين تاني ووكيل النيابة إدانا أربع أيام على ذمةالتحقيق ورجعنا قسم الهرم ترحيل وقعدنا الأربع أيام ورحنا النيابة تاني ووكيل النيابة خبطنا أربع أيام إستمرار ورجعونا قسم الهرم وكل ده في الحجز وسط المجرمين وبعد الأربع أيام التانيين رحلونا على محكمة تاج الدول خلف قسم إمبابة والقاضي حكم علينا واحد غرامه 200 جنيه والتاني غرامه 400 جنيه والتالت بدون غرامات
عارفين التهمة كانت إيه؟
" التسابق في شارع الهرم "
عارفين قعدونا أربع أيام ليه؟
عشان الباشا وكيل النيابة مش عارف يعني إيه تسابق في شارع الهرم
مالهاش حكم في الدستور عارفين الموضوع وصل من وكيل النيابة لرئيس النيابة للمحامي العام للنائب العام وكله نايم في البطيخ مش عارفلها حكم عارفين في النهاية إتحولت لإيه؟
إتحولت لجنحه
"تنظيم سباق في الطريق العام بدون تصريح "
عارفين المفاجأه الكبرى إن الـ 3 موتسيكلات غير صالحين للتسابق عارفين ليه؟
لأن أول ريس 250 عاده وكان عطلان على جنب ومسكوه
وتاني موتسيكل جاوا لايصلح للتسابق
وتالت موتسيكل 250 فايربليد جابوه من مكان تاني بتاع واحد عنده كافتريا وفي شارع زغلول وكان راكنه قدام الكافتريا وقالوله إن فيه بلاغ موتسيكل مسروق ولازم ياخدوه القسم يكشفوا على رقم الموتور والشاسيه ويرجع بيه علطول
والواد ذهل لما لقى نفسه محبوس بدون أي سبب
يعني كمان إحنا التلاته مانعرفش بعض أصلا
القاضي أصدر براءه عن تهمة التسابق بعد ما المحامي أثبت إن الجاوا بتاع ميكانيكي وكان رايح يقطر الموتسيكل العطلان
وأثبت إن الريس يعادل بقوته سياره bmw والجاوا يعادل الموتسيكل الصيني والموتسيكل التالت عطلان
وكانت المخالفات عباره عن 200 جنيه لصاحب الريس بتاع شارع زغلول عشان رخصته لا تجيز ورخصة الموتسيكل منتهيه ناهيك عن إنه واخدينه من قدام الكافيتيريا وهو مركون كل ده طبعا ما إتذكرش
ماهو ده الي ناقص تكون راكن موتسيكل فتره كبيره يجي يديك مخالفه عشان منتهي رخصته وعشان معكش رخصة سواقه أمال لو ماشي بيه هايعملوا إيه؟ أكيد هايعدموك
وطبعا المفاجأه الأكبر إن الموتسيكلات في الكيلو 10,5
أول طريق مصر إسكندريه الصحراوي مخزن السيارات منهم واحد فايبره إتدغدغ وربنا يستر عالتانيين
شكرا وحسبي الله ونعم الوكيل
المفضلات