بص ياباشا خلاصة تجربة في مرور السلام في ترخيص 3 عربيات من أول الفحص لحد استخراج الرخصة :
1- انت هتروح اول يوم في اي وقت براحتك خالص تشتري نماذج فحص من داخل المرور من شباك الفحص وبعدين على الباب بتاع المرور بره خالص هتلاقي ساحة كبيرة على شماله تبع المرور تدخل فيها وهتنده عامل البصمة يرفع البصمة وتطبقله 5 ج في ايده (خليك معاه براحة علشان هو خلقة ضيق شوية) بعدين تطبق 20 ج (لازم عشرين مش أكتر) وتديها للمهندس هيبصلك من فوق لتحت ويسالك على عربيتك هي فين شاورله عليها هيطلب منك بمنتهى البجاحة 50 ج هتديهاله وانت ساكت (معلش هي دي ضريبة العربيات الموديلات العالية في البرايد واللادا اديته 20 ج متكلمش) هيمضيك على الورق بتاع فحص الطفاية وفحص البيئة والفحص العام من غير ما يلمس العربية (وهي دي الميزة ) يعني ولا تخلع زينون ولا بتاع وبعدين ابقى اركن عربييتك بعيد عن الكشك اللي بيقعد فيه علشان مياخدش باله من الفاميه
بعدين تدخل على اي كشك بتاع التامين تدفع التامين الاجباري
وبعدين تطلع الدور التاني بصورة البطاقة تدخل مكتب المباحث تعمل استعلام أمني هيختملك عليها
بعد كده ياباشا ما تحاولش تعمل اي حاجة مطلقا حتى لو كان واسطتك وزير لان هتعطل كتير كده
تاخد بعضك من سكات وتروح زي الباشا بدون اي مجهود يذكر
2- هو ده بقى الاهم في الموضوع كله تاني يوم تركن عربيتك في جراج المرور (ده مكانه هتدخل في الحارة اللي على بابها المرور يعني باب المرور هيكون على يمينك وتكمل على طول في وشك رسم الجراج ده 1.65 ج وبيديلك تذكرة وتشتري من عنده الملف ابو 2 جنيه علشا فيه ورق هتحتاجه) وتفك النمر (يفضل تكون مجهزها مفكوكة قبل ما توصل علشان ممكن متلاقيش حد يفكها في التوقيت ده) تكون واقف أمام باب المرور الساعة 7.45 بالظبط هتلاقي المرور ما فتحش متتحركش من أمامه لانه شوية ويفتح
تاخد بعضك جري وتقف على الشباك قبل الاخير جنب المكان اللي اشتريت منه النماذج امبارح هتلاقي الموظفة جاية بتدحرج هتديلها الملف زي الباشا وبددون اي رشوة او اكرامية (احترم نفسك احنا لسه على الصبح لما يعدي الواد بتاع الشاي اطلبها كباية وادعيلي)هتراجع الورق وتديلك حاجات تدفع في الخزينة وترجعلها تاني بعد لما هي تخلص هتنظر بره عند الشمسية مش اكتر من نص ساعة بالكبير ساعة (والانتظار ده سببه ان البهوات المراجعين بييجوا متأخرين شوية) هتلاقيهم بيندهوا عليك استلم رخصتك و تطلع على شباك تسليم اللوحات تستلم اللوح وترجع عند عربيتك هتلاقي عيال بتركبها اللي جوه الجراج بياخدو 5 ج (سيبك من العيال اللي بره) هطلب عشرة اقفش انت في 5 ج
ملحوظة : انا ليه يعملها في يومين ؟ لان الطبيعي بتاع اي حد انه عايز يخلص في يوم واحد وكله بيعمل نفس الاجراءات فهتلاقي زحمة في كل مرحلة انت بتعملها وممكن تدخل المرور الساعة 8 تخرج من مش قبل الساعة 6 بالليل (هو ده مرور السلام) وايا من يوم الخميس والسبت اياك اياك
وبعد كده مبرووووووووووووووووك
على فكرة ايدي وجعتني جدا