مطلوب مساعدة فى صيتنة مازدا 3
السلام عليكم يا شباب
بجد منتدى ولا أروع والشباب هنا متعاونين جدا جدا والمواضيع كلها مفيده
بعد اذنكو انا حبيت اسأل شويه اسأله لانى اليومين دول بعمل صيانه لسيارتى مازدا 3
أولا انا عايش بالامارات والسياره اشتريتها من الامارات طبعا وقطع الغيار متوفره قدامى بسهوله بس انا حبيت اعرف شويه حاجات كده عشان انا هنزل السياره مصر فى الاجازه بعد شهرين السياره عامله 103000 كم بس طبعا الطرق هنا نضيفه جدا
أولا
محتار جدا فى تغيير الاطارات بين ميشلن وبريدجستون انا مركب جنط 17 والاطار مقاس 225/45/17 هل حد عنده خبره فى انواع الميشلن- أنا بيهمنى فى المقام الاول عدم وجود صوت اثناء القياده على سرعات عاليه وثانيا ثبات السياره وثالثا النقشه تكون معقوله
ثانيا
كل اللى عملته فى السياره من ساعه ما اشتريتها هو تغيير الزيت والفلتر والبوجيهات وطبعا ناوى قبل السفر اغير سير الماكينه والتيل - هل فى شيء يجب عمله على المكيف
ثالثا
فى شيء مضايقنى فى الدريكسيون وهو لما بكسر على الاخر واعمل مارش وابدا اعدل الدريكسيون عشان ارجع بسمع طقطقه مش عارف من ايه مع العلم ان الصوت ده موجود تقريبا من ساعه ماشريت السيارة
رابعا
اليومين دول وانا بسخن السياره الصبح ومشغل المكيف بحس ان السيارة ممكن تفصل يعنى بحس انها هتبطل بس مش بتبطل هل لازم اشيك على حاجه فى الكهرباء؟
أخيرا
انا حابب راكب لما انزل مصر سوست كونى دى اجيبها منين تكون مخصوصه للمازدا ومين اللى ممكن يركبها وسعرها كام عشان انا ناوى اهبط السيارة شويه
شكرا لكم واتمنى الرد عليه