أسهل وأرخص حل فى الميجان 2

**heha** · 19-05-2010 11:16 AM

ممكن حد يفيدنى أه أسهل وأرخص حل للميجان 2 عشان عاوز بدون تعقيد أسمع اللى بيكلمنى فى الموبيل على سماعات العربيه وأتكلم من غير مأمسك الموبيل فى إيديه وياريت من غير ماتعبكم معايه الرد يكون بكام ومنين وفين ومن غير مصطلحات عشان أنا جاهل أوى فى الحاجات دى

**Hany Saad** · 19-05-2010 12:23 PM

المشاركة الأصلية كتبت بواسطة heha

ممكن حد يفيدنى أه أسهل وأرخص حل للميجان 2 عشان عاوز بدون تعقيد أسمع اللى بيكلمنى فى الموبيل على سماعات العربيه وأتكلم من غير مأمسك الموبيل فى إيديه وياريت من غير ماتعبكم معايه الرد يكون بكام ومنين وفين ومن غير مصطلحات عشان أنا جاهل أوى فى الحاجات دى

الحلول المتاحة أما حضرتك طبعا هحاول أشرح بأسلوب بسيط:

- تركيب وصلة سلك فى ظهر الكاسيت (aux) عند أدريان مثلا...طبعا وحوش القاهرة يفيدوك أكتر بتركب فين و السعر لن يتعدى 100 جنيه شامل تمن السلك + التركيب. و بعدين حضرتك توصل السلك ده على ريموت النوكيا الn95 و ده لن يتعدى ال50 جنيه....طبعا الشرط هنا إنه يجب أن يكون موبايلك سوكت السماعة فيه هو السوكت الستاندرد ال3.5 مم اللى بتركب عليه أى سماعة صوت عاديه أو ممكن ريموت الn73 و ده بيركب على تليفونات النوكيا اللى فيها من تحت شرط نحاس كتير متوازية (وصلة pop port ).

التكلفة كده لن تزيد عن 150 جنيه (وصلة + ريموت)....الصوت نقى جدا....المشكلة محدود بأنواع تليفونات محددة.

-الحل التانى فى تركيب كار كيت ماركة parrot وده متوفر فى توكيل htc اللى موجود فى أول شارع city stars من ناحية طريق النصر جنب مطعم الشبراوى.

و ده أنواع ....فيه منه بسيط بدون تعقيد فى التركيب و بيشتغل على موجة الfm و ده مش كويس...... و فيه منه غالى (فى حدود 1500 جنيه أو أكثر) ومحتاج توصيلات و شغل نظيف و معاه mic بيركب عند المراية فى منتصف السيارة و ده كويس جدا.

-الحل الثالث تجيب كاسيت جديد فيه built in blue tooth و معاه mic برده و ده عبارة عن كاسيت مع كاركيت فى قطعة واحدة سعره برده من 1500 إلى 2000 جنيه و ماركات نظيفة جدا و صوت روعة و أوبشنز وهمية لكن المشكلة هتفقد ميزتين غاية فى الأهمية:
1- الريموت اللى فى طارة الدركسيون.
2-حساسية الصوت مع سرعة العربية.

أرجو إنى أكون قدرت أفيدك فى ضؤ معلوماتى البسيطة.

**Hany Saad** · 19-05-2010 12:37 PM

المشاركة الأصلية كتبت بواسطة heha

أولا أنا متشكرلإهتمامك وأعتقد إن الحل ده أنسب حل ولكن ده مايخرجش العربيه من الضمان لإن أنا عربيتى 2010

أعتقد هما بيوصلوا وصلة الaux فى التوكيل برده و السعر مش هيفرق كتير و بكده يبقى ضمنت إن عربيتك لسه فى الضمان ده غير إن الوصلة دى بتخليك توصل أى مشغل موسيقى على كاسيت العربية و تسمعه على السماعات.

**karioky** · 21-05-2010 01:04 PM

ممكن تجيب موبايل فى FM transmitter و تريح نفسك و يشتغل على أى عربية

**Hany Saad** · 21-05-2010 02:30 PM

المشاركة الأصلية كتبت بواسطة karioky

ممكن تجيب موبايل فى FM transmitter و تريح نفسك و يشتغل على أى عربية

كواليتى الصوت مش كويس أبدا مهما كان نوع الfm transmitter جيد و ده عن تجربة لى و لأشخاص كثيريين طبعا المتاح هو النوكيا الN series زى الN82 و ما شابه....لكن برده الصوت على الfm مش كويس.

يوجد صوت زنه خفيفه جدا بتبوظ تجربتك السمعية و كمان أوقات كتير بيحصل تداخل من محطات تقوية أو تشويش أو سيارات جنبك.

لا أنصح به أبدا للى بيفرق معاه كواليتى الصوت....

**Hany Saad** · 23-05-2010 10:48 AM

المشاركة الأصلية كتبت بواسطة heha

معاش طولوا بالكم معايه شويه أفهم من FM transmitter أن ده أوبشن فى بعض الموبيلات وإن كان صح أعتقد أن ده هيخلينى أسمع اللى بيكلمنى طب أنا هتكلم إذاى ؟

النوكيا الN series الجديد نازل معاه built in fm transmitter علشان تسمع الملفات الأوديو بتاعتك على كاسيت العربية أو أى كاسيت متواجد عن طريق موجة الfm.

طبعا فى أثناء ذلك لو جالك مكالمة التليفون هيرن فى سماعات العربية كأنه كاركيت عادى...لكن المشكلة إن التليفون لازم يكون متثبت على حامل و يكون الحامل قريب من بقك علشان إنت هتستخدم الmic بتاع التليفون...بصراحة مجربتش أستخدم مكالمات عبر الfm transmitter قبل كده و مش عارف هيفضل ينقل المكالمة عبر سماعات العربية و لا لأ....لكن أنا متأكد إنك لو سميع و بيفرق معاك كواليتى الصوت خصوصا لو كاسيت زى الميجان مش هتبقى مبسوط أبدا من الfm transmitter.