الموضوع: صيانة 75 ألف لعربيتى الأسترا 2005

السلام عليكم ورحمة الله وبركاته
100 مسا على شباب المنتدى .....
أنا كنت ناوى أعمل صيانة 75 ألف للعربية بتاعتى ( أسترا 2005 ) .... دورت فى المنتدى وجبت نمرة وعنوان عبد الله أوبل .... وبعدين استفدنا من طنانى باشا فى قطع الغيار .... نزلت التوفيقية وبعدين شارع شامبليون لحد ما لقيت سرور
اشتريت :
سير كاتينة Dayco صناعة إيطالى بـ 80 جند
فلتر هواء 50 جند
فلتر بنزين 45 جند
فلتر زيت 40 جند
ورحت منطلق على عبد الله أوبل .
ركنت العربية واستلمها 2 صنايعية ( محمد الطويل و محمد زكريا ) سألونى هتعمل ايه قلتلهم صيانة كاملة وشيك على كل السيور والخراطيم .
وبدأوا طبعا بمنتهى الحرفنة بأمانة كل واحد منهم يعمل حاجة .
وطبعا صلاح مانجة كان متواجد وبعتلى شاى وأخدت شوية معلومات .
المهم محمد الطويل اللى هو الصناعيى اللى كان مستلم العربية بأء يفك كل حاجة
وقالى إن سير الموتور سليم وأن سير الكاتينة وفلتر الهوا والزيت والبنزين عاوزين يتغيروا وكمان طقم بوجيهات وبلية كاتينة
قلتله على البركة رحت فاتح الشنطة ومطلع كل اللى اشتريته وهو مستغرب أنا جبتهم منين .
وطبعا اضطريت اشترى طقم بوجيهات بووش ألمانى 75 جند وكمان بلية كاتينة 190 جند من عندهم .
والحمد لله لقى الخراطيم سليمة وخرطوم الفايظ بس عاوز يتغير بس معندوش .
وطبعا جبت الكهربائى غير لمبات الفوجات وشيك على كل الفوانيس والمراية اليمين كانت خبطاها عربية فمشغالة ...ومعرفش يتعامل معاها وقالى تتغير كلها ... وكان الاكصدام عاوز يتفك ويتركب مضبوط راح محمد الطويل ركب معايا ورحنا للسمكرى لقيناه قفل .
بس أنا شايف الناس شغلها حلو .... وفاهمين كمان
وبعد ده كله كانت المصنعية 80 جند وبقشيش 20 جند يا بلاش .

ودى كانت رحلة الأمس للصيانة لعربيتى .