الموضوع: قلبك جامد (خد المفاجاءه دي)

يا راجل حرام عليك انا جتنى زغطه من الخضة عموما الله جاب الله خد الله عليه العوض ربنا يكرمك بحته مرشيدس e class

المشاركة الأصلية كتبت بواسطة hema_lancer

في البدايه مش عايز حد يزعل مني
علشان في ناس هتقول اني كنت بخداعها طول الفتره اللي فاتت دي
بس الحمد لله انا عمري ما اذيت حد ولا قولت معلومه غلط تضر حد
وانا كنت وعدتكم من فتره ان في مفاجأه
وهي اني الحمد لله ربنا كرمني وبعت الكريستاله بتاعتي بعد عناااااااء معاها
بصراحه انا تعبت قوي مع العربيه دي طول ال 4 سنين اللي كانت معايا فيهم
كانت بتعطل بيا في كل مكان وبتخلي منظري وحش جدا مع ناس كتير
و صرفت عليها كتيييير جدا يمكن قد تمنها
كل ده علشان الناس كلها كانت بتقول عليها حلوه وجميله واعتماديه وكل الكلام ده
وبقيت اصرف عليها علشان اشوفها كده بس للأسف مكنش في فايده
وانا مش قادر اقول غير كده ليكون الرد بتاعي متناقض مع الناس كلها
دا انا حتي عملت اسمي انا هيما لانسر لأني كنت بوهم نفسي اني بحبها
وكل الأفاده اللي كنت بقولها للناس دي كنت بقولها من كتير خبرتي وعنائي معاها
كل يوم عند الميكانيكي والكهربائي وشويه العفشجي كانت مجنناني
يمكن يكون انتو عربياتكم حلوه بس بجد بعد التجربه دي انا استحاله افكر في لانسر تاني ابدااا
دا انا حتي هغير اسمي وهخليه هيما اسبرانزا من كتر كرهي لللانسر
انا مش عارف الناس متمسكه بالعربيه دي ليه دي من اكتر العربيات الفاشله اللي نزلت مصر
عموما ربنا يباركلكم في عربياتكم بس لو حد طالب نصيحه انه يجيب لانسر ولا لأ انصحه مليون مره لأ لأ لأ
علشان مايمرش بالمعاناه بتاعتي دي وربنا يعوض عليا ويرزقني بالي يعوض عليا
بس هقول ايه حسبي الله ونعم الوكيل

طبعا كل الكلام ده هزار انا فعلا بعت العربيه لظروف خارجه عن أرادتي
اول مره احس ان في حاجه بحبها قوي ضاعت مني
بجد انا حتي مكنتش قادر اسلمها للراجل بأيدي وخليت الحاج هو اللي يتصرف
لدرجه اني عملت للحاج توكيل علشان يبعها هو قولتلو مش هقدر ابيعها بأيدي
بصراحه عربيه بقالها معايا سنين عمرها ما قلت بأصلها
بجد عمرها ما ودتني لميكانيكي ولا عطلت بيا في اي حته ولا عمرها اشتكت
اديها بنزين 80 تقولي كمان
اشد بيها مع اي حد تسد وترفع رقبتي
بجد انا ارفع القبعه لهذه السياره
وانحني لها تقديرا
وبأذن الله ربنا يبارك للي اخدها ويديلو خيرها ويكفيه شرها
وربنا يعوض عليا باللي أحسن منها بأذن الله
بس كريستاله باردو :)
وانا من موقعي هذا اعلن استمراري لدعم الكريستاله واستكمال المسيره حتي بعد ما فرقت حياتي بدون اي انذارات
وربنا يكرمكم ويباركلكم في عربياتكم ويدكم خيرها ويكفيكم شرها يارب
وياريت كل واحد يتطوع كده ويديني لفه كل اسبوع لأن انا حاسس ان اي حد معدي جنبي بكريستاله ممكن افتح الباب وانزله واخد لفه غصب عنه

يا سيدى ربنا يعوضك بمرسيدس- تنسيك اى عربيه قول يارب